Market | గల్ఫ్ యుద్ధ ప్రభావం…
Market | గల్ఫ్ యుద్ధ ప్రభావం…
Market | గల్ఫ్ దేశాలకు అగిన గుడ్ల ఎగుమతులు
భారీగా పడిపోయిన కోడిగుడ్డు ధర
గల్ఫ్ యుద్ధ ప్రభావం.. కుప్పకూలిన గుడ్ల ధరలు
ఎగుమతులు ఆగిపోవడంతో దేశీయ మార్కెట్లో గుడ్ల నిల్వలు పెరుగుదల
చిత్తూరు జిల్లా పౌల్ట్రీ రంగంపై తీవ్ర ప్రభావం
ఉత్పత్తి వ్యయం పెరిగినా రైతులకు ధరలు లేక నష్టాలు
రంజాన్ ప్రభావం.. తగ్గిన గుడ్ల వినియోగం
వినియోగదారులకు ఉపశమనం.. రైతులకు సంక్షోభం
ప్రభుత్వ జోక్యం కోరుతున్న పౌల్ట్రీ రైతులు
Market | చిత్తూరు బ్యూరో, ఆంధ్రప్రభ : పశ్చిమాసియాలో నెలకొన్న యుద్ధ ఉద్రిక్తతలు దేశీయ పౌల్ట్రీ రంగంపై తీవ్ర ప్రభావం చూపుతున్నాయి. ముఖ్యంగా గల్ఫ్ దేశాలకు కోడిగుడ్ల ఎగుమతులు నిలిచిపోవడంతో దేశవ్యాప్తంగా గుడ్ల ధరలు ఒక్కసారిగా కుప్పకూలాయి. తెలుగు రాష్ట్రాలతో పాటు చిత్తూరు జిల్లాలో కూడా ఈ ప్రభావం స్పష్టంగా కనిపిస్తోంది. ఎగుమతుల కోసం సిద్ధం చేసిన లక్షలాది గుడ్లు దేశీయ మార్కెట్లోనే నిలిచిపోవడంతో సరఫరా పెరిగి ధరలు గణనీయంగా పడిపోయాయి. దీంతో పౌల్ట్రీ రైతులు తీవ్ర ఆర్థిక ఇబ్బందులు ఎదుర్కొంటున్నారు.
జాతీయ గుడ్డు సమన్వయ కమిటీ (NECC) సమాచారం ప్రకారం గత కొన్ని వారాల్లో గుడ్ల ధరలు భారీగా తగ్గాయి. ఇటీవల వరకు ఒక్క గుడ్డు ధర రూ.7కు పైగా ఉండగా ప్రస్తుతం అది రూ.4కు కూడా చేరని స్థితికి పడిపోయింది. కొన్ని ప్రాంతాల్లో మార్కెట్ ధర రూ.3.50 నుండి రూ.3.80 వరకు మాత్రమే ఉండటం పౌల్ట్రీ రైతులను తీవ్రంగా ఆందోళనకు గురి చేస్తోంది. ఒక గుడ్డు ఉత్పత్తి వ్యయం రూ.5కు పైగా వస్తుండగా మార్కెట్లో తక్కువ ధర రావడంతో రైతులకు ఒక్క గుడ్డుపై సుమారు రూ.1.50 వరకు నష్టం వాటిల్లుతోంది.
చిత్తూరు జిల్లా ఆంధ్రప్రదేశ్లో పౌల్ట్రీ రంగానికి ముఖ్య కేంద్రంగా గుర్తింపు పొందింది. జిల్లాలో సుమారు వెయ్యికి చేరువగా పౌల్ట్రీ ఫారాలు ఉన్నాయని అంచనా. వీటిలో వందలాది లేయర్ ఫారాలు రోజుకు లక్షల సంఖ్యలో గుడ్లను ఉత్పత్తి చేస్తున్నాయి. జిల్లాలో దాదాపు ఒక కోటి వరకు లేయర్ కోళ్లు ఉండగా రోజుకు సుమారు ఒక కోటి వరకు గుడ్లు ఉత్పత్తి అవుతున్నాయని పౌల్ట్రీ రంగ వర్గాలు చెబుతున్నాయి. పలమనేరు, మదనపల్లి, కుప్పం, గంగవరం, చిత్తూరు పరిసర ప్రాంతాల్లో పౌల్ట్రీ ఫారాలు అధికంగా ఉన్నాయి. ఇక్కడ ఉత్పత్తి అయ్యే గుడ్లు స్థానిక మార్కెట్తో పాటు బెంగళూరు, చెన్నై, హైదరాబాద్ వంటి పెద్ద నగరాలకు పంపబడతాయి. అలాగే తమిళనాడు, కర్ణాటక రాష్ట్రాల ద్వారా గల్ఫ్ దేశాలకు కూడా పెద్ద మొత్తంలో ఎగుమతి అవుతాయి.
అయితే ప్రస్తుతం పశ్చిమాసియాలో నెలకొన్న యుద్ధ వాతావరణం కారణంగా యూఏఈ, ఒమన్, ఖతార్, బహ్రెయిన్ వంటి గల్ఫ్ దేశాలకు గుడ్ల ఎగుమతులు పూర్తిగా నిలిచిపోయాయి. రవాణా మార్గాల్లో ఏర్పడిన ఆటంకాలు, భద్రతా సమస్యలు కారణంగా ఇప్పటికే పంపిన కొన్ని గుడ్ల కంటైనర్లు కూడా తిరిగి రావాల్సిన పరిస్థితి ఏర్పడింది. గల్ఫ్ దేశాలకు వెళ్లాల్సిన గుడ్లు దేశీయ మార్కెట్లోనే నిలిచిపోవడంతో సరఫరా పెరిగి ధరలు భారీగా పడిపోయాయి.
ధరలు పడిపోవడం వల్ల చిత్తూరు జిల్లాలోని పౌల్ట్రీ రైతులు తీవ్రమైన ఆర్థిక ఒత్తిడిని ఎదుర్కొంటున్నారు. గుడ్ల ధర తగ్గినా కోళ్లకు ఇచ్చే మేత ధరలు మాత్రం తగ్గలేదు. మక్కజొన్న, సోయా వంటి పశుగ్రాసాల ధరలు అధికంగా ఉండటంతో ఉత్పత్తి వ్యయం పెరుగుతోంది. గుడ్డు ధరలు మాత్రం పడిపోవడంతో రైతులకు భారీ నష్టాలు వస్తున్నాయి. రోజుకు లక్షల గుడ్లు ఉత్పత్తి చేసే పెద్ద ఫారాలకు రోజుకు లక్షల్లో నష్టాలు వస్తున్నాయని రైతులు చెబుతున్నారు. కొంతమంది రైతులు కోళ్లకు మేత పెట్టడానికి కూడా అప్పులు తీసుకోవాల్సిన పరిస్థితి ఏర్పడిందని ఆవేదన వ్యక్తం చేస్తున్నారు.
ఇక ముస్లింల పవిత్ర మాసం రంజాన్ ప్రారంభం కావడంతో కొన్ని ప్రాంతాల్లో గుడ్ల వినియోగం కూడా తగ్గింది. ఉత్పత్తి మాత్రం యథావిధిగా కొనసాగుతుండటంతో మార్కెట్లో గుడ్ల నిల్వలు పెరుగుతున్నాయి. ఎగుమతులు ఆగిపోవడంతో వ్యాపారులు కూడా పెద్ద మొత్తంలో కొనుగోలు చేయడానికి వెనుకంజ వేస్తున్నారు. దీంతో రైతులు గుడ్లను తక్కువ ధరలకు అమ్మక తప్పని పరిస్థితి ఏర్పడింది. కొంతమంది ఉత్పత్తిదారులు అదనపు గుడ్లను కోల్డ్ స్టోరేజ్లలో నిల్వ చేస్తున్నప్పటికీ దీని వల్ల కూడా అదనపు ఖర్చులు వస్తున్నాయి.
ధరలు తగ్గడంతో వినియోగదారులకు మాత్రం కొంత ఉపశమనం లభిస్తోంది. గతంలో ఒక్కో గుడ్డు రూ.8 నుంచి రూ.9 వరకు ఉండగా ప్రస్తుతం రూ.5 నుంచి రూ.6 మధ్య లభిస్తోంది. హైదరాబాద్లో డజన్ గుడ్ల ధర సుమారు రూ.50 వరకు ఉండగా ఆంధ్రప్రదేశ్లో కూడా ఇదే ధర కొనసాగుతోంది. అయితే వినియోగదారులకు లాభం కలిగించిన ఈ పరిస్థితి పౌల్ట్రీ రైతులకు మాత్రం పెద్ద సంక్షోభంగా మారింది.
పౌల్ట్రీ రంగం వేలాది కుటుంబాలకు ఉపాధి కల్పిస్తున్న నేపథ్యంలో ఈ పరిస్థితి కొనసాగితే రైతులు తీవ్ర ఇబ్బందులు ఎదుర్కోవాల్సి వస్తుందని రంగ నిపుణులు హెచ్చరిస్తున్నారు. గుడ్ల ధరలు స్థిరపడేందుకు ప్రభుత్వం జోక్యం చేసుకోవాలని, ఎగుమతులను పునరుద్ధరించే చర్యలు తీసుకోవాలని పౌల్ట్రీ రైతులు కోరుతున్నారు. పశ్చిమాసియాలో జరుగుతున్న యుద్ధం వేల కిలోమీటర్ల దూరంలో ఉన్న చిత్తూరు జిల్లా పౌల్ట్రీ రైతుల జీవనోపాధిపై కూడా తీవ్ర ప్రభావం చూపుతుండటం పరిస్థితి తీవ్రతను స్పష్టంగా తెలియజేస్తోంది.
