- డోన్ లో స్త్రీ శక్తి శపథం
- మహిళల భారీ ర్యాలీ
(నంద్యాల బ్యూరో, ఆంధ్రప్రభ) : ఎన్నికల ముందు ఇచ్చిన ప్రతి వాగ్దానాన్ని ఉమ్మడి కూటమిలోని ముఖ్యమంత్రి నారా చంద్రబాబు నాయుడు (ChandrababuNaidu) అమలు చేసి తీరుతారని, మరో 15 ఏళ్లు రాష్ట్రంలో కూటమి అధికారంలో ఉంటుందని డోన్ ఎమ్మెల్యే కోట్ల జయ సూర్య ప్రకాష్ రెడ్డి, మాజీ ఎమ్మెల్యే కోట్ల సుజాతమ్మ అన్నారు. నంద్యాల జిల్లా (Nandyal District) డోన్ పట్టణంలో గురువారం సూపర్ సిక్స్… సూపర్ హిట్ కార్యక్రమంలో వేలాది మంది మహిళలతో స్త్రీ శక్తి ర్యాలీలో సత్తా చాటారు.
ఈసందర్భంగా ఎమ్మెల్యే మాట్లాడుతూ… ముఖ్యమంత్రి నారా చంద్రబాబు నాయుడు ఎన్నికల ముందు ప్రజలకు హామీగా ఇచ్చిన సూపర్ సిక్స్ (Super Six) పథకాలు విజయవంతంగా అమలు కావడంతో అవి రాష్ట్ర వ్యాప్తంగా సూపర్ హిట్ అయ్యాయన్నారు. సూపర్ సిక్స్ పథకాలలో ఐదు పథకాలను విజయవంతంగా అమలు చేశారన్నారు. అందుకే ఈరోజు సూపర్ సిక్స్ సూపర్ హిట్ (SuperSixSuperHit) సభను ఘనంగా జరుపుతున్నట్టు తెలిపారు.
సూపర్ సిక్స్ పథకాలలోవృద్ధులకు నెలకు 4 వేల రూపాయల పెన్షన్, ప్రతి సంవత్సరం మహిళలకు మూడు ఉచిత గ్యాస్ సిలిండర్లు పంపిణీ, తల్లికి వందనం పథకం ద్వారా ప్రభుత్వ, ప్రైవేట్ పాఠశాలలో చదివే ప్రతి విద్యార్థికి 15వేల రూపాయల పంపిణీ, రైతులకు అండగా అన్నదాత సుఖీభవ (Annadata Sukhbivha) పథకం అమలుతో శ్రీకారం చుట్టారన్నారు. మహిళలకు ఉచిత బస్సు స్త్రీ శక్తి ప్రయాణం అమలు చేశారన్నారు. మహిళలు ఎక్కడి నుంచి ఎక్కడికైనా స్వేచ్ఛగా ప్రయాణించే వీలు కల్పించడం గొప్ప నిర్ణయమన్నారు.
