Komatireddy | మహిళలకు ప్రత్యేక గుర్తింపు
Komatireddy | నల్గొండ, ఆంధ్రప్రభ : కాంగ్రెస్ ప్రభుత్వంలోనే మహిళలకు ప్రత్యేక గుర్తింపు ఉందని రోడ్లు భవనాలు సినిమాటోగ్రఫీ శాఖ మంత్రి కోమటిరెడ్డి వెంకటరెడ్డి (Komatireddy Venkata Reddy) అన్నారు. శనివారం జిల్లా కేంద్రంలోని కలెక్టర్ కార్యాలయంలో ఉన్న ఉదయత్య భవనంలో జిల్లా కలెక్టర్ ఇలా త్రిపాఠి ఏర్పాటు చేసిన ఇందిరా మహిళా శక్తి చీరల పంపిణీ కార్యక్రమానికి ముఖ్యఅతిథిగా పాల్గొని మహిళలకు చీరలు పంపిణీ చేసి అదే విధంగా కళ్యాణ లక్ష్మి చెక్కులు పంపిణీ చేశారు.
అనంతరం ఆయన మాట్లాడుతూ… రాష్ట్ర ముఖ్యమంత్రి రేవంత్ రెడ్డి (CM Revanth Reddy) మహిళ అభ్యున్నతికి మొదటి ప్రాధాన్యత ఇస్తున్నారన్నారు. మహిళలను అన్ని రంగాల్లో బలోపేతం చేయడానికి, మహిళా శక్తి పెంచడానికి, వారే సొంతంగా ఆదాయాన్ని పెంచి, కుటుంబాన్ని పోషించడం కోసం అనేక పథకాలు చేపట్టారని పేర్కొన్నారు. రూ.28కోట్ల వడ్డీలేని రుణాలు, బ్యాంక్ లింకేజీ కార్యక్రమంలో రూ.600 కోట్ల రాష్ట్ర ప్రభుత్వం (government) అందిస్తుందన్నారు. ఉచిత బస్సు కోసం రూ.8వేల కోట్లు ఖర్చు చేశారు. ఈ పథకాన్ని చాలా మంది మహిళలు ఉపయోగించుకుంటున్నారన్నారు. రేషన్ సన్నబియ్యం పంపిణీకి రూ.12వేల కోట్లు ప్రభుత్యం ఖర్చు చేస్తుందన్నారు.
మాజీ ప్రధాని ఇందిరాగాంధీ చేసిన సేవలు గుర్తు చేసుకుంటూ వారి పేరు మీదుగా ఇందిరా మహిళ శక్తి చీరల పంపిణీ అని నామకరణం చేశామన్నారు. కొత్త రేషన్ కార్డులు, 200 యూనిట్ల ఉచిత విద్యుత్, గ్యాస్ సబ్సిడీ వంటి పథకాలు మహిళలకు మేలు చేయడానికే ప్రభుత్వం (government) అమలు చేస్తుందని, అదేవిధంగా ఇల్లు లేని నిరుపేదలకు ఇందిరమ్మ ఇండ్లు ఇవ్వడం జరిగిందని తెలిపారు. ఈ కార్యక్రమంలో ఎమ్మెల్సీ శంకర్ నాయక్, అదనపు కలెక్టర్ జే శ్రీనివాస్, డిఆర్డిఏ పిడి శేఖర్ రెడ్డి, జిల్లా గ్రంథాలయ చైర్మన్ ఆఫీస్ ఖాన్, మార్కెట్ కమిటీ చైర్మన్ జూకురి రమేష్, డిసిసిబి డైరెక్టర్ పాశం సంపత్ రెడ్డి, అధికారులు, మహిళలు తదితరులు పాల్గొన్నారు.
