Kabaddi | భార‌త్ కు మ‌రో ప్ర‌పంచ కప్ !!

  • మహిళల కబడ్డీ ప్రపంచకప్‌
  • ఛాంపియన్‌ భారత్‌
  • ఫైనల్లో చైనీస్‌ తైపీపై ఘన విజయం
  • ఉత్కంఠ పోరులో 35-28తో సత్తా చాటిన రీతూ బృందం
  • వరుసగా రెండోసారి వరల్డ్‌కప్‌ ట్రోఫీ కైవసం
  • అంతకుముందు 2012 ప్రపంచకప్‌లో ఇరాన్‌పై గెలుపు
  • టోర్నీలో అజేయంగా నిలిచిన టీమిండియా

అంతర్జాతీయ వేదికలపై భారత మహిళా క్రీడాకారిణులు అదరగొడుతున్నారు. ఇప్పటికే క్రికెట్‌ వన్డే వరల్డ్‌కప్‌తో పాటు అంధ మహిళల క్రికెట్‌ ప్రపంచకప్‌ ట్రోఫీని గెలుచుకున్న భారత అమ్మాయిలు.. తాజాగా మరో విశ్వ కిరీటాన్ని ముద్దాడారు. ఢాకా వేదికగా జరిగిన మహిళల కబడ్డీ ప్రపంచకప్‌-2025లో భారత్‌ ఛాంపియన్‌గా అవతరించింది.

సోమవారం జరిగిన హోరాహోరీ ఫైనల్లో భారత అమ్మాయిలు 35-28 తేడాతో చైనీస్‌ తైపీను చిత్తు చేసి వరుసగా రెండోసారి వరల్డ్‌కప్‌ ట్రోఫీని కైవసం చేసుకున్నారు. అంతకుముందు పట్నా వేదికగా జరిగిన తొలి కబడ్డీ ప్రపంచకప్‌లో భారత మహిళల జట్టు ఫైనల్లో ఇరాన్‌ను 25-19తో చిత్తు చేసి తొలి ప్రపంచకప్‌ టైటిల్‌ను సొంతం చేసుకుంది.

ఇప్పుడు దాదాపు 13 ఏళ్ల తర్వాత నిర్వహించిన మహిళల రెండో కబడ్డీ ప్రపంచకప్‌లోనూ భారత జట్టే విజేతగా నిలిచింది. కాగా, తాజాగా ఢాకాలో జరిగిన 2025 వరల్డ్‌కప్‌లో డిఫెండింగ్‌ ఛాంపియన్‌గా బరిలోకి దిగిన టీమిండియా వరుస విజయాలతో ఆకట్టుకుంది. అజేయంగా నిలిచి టోర్నీని ముగించింది.

12 జట్లు పోటీ పడిన ఈ మెగా టోర్నీలో రీతూ నేగీ సారథ్యంలోని భారత బృందం సెమీస్‌లో కఠినమైన ఇరాన్‌ను 33-21తో మట్టి కరిపించింది. ఇక ఫైనల్లోనూ అదే జోరు కొనసాగిస్తూ చైనీస్‌ తైపీపై జయకేతనం ఎగురవేసింది. సూపర్‌ విక్టరీతో మువ్వన్నెల జెండాను మరోసారి అంతర్జాతీయ వేదికపై రెపరెపలాడించింది.

హోరాహోరీగా జరిగిన ఈ టైటిల్‌ పోరులో భారత్‌ తొలి అర్ధ భాగంలో 20-16తో ఆధిక్యం సంపాందించింది. సంజూ దేవి సూపర్‌ రైడ్‌తో నాలుగు పాయింట్లు సాధించి సత్తా చాటింది. ఇక రెండో అర్ధ భాగంలోనూ భారత అమ్మాయిలు దూకుడుగా ఆడారు. కానీ, ఆఖర్లో తైపీ క్రీకాడారిణిలు కూడా ఎదురుదాడికి దిగారు. దీంతో మ్యాచ్‌ మరో ఐదు నిమిషాల్లో ముగుస్తుందనగా భారత్‌ 29-24తో నిలిచింది. తర్వాత జోరు పెంచిన టీమిండియా వరుస పాయింట్లు సాధించింది. దీంతో భారత్‌ ఏడు పాయింట్ల తేడాతో నెగ్గి విశ్వవిజేతగా అవతరించింది.

Leave a Reply