విద్యార్థులు, సైబర్, సోషల్ మీడియా పట్ల అప్రమత్తంగా ఉండాలి…
విద్యార్థులు, సైబర్, సోషల్ మీడియా పట్ల అప్రమత్తంగా ఉండాలి…
- కేజీబీవీలో బాలికలకు అవగాహన కల్పించిన ఎస్సై లు
చిట్యాల, ఆంధ్రప్రభ : సమాజంలో జరుగుతున్న నేరాలు, సైబర్ భద్రత, సోషల్ మీడియా పై అప్రమత్తంగా ఉండాలని చిట్యాల ఎస్ఐ పోచంపల్లి సతీష్ ,రెండవ ఎస్ఐ హేమ లత, లు అన్నారు. శనివారం మండల కేంద్రంలోని కస్తూర్బా గాంధీ బాలికల విద్యాలయం లో విద్యార్థినులకు సమాజంలో జరుగుతున్న నేరాలు, సైబర్ భద్రతపై పోలీసులు ప్రత్యేక అవగాహన కార్యక్రమాన్ని నిర్వహించారు. ఈ కార్యక్రమంలో చిట్యాల ఎస్.ఐ. పోచంపల్లి సతీష్ , ఎస్సై-2, హేమలత , పాల్గొని విద్యార్థులకు దిశానిర్దేశం చేశారు.
విద్యార్థులు సోషల్ మీడియా వినియోగాన్ని తగ్గించి, విలువైన సమయాన్ని చదువుపై కేంద్రీకరించాలని కోరారు. ఫేస్బుక్, ఇన్స్టాగ్రామ్ వంటి సామాజిక మాధ్యమాల్లో తెలియని వ్యక్తులతో పరిచయాలు పెంచుకోవడం ప్రమాదకరమని, వ్యక్తిగత సమాచారాన్ని పంచుకోకూడదని హెచ్చరించారు. షీ టీమ్స్ డయల్ 100 ఎవరైనా వేధింపులకు గురిచేసినా , ఇబ్బంది పెట్టినా భయపడకుండా వెంటనే సమాచారం అందించాలని కోరారు .
బాల్యం నుంచే చట్టాలపై ప్రాథమిక అవగాహన కలిగి ఉండాలని, క్రమశిక్షణతో కూడిన విద్యతోనే ఉన్నత శిఖరాలను అధిరోహించవచ్చని పోచంపల్లి సతీష్ , హేమలత లు పేర్కొన్నారు. ఈ కార్యక్రమంలో ప్రత్యేక అధికారి సుమలత, ఉపాధ్యాయులు, పోలీస్ సిబ్బంది, పాల్గొన్నారు.
