విజయవాడ ఎంపీ కేశినేని శివ‌నాథ్ (చిన్ని)
జీఎస్టీ సంస్కరణలతో ఎంఎస్ఎంఈల్లో నూత‌నుత్తేజం..
డ‌బుల్ ఇంజిన్ స‌ర్కారుతో స‌మ‌పాళ్ల‌లో సంక్షేమం, అభివృద్ధి..
గ్రేట్ అమ‌రావ‌తి షాపింగ్ ఫెస్టివ‌ల్‌ను ప్ర‌జ‌లు స‌ద్వినియోగం చేసుకోవాలి..
విజయవాడ ఎంపీ కేశినేని శివ‌నాథ్ (చిన్ని)
(ఆంధ్రప్రభ, విజయవాడ) ప్ర‌ధాన‌మంత్రి, ముఖ్య‌మంత్రి ఆశ‌యాల‌కు అనుగుణంగా స్వ‌ర్ణాంధ్ర, విక‌సిత్ భార‌త్ సాకారానికి జీఎస్టీ 2.0 సంస్క‌ర‌ణ‌లు చోద‌క శ‌క్తిగా నిలుస్తాయ‌ని విజయవాడ ఎంపీ కేశినేని శివ‌నాథ్ అన్నారు.
సోమ‌వారం న‌గ‌రంలోని పున్న‌మిఘాట్ వ‌ద్ద ఎంపీ కేశినేని శివ‌నాథ్.. జిల్లా కలెక్టర్ డా. జి.ల‌క్ష్మీశ, జాయింట్ కలెక్టర్ ఎస్‌.ఇల‌క్కియ, వీఎంసీ క‌మిష‌న‌ర్ ధ్యాన‌చంద్ర హెచ్ఎం, జీఎస్టీ జాయింట్ క‌మిష‌న‌ర్ ఎస్‌.ప్ర‌శాంత్ కుమార్ త‌దిత‌రుల‌తో క‌లిసి గ్రేట్ అమ‌రావ‌తి షాపింగ్ ఫెస్టివ‌ల్‌ను ప్రారంభించారు. ఈ సంద‌ర్భంగా ఎంపీ కేశినేని శివ‌నాథ్ మాట్లాడుతూ డ‌బుల్ ఇంజిన్ స‌ర్కారుతో అభివృద్ధి, సంక్షేమం స‌మ‌పాళ్ల‌లో అందుతోంద‌ని.. జీఎస్టీ సంస్కరణలతో వాణిజ్య, వ్యాపార రంగాలు అభివృద్ధి దిశ‌గా ప‌య‌నిస్తాయ‌న్నారు. జిల్లాలో 67 శాతం వాటా క‌లిగిన సేవారంగం మ‌రింత అభివృద్ధికి ఈ జీఎస్టీ సంస్క‌ర‌ణ‌లు దోహ‌దం చేస్తాయ‌న్నారు.
న‌గ‌ర ప్ర‌జ‌లు ఈ ఫెస్టివ‌ల్‌ను స‌ద్వినియోగం చేసుకోవాల‌ని సూచించారు. రోజువారీగా మ‌నం ఉప‌యోగించే అనేక వ‌స్తువుల‌పై జీఎస్టీ బాగా త‌గ్గింద‌ని.. జీఎస్టీ త‌గ్గుద‌ల‌తో జరుగుతున్న ఆదా ను పండ‌గలా జ‌రుపుకుంటున్నామ‌ని, రాష్ట్రంలో దాదాపు 50 వేల స‌మావేశాల ద్వారా ప్ర‌జ‌ల‌కు పెద్దఎత్తున జీఎస్టీ 2.0 ప్ర‌యోజ‌నాల‌పై అవ‌గాహ‌న క‌ల్పిస్తున్న‌ట్లు ఎంపీ కేశినేని శివ‌నాథ్ తెలిపారు.
…ప్ర‌త్యేక ఆఫ‌ర్లు, ల‌క్కీడ్రాల‌తో షాపింగ్ ఫెస్టివల్…
జీఎస్టీ 2.0 సంస్కరణలతో ప్ర‌జ‌ల‌కు జరుగుతున్న ప్ర‌యోజ‌నాల‌పై అవ‌గాహ‌న క‌ల్పించే క్ర‌మంలో సోమ‌వారం నుంచి ఈ నెల 19వ తేదీ వరకు జ‌రిగే గ్రేట్ అమ‌రావ‌తి షాపింగ్ ఫెస్టివ‌ల్‌కు ప్ర‌జ‌లు వ‌చ్చి.. ఎంచ‌క్కా షాపింగ్ చేసుకోవ‌చ్చ‌ని జిల్లా కలెక్టర్ లక్ష్మీ శ పేర్కొన్నారు. ఈ ఫెస్టివ‌ల్‌లో రోజువారీ ల‌క్కీడ్రాల‌తో పాటు మెగా డ్రా తీయ‌డం జ‌రుగుతుంద‌ని.. వ్యాపార, వాణిజ్య సంస్థ‌లు కూడా ప్ర‌త్యేక ఆఫ‌ర్లు ప్ర‌క‌టించాయ‌న్నారు. సూప‌ర్ జీఎస్టీతో రాష్ట్ర ప్ర‌జ‌ల‌కు దాదాపు రూ. 8 వేల కోట్లు, ప్ర‌తికుటుంబానికి నెల‌కు రూ. 6 వేలు నుంచి రూ. 12 వేల వరకు ఆదా అవుతుంద‌ని వివ‌రించారు. సామాన్యుల‌కు ఎంతో మేలు జ‌రుగుతోంద‌ని.. స్థూల విలువ జోడింపు (జీవీఏ), త‌ల‌స‌రి ఆదాయం పెరుగుద‌ల‌కు ఈ సంస్క‌ర‌ణ‌లు దోహ‌దం చేస్తాయ‌న్నారు. జీఎస్టీ జాయింట్ క‌మిష‌న‌ర్ ఎస్‌.ప్ర‌శాంత్ కుమార్ మాట్లాడుతూ..ఎలక్ట్రానిక్స్, గృహోప‌క‌ర‌ణాల‌పై గ‌తంలో 28 శాతం జీఎస్టీ ఉండ‌గా జీఎస్టీ 2.0 సంస్కరణలతో అది 18 శాతానికి త‌గ్గింద‌న్నారు. స‌బ్బులు, టూత్‌పేస్టులు, వంట‌నూనెలు, డిట‌ర్జెంటులు వంటి నిత్యావ‌స‌ర ఎఫ్ఎంసీజీ వ‌స్తువుల‌పై గ‌తంలో 18 శాతం జీఎస్టీ ఉండ‌గా అది 5 శాతానికి త‌గ్గింద‌ని వివ‌రించారు. బీమా, ఆరోగ్య పాల‌సీల‌పై గ‌తంలో 18 శాతం జీఎస్టీ ఉండ‌గా అది నేడు సున్నా శాతం అయింద‌న్నారు. ఈ ప్ర‌యోజ‌నాల‌ను ప్ర‌జ‌ల‌కు వివ‌రించే క్ర‌మంలో ఈ షాపింగ్ ఫెస్టివ‌ల్‌ను ఏర్పాటుచేశామ‌ని.. ఈ ఫెస్ట్‌ను ప్ర‌జ‌లు స‌ద్వినియోగం చేసుకోవాల‌ని, రోజూ సాయంత్రం సాంస్కృతిక కార్య‌క్ర‌మాల‌తో పాటు ఫుడ్ స్టాళ్లు, ఫ‌న్ గేమ్స్ వంటివి ఉంటాయ‌ని వివ‌రించారు. ప్ర‌తిఒక్క‌రూ భాగ‌స్వాములై ఈ ఫెస్ట్‌ను విజ‌య‌వంతం చేయాల‌ని కోరారు.
…ఈనెల 19 వరకు…
గ్రేట్ అమ‌రావ‌తి షాపింగ్ ఫెస్టివల్ ఈ నెల 19వ తేదీ వరకు జ‌ర‌గ‌నుండ‌గా..ఫెస్టివ‌ల్‌లో ఏర్పాటుచేసిన ఎల‌క్ట్రిక‌ల్‌, ఎలక్ట్రానిక్స్ వ‌స్తువుల‌తో పాటు కార్లు, బైకులు త‌దిత‌ర వాహ‌నాల స్టాళ్లు, స్థానిక హ‌స్త‌క‌ళాకారులు, లీడ్ బ్యాంకు యూనియ‌న్ బ్యాంక్ ఆఫ్ ఇండియా ఏర్పాటుచేసిన స్టాళ్లను అతిథులు సంద‌ర్శించారు. షాపింగ్ ఫెస్టివల్ ప్రారంభోత్స‌వ కార్య‌క్ర‌మంలో చిన్నారుల నృత్య ప్ర‌ద‌ర్శ‌న‌లు, సాంస్కృతిక కార్య‌క్ర‌మాలు ఆక‌ట్టుకున్నాయి.
కార్య‌క్ర‌మంలో డీఆర్‌వో ఎం.ల‌క్ష్మీన‌ర‌సింహం, విజయవాడ న‌గ‌ర‌పాల‌క సంస్థ అద‌న‌పు క‌మిష‌న‌ర్ డా. డి.చంద్ర‌శేఖ‌ర్‌, జిల్లా ప‌రిశ్ర‌మ‌ల అధికారి పి.మ‌ధు, డీఈవో యూవీ సుబ్బారావు, ఎల్‌డీఎం కె.ప్రియాంక త‌దిత‌రులు పాల్గొన్నారు.
