Auto stand |పట్టుపట్టిన డ్రైవర్ల ఆందోళన..
జిల్లా ఎస్పీ న్యాయం చేయాలని విజ్ఞప్తి
Auto stand |శ్రీ సత్య సాయి బ్యూరో, ఆంధ్రప్రభ : శ్రీ సత్య సాయి జిల్లా కేంద్రం పుట్టపర్తిలో ఆటో స్టాండ్ మార్పు చుట్టూ వివాదం రగులుతోంది. ఇందులో భాగంగా శనివారం ఆటో డ్రైవర్ల అందరూ సమావేశమై సమస్య పరిష్కారానికి ఆందోళన చేపట్టినట్లు తెలిపారు. దాదాపు నలభై సంవత్సరాలుగా ప్రశాంతి నిలయం ప్రధాన గేటు ఎదుట, ఆర్టీసీ బస్టాండ్‌కు ఆనుకొని కొనసాగుతున్న ఆటో స్టాండ్‌ను ఇటీవల మరో ప్రదేశానికి తరలించడంపై ఆటో డ్రైవర్లు తీవ్ర అభ్యంతరం వ్యక్తం చేస్తున్నారు. ఈ మార్పు తమ జీవనోపాధిని దెబ్బతీసిందని, ప్రజలకు కూడా తీవ్ర అసౌకర్యం కలుగుతోందని వారు అంటున్నారు.
పుట్టపర్తికి దేశం నలుమూలల నుంచి, విదేశాల నుంచి పెద్ద సంఖ్యలో భక్తులు తరచూ దర్శనార్థం వస్తుండటం తెలిసిందే. ఆర్టీసీ బస్టాండ్‌కు దూరం కాని ఈ ఆటో స్టాండ్, ఇన్నేళ్లుగా ప్రయాణికులకు అత్యంత అనుకూలంగా ఉండేది. బస్టాండ్‌లో దిగిన ప్రయాణికులు, ప్రశాంతి నిలయం మహాసమాధి దర్శనం చేసిన భక్తులు, అలాగే సాయిబాబా జనరల్ ఆసుపత్రి వంటి ప్రధాన కేంద్రాలకు వచ్చే రోగులు, వారి బంధువులు వీరందరికీ ఆటో స్టాండ్ సులభంగా అందుబాటులో ఉండేది. ఈ కారణంగానే ఆటో డ్రైవర్లు అనేక దశాబ్దాలుగా అదే ప్రాంతాన్ని తమ స్టాండ్‌గా వినియోగిస్తూ వచ్చారు.
అయితే, బాబా శతజయంతి ఉత్సవాల నేపధ్యంలో ప్రాంతంలో భారీగా పెరుగుతున్న రద్దీని నియంత్రించడంలో భాగంగా జిల్లా ఎస్పీ సతీష్ కుమార్ ట్రాఫిక్ సర్దుబాటు చర్యలు చేపట్టారు. ఈ చర్యలలో భాగంగా పాత స్టాండ్‌ను తొలగించి, మరో ప్రాంతానికి తరలించారు. అధికారుల ఈ నిర్ణయం డ్రైవర్ల ఆగ్రహానికి గురైంది. “ఇక్కడ 40 ఏళ్లుగా మా స్టాండ్ ఉంది. హఠాత్తుగా వెళ్లమంటే ఎక్కడికి వెళ్లాలి?” అని డ్రైవర్లు ప్రశ్నిస్తున్నారు. పాత ప్రదేశం ద్వారా రద్దీ పెరుగుతుందనే పోలీసుల వాదనను వారు ఖండిస్తున్నారు. రద్దీని తగ్గించడానికి మార్గాలను అన్వేషించే క్రమంలో స్టాండ్‌ను పూర్తిగా తరలించడం సరైన పరిష్కారం కాదని వార తమ అభిప్రాయం వ్యక్తం చేస్తున్నారు.
ఆటో డ్రైవర్ యూనియన్ నాయకులు మాట్లాడుతూ, కొత్తగా కేటాయించిన ప్రదేశం ప్రయాణికులకు అసౌకర్యంగా ఉందని, బస్టాండ్ నుంచి అక్కడికి నడుచుకోవడం కష్టమని, ముఖ్యంగా వృద్ధులు, మహిళలు, రోగులు తీవ్ర ఇబ్బందులు పడుతున్నారని తెలిపారు. ఇప్పటి వరకు ఉన్న స్టాండ్ భక్తులకు, రోగులకు, సాధారణ ప్రయాణికులకు అత్యంత సౌకర్యవంతమైనదని వారు గుర్తు చేశారు. డ్రైవర్ల ప్రకారం, స్టాండ్ మార్పు తమ ఆదాయంపై నేరుగా ప్రభావం చూపుతోంది. పాత ప్రదేశంలో నిరంతరం ప్రయాణికులు లభించేవారని, అయితే కొత్త ప్రదేశంలో నిలబడినంతసేపు ప్రయాణికులు దొరకడం లేదని వారు తెలిపుతున్నారు.
దీంతో రోజువారీ సంపాదన తీవ్రంగా తగ్గిపోయిందని ఆవేదన వ్యక్తం చేశారు. “ట్రాఫిక్ నియంత్రణ అనేది మేము వ్యతిరేకించేది కాదు. కానీ అది మా జీవనోపాధిని దెబ్బతీయకుండా ఉండాలి. మా సమస్యను ఎస్పీ గారు వినాలి, న్యాయం చేయాలి” అని యూనియన్ నాయకులు కోరుతున్నారు. శతజయంతి ఉత్సవాలు ముగిసిన నేపథ్యంలో పాత ఆటో స్టాండ్‌ను తిరిగి పునరుద్ధరించాలని వారు జిల్లా ఎస్పీకి విజ్ఞప్తి చేస్తున్నారు. స్థానిక ప్రజలు, భక్తులు, వ్యాపార వర్గాలు కూడా ఆటో స్టాండ్ పాత ప్రదేశంలోనే ఉంటే మంచిదని అభిప్రాయం వ్యక్తం చేస్తున్నారు.
ప్రజల అవసరాలు, డ్రైవర్ల జీవనోపాధిని పరిశీలించి సరైన నిర్ణయం తీసుకోవాలని వారు అధికారులను కోరుతున్నారు. జిల్లా ఎస్పీ ఈ వివాదంపై స్పందిస్తారా? పాత ఆటో స్టాండ్ పునరుద్ధరించబడుతుందా? అన్న ప్రశ్నలపై స్థానికంగా చర్చ కొనసాగుతోంది. ఆటో డ్రైవర్లు తమ న్యాయమైన డిమాండ్లకు స్పందన కోసం ఎదురు చూస్తున్నారు.
