ఊరికి స్మశాసం లేదమ్మా
- పీకలోతు ఓక్కిలేరులో.. పాడె మోస్తున్నాం
- టీ. జంబులదిన్నె జనం ఆక్రందన ఇది
( నంద్యాల, ఆంధ్రప్రభ బ్యూరో) : రతనాల సీమ రాయలసీమలో… ఏ ఊరుకెళ్లినా ఏముంది గర్వకారణం. పల్లెజనం గుండె ఘోష వినే నాథుడే లేడు. కాలం చెల్లి కన్ను మూస్తే పాతి పెట్టటానికి ఆరడుగుల స్థలం కనిపించదు. దహన సంస్కారాలతో కన్నీటి వీడ్కోలు చెప్పాలంటే.. ఇప్పటికీ వాగులు దాటాల్సిందే. నంద్యాల జిల్లా (NandyalDistrict) లోని ఆళ్లగడ్డ మండలం టీ. జంబులదిన్నె గ్రామం కూడా ఏ ఉదాహరణే. ఈ ఊరి జనాభా 670 మంది ఉంటారని అంచనా. ఈ ఊళ్లో ఓ బడి ఉంది. ఈ ఊరు నుంచి బయట ప్రపంచంలోకి వెళ్లాలంటే.. ఓకిలేరు వాగు దాటాల్సిందే. ఇది సజీవ వాగు కాదు.. కానీ వర్షాకాలంలో మాత్రం ప్రాణాలు ఫణంగా పెట్టి వాగుదాటాల్సిందే. ఇక గ్రామానికి శాశ్వత స్మశాన వాటిక లేదు. ఈ ఊరులో ఎవరన్నా తుది శ్వాస విడిస్తే.. ఓకిలేరు వాగు అవతల అడవి ప్రాంతంలో అంత్య క్రియలు జరపాలి.
సోమవారం సభ్య సమాజం ఉలిక్కి పడే ఘటన చోటు చేసుకుంది. గ్రామానికి గుర్రం భూషణం ఆదివారం మృతి చెందారు. సోమవారం అంత్యక్రియలు నిర్వహించటానికి ఒక్కిలేరు వాగు దాటి వెళ్లాల్సిన పరిస్థితి ఏర్పడింది. ఒక్కిలేరు వాగు (Okkileru Vagu) లో మనిషి పీకలోతు నీరు ఉంది. పైగా వాగు ఉధృతంగా ప్రవహిస్తోంది. అయినా సరే.. తమ ఆత్మీయుడి అంత్య క్రియలు గ్రామస్తులు సిద్ధ పడ్డారు. పాడే మోసుకుని ఆ వాగు దాటారు. అంతిమ సంస్కారాలు నిర్వహించారు. కానీ ఈ పాడె మోసిన నలుగురులో ఏ ఒక్కరు వాగు దాటికి కొట్టుకుపోతే.. మృతదేహంతో సహా పాడే మోసినోళ్లందరి కథ ముగిసిపోయేదే.
ఇలాంటి విపత్కర పరిస్థితులపై రెవెన్యూ అధికారుల(Revenue Officers) కు, ఇతర అధికారులకు ఎన్నిసార్లు ఫిర్యాదులు చేసిన పట్టించుకునే పరిస్థితి లేదు. ఓట్ల కోసం కాళ్లరిగేలా ఈ ఊరు చుట్టూ తిరిగే రాజకీయ నాయకులు .. ఈ ఊరి స్మశాన సమస్యను వెళ్లగక్కరు. ప్రస్తుతం యువకలెక్టర్ ప్రజలతో మమేకం అవుతున్నారు. అమ్మా కలెక్టరమ్మా.. ఈ ఊరు గోడు వినమ్మా. స్మశానం సమస్యపై దృష్టి సారించమ్మా.. ఈ వాగుపై వంతెన నిర్మాణానికి కృషి చెయ్యమ్మా.. అని టీ జంబుబదిన్నె జనం వేడుకొంటున్నారు.
