సంక్షేమ పథకాలపై అవగాహన
ములకలపల్లి, ఆంధ్రప్రభ : ములకలపల్లి మండల పరిధిలోని 20 గ్రామపంచాయతీలలో ‘ప్రజా పాలన – ప్రగతి ప్రణాళిక’ కార్యక్రమం గురువారం ఉత్సాహంగా నిర్వహించారు. ఆయా గ్రామాల్లో సర్పంచ్ల అధ్యక్షతన జరిగిన గ్రామసభలకు ప్రజలు పెద్ద ఎత్తున హాజరయ్యారు.
సంక్షేమ పథకాలపై సమగ్ర నివేదిక
ఈ సందర్భంగా ప్రభుత్వ ప్రతిష్టాత్మక పథకాల అమలు తీరుపై సంబంధిత శాఖల అధికారులు ప్రగతి నివేదికలను చదివి వినిపించారు. ముఖ్యంగా ఈ క్రింది అంశాలపై ప్రజలకు అవగాహన కల్పించారు:
- రైతు సంక్షేమం: రైతు భరోసా, సన్నరకం వరికి బోనస్ చెల్లింపులు
- మహిళా సాధికారత: మహాలక్ష్మి పథకం ద్వారా ఉచిత బస్సు ప్రయాణం, రూ.500కే సబ్సిడీ గ్యాస్ సిలిండర్, ఇందిరా మహిళా శక్తి, వడ్డీ లేని రుణాలు, ఇందిరమ్మ చీరల పంపిణీ
- నివాసం & జీవనోపాధి: ఇందిరమ్మ ఇండ్లు, కొత్త రేషన్ కార్డుల మంజూరు
- సామాజిక భద్రత: గృహజ్యోతి (ఉచిత విద్యుత్), చేయూత పెన్షన్లు, కళ్యాణలక్ష్మి పథకం
జగన్నాధపురం గ్రామసభకు ముఖ్య అతిథులు
జగన్నాధపురంలో నిర్వహించిన గ్రామసభకు జిల్లా గ్రామీణాభివృద్ధి అధికారి (డిఆర్డిఓ) బాబు, హార్టికల్చర్ జాయింట్ డైరెక్టర్ ముఖ్య అతిథులుగా హాజరయ్యారు.
ఈ సందర్భంగా వారు మాట్లాడుతూ, అర్హులైన ప్రతి లబ్ధిదారునికి ప్రభుత్వ పథకాలు చేరేలా చేయడమే గ్రామసభల ప్రధాన ఉద్దేశమని తెలిపారు. గ్రామాల్లో జరుగుతున్న అభివృద్ధి పనులను సమీక్షించడంతో పాటు ప్రజల వినతులను స్వీకరించారు.
ఈ కార్యక్రమంలో మండల స్థాయి అధికారులు, జగన్నాధపురం సర్పంచ్ కుంజా వినోద్, పంచాయతీ కార్యదర్శులు, వార్డు సభ్యులు, గ్రామస్తులు పాల్గొన్నారు.
