భారతీయ సినిమా నిర్మాణానికి ప్రధాన కేంద్రంగా హైదరాబాద్‌ తన స్థానాన్ని మరింత బలపర్చుకునేలా చర్యలు తీసుకుంటామని ముఖ్యమంత్రి రేవంత్ రెడ్డి స్పష్టం చేశారు. సినీ పరిశ్రమ అభివృద్ధికి అవసరమైన సహాయం, ప్రోత్సాహం అందించడానికి ప్రభుత్వం కట్టుబడి ఉందని ఆయన తెలిపారు.
71వ జాతీయ చలన చిత్ర అవార్డుల్లో వివిధ విభాగాల్లో అవార్డులు సాధించిన సినీ ప్రముఖులు జూబ్లీహిల్స్‌లోని సీఎం నివాసంలో మర్యాదపూర్వకంగా కలిశారు. ఈ సందర్భంగా సినిమా రంగం ఎదుర్కొంటున్న సవాళ్లను అవార్డు గ్రహీతలు ముఖ్యమంత్రి దృష్టికి తీసుకువెళ్లగా, ప్రభుత్వం పూర్తిస్థాయిలో తోడ్పాటునిస్తుందని రేవంత్ భరోసా ఇచ్చారు.
సీఎం అవార్డు గ్రహీతలకు అభినందనలు తెలియజేస్తూ, వారిని ప్రత్యేకంగా సన్మానించారు. ఈ సందర్భంగా భగవంత్ కేసరి చిత్ర దర్శకుడు అనిల్ రావిపూడి, హనుమాన్ చిత్ర దర్శకుడు ప్రశాంత్ వర్మ, ఆ చిత్రానికి విజువల్ ఎఫెక్ట్స్ అందించిన వెంకట్, శ్రీనివాస్, వారి బృందం, ఫైట్ మాస్టర్స్ నందు, పృథ్వి, బేబి సినిమా దర్శకుడు సాయి రాజేశ్, గాయకుడు రోహిత్‌లను సీఎం ఘనంగా అభినందించారు.
కార్యక్రమంలో హనుమాన్ నిర్మాతలు చైతన్య రెడ్డి, నిరంజన్ రెడ్డి, బేబి నిర్మాత ఎస్కేఎన్, భగవంత్ కేసరి నిర్మాత గారపాటి సాహు తదితరులు పాల్గొన్నారు.
