17thaprilsplstory | ప్రపంచ శాంతికి భారత్ పాత్ర ఎంత కీలకం?

17thaprilsplstory | ప్రపంచ శాంతికి భారత్ పాత్ర ఎంత కీలకం?

17thaprilsplstory | పశ్చిమ ఆసియా సంఘర్షణల ప్రభావం
గ్లోబల్ ఆర్థిక సంక్షోభం కారణాలు
చమురు ధరలు, భారత ఆర్థిక వ్యవస్థ
వ్యవసాయం, ఖరీఫ్ సీజన్‌పై ప్రభావం
ద్రవ్యోల్బణం మరియు ఆర్థిక సవాళ్లు
అంతర్జాతీయ రాజకీయాల్లో భారత్ స్థానం
శాంతి సాధనలో భారత్ చొరవ అవసరం

17thaprilsplstory | పశ్చిమ ఆసియా సంఘర్షణల ప్రభావం అన్ని దేశాల మీద ప్రబలంగా ఉందని స్పష్టంగా కనిపిస్తోంది. రష్యా-ఉక్రెయిన్ మధ్య యుద్ధం కారణంగా గ్లోబల్ ఎకానమీ తీవ్ర సంక్షోభంలోకి వెళ్లింది. ఉత్పత్తులు, ఎగుమతులు, దిగుమతులు, వ్యవసాయ ఉత్పత్తులు, వాణిజ్యాభివృద్ధి అన్నీ కుంటుతూ, పుంజుకోలేక ప్రపంచ ఆర్థిక పరిస్థితులను దెబ్బతీశాయి.

హర్మూజ్ జలసంధి బ్లాకేడ్ భయంతో చమురు ఎగుమతులు, నౌకల రాకపోకలు సందిగ్ధంలో పడ్డాయి. రెండు వారాల యుద్ధ విరమణ సంకేతాలు కూడా అనిశ్చితంగా మారడంతో అన్ని దేశాలు అగమ్యగోచర పరిస్థితులను ఎదుర్కొంటున్నాయి. “రెండు బలమైన జంతువుల మధ్య లేగదూడ నలిగిపోతుంది” అన్న సామెత ఇప్పుడు ప్రత్యక్షంగా కనిపిస్తోంది. ఒకవైపు అమెరికా తన బలం ప్రదర్శిస్తుండగా, మరోవైపు ఇరాన్ కూడా తాము వెనక్కి తగ్గబోమని ప్రకటిస్తోంది.

ఇంత సాంకేతిక విజ్ఞానం, ఆర్టిఫిషియల్ ఇంటెలిజెన్స్ అభివృద్ధితో ప్రపంచం ముందుకు సాగుతున్న ఈ సమయంలో యుద్ధ వాతావరణం అశనిపాతంలా మారింది. అభివృద్ధి మార్గంలో ఉన్న ప్రపంచం ఒక్కసారిగా వినాశనం దిశగా వెళ్లడం ఆందోళన కలిగిస్తోంది. అహంకారం పెరిగిన రాజకీయ నాయకులు చరిత్ర నుంచి పాఠాలు నేర్చుకోవాల్సిన అవసరం ఉంది. హిట్లర్, ముస్సోలిని వంటి నాయకుల ఉదాహరణలు మనకు హెచ్చరికగా నిలుస్తాయి. నాగరికత, సంస్కృతి అన్నీ కూడా కొందరి అవివేకం ముందు బలహీనంగా మారుతున్నాయి.

భారతదేశం, ప్రధాని మోడీ నాయకత్వంలో సమతుల్యత పాటిస్తూ ఇప్పటివరకు పరిస్థితులను సమర్థంగా ఎదుర్కొంటోంది. క్రూడ్ ఆయిల్, గ్యాస్, ఫర్టిలైజర్లు అందుబాటులో ఉంచేందుకు ప్రభుత్వం శ్రద్ధ తీసుకుంటోంది. ప్రస్తుతం భారత్ 41 దేశాల నుంచి చమురును దిగుమతి చేసుకుంటోంది. దేశంలో చమురు వినియోగం పెరుగుతున్న నేపథ్యంలో కూడా ధరలను నియంత్రించడానికి ప్రభుత్వం ప్రయత్నిస్తోంది. ప్రపంచ మార్కెట్ ధరలతో పోల్చితే క్రూడ్ ఆయిల్ ధరలు ఎక్కువగా ఉన్నప్పటికీ, వినియోగదారులపై భారం తగ్గించేందుకు చర్యలు తీసుకుంటోంది.

తాత్కాలిక కాల్పుల విరమణతో ధరలు కొంత తగ్గినా, పరిస్థితులు మళ్లీ అనిశ్చితంగా మారడంతో ధరలు పెరుగుతున్నాయి. ఇది భారత ఆర్థిక వ్యవస్థపై ప్రభావం చూపే ప్రమాదం ఉంది. ముఖ్యంగా ఖరీఫ్ సీజన్‌పై వ్యవసాయ రంగం ప్రభావితమయ్యే అవకాశం ఉంది. ఎరువుల కొరతతో పాటు గ్రామీణ ప్రాంతాల్లో సమస్యలు తలెత్తే సూచనలు కనిపిస్తున్నాయి. దీని వల్ల వ్యవసాయ ఉత్పత్తి తగ్గే ప్రమాదం ఉంది.

ఎగుమతులు తగ్గడం, రూపాయి మారకం విలువ పడిపోవడం, గల్ఫ్ దేశాల నుంచి ఉద్యోగులు తిరిగి రావడం వంటి పరిణామాలు ఆర్థిక భారాన్ని పెంచుతున్నాయి. అయితే యుద్ధం ఆగి శాంతి ఒప్పందాలు కుదిరితే పరిస్థితులు మెరుగుపడే అవకాశం ఉంది. ప్రస్తుత పరిస్థితుల్లో ద్రవ్యోల్బణం పెరిగే అవకాశం ఉంది. చమురు ధరలు పెరిగితే ప్రభుత్వం అదుపు చేయడం కష్టమవుతుంది. ఎక్సైజ్ డ్యూటీ తగ్గించడం వల్ల ప్రభుత్వ ఆదాయం కూడా తగ్గే అవకాశం ఉంది.

ఆర్థిక కార్యకలాపాలు మందగిస్తే ప్రభుత్వ రెవెన్యూ వసూళ్లు పడిపోతాయి. దీనివల్ల సంక్షేమ కార్యక్రమాలు ప్రభావితమవుతాయి. 2026-27 బడ్జెట్ అంచనాలను మించి ఆహారం, ఎరువులు, పెట్రోలియం సబ్సిడీలు పెరిగే అవకాశముంది. ఆర్‌బిఐ అంచనాల ప్రకారం ద్రవ్యోల్బణం కూడా పెరిగే అవకాశం ఉంది. అమెరికా అధ్యక్షుడు ట్రంప్, భారత ప్రధాని మోడీతో ఫోన్‌లో చర్చించినట్టు వార్తలు వచ్చాయి. యుద్ధ పరిణామాల నేపథ్యంలో శాంతి స్థాపనపై చర్చ జరిగి ఉండవచ్చు.

పాకిస్థాన్ మధ్యవర్తిత్వం పెద్దగా ఫలితాలు ఇవ్వలేదు. అలీన విధానాన్ని అనుసరించే భారత్ ఈ సమయంలో కీలక పాత్ర పోషించాల్సిన అవసరం ఉంది. ఇజ్రాయిల్, ఇరాన్ వంటి దేశాలు భారత్‌ను గౌరవిస్తాయి. రష్యాతో మంచి సంబంధాలు, అమెరికాతో సహకారం ఉన్న నేపథ్యంలో భారత్ శాంతి చర్చలకు వేదిక కావచ్చు. ప్రపంచ వినాశనంను నివారించేందుకు భారత్ ఇతర దేశాలతో కలిసి ముందడుగు వేయాల్సిన సమయం ఆసన్నమైంది.

• రావులపాటి సీతారాంరావు