- నంద్యాల జిల్లా పోలీసుల చాకచక్యం
ఆత్మకూరు (నంద్యాల జిల్లా), ఆంధ్రప్రభ : ఇంటి నుంచి హైదరాబాద్ కు వెళ్లిన ఇద్దరు మైనరు బాలికల జాడను నంద్యాల పోలీసులు పసిగట్టి.. తిరిగి తల్లిదండ్రులకు అప్పగించిన ఘటన ఇది. అధునాతన సాంకేతిక పరిజ్ఞానంతో ఆ ఇద్దరి బాలికల ఆచూకీ కనుగొని.. దారి మళ్లకుండా సురక్షితంగా ఇళ్లకు చేర్చటంలో నంద్యాల జిల్లా పోలీసుల చాకచక్యం ఇలా ఉంది.
వివరాల్లోకి వెళ్తే, నంద్యాల జిల్లా ఆత్మకూరు పోలీస్ స్టేషన్ పరిధిలో రహమత్ నగర్ కు చెందిన రాధా అనె మహిళ ఉదయం బ్యాంకుకు వెళ్లి తిరిగి 12 గంటలకు ఇంటికి చేరే సరికి తన కుమార్తె, మేనకోడలు లేరు. వెంటనే ఆమె ఫోన్ ద్వారా పోలీసులకు ఫిర్యాదు చేసింది. ఆత్మకూరు పోలీసులు బాలికల అదృశ్యం కేసు నమోదు చేశారు. జిల్లా ఎస్పీ సునిల్ షెరాన్ ఆదేశాలతో ఆత్మకూరు డీఎస్సీ రామంజి నాయక్ డైరక్షన్ లో ఆత్మకూరు పోలీసులు హుటాహుటిన ఆత్మకూరు బస్టాండ్ పరిసరాల ప్రాంతంలోని సీసీ కెమెరాలను పరిశీలించారు.
ఓ అఅనుమానిత వ్యక్తి ఫోన్ లొకేషన్ మేరకు నందికొట్కూరు ఆర్టీసీ బస్టాండ్ లో చెక్ చేశారు .అనంతరం కర్నూలు రైల్వే స్టేషన్ నుంచి రైలులో డోన్ కి వెళ్లారనే అనుమానంతో డోన్ సీఐ కి సమాచారం ఇచ్చారు. పోలీసులు సాంకేతిక పరిజ్ఞానాన్ని ఉపయోగించి సోమవారం రాత్రి 11 గంటలకు హైదరాబాద్ బస్టాండ్ లో ఈ బాలికల జాడను కనిపెట్టారు. హైదరాబాదులో పనిచేస్తున్న ఆత్మకూరు టౌన్ కి చెందిన వ్యక్తులతో మాట్లాడారు.
తక్షణమే బస్టాండ్ కి వెళ్లి బాలికలను వెతకాలని తెలిపారు. బస్టాండ్ లో బాలికల లోకేషన్ గుర్తించారు. వెంటనే 100 కి సీఐ ఫోన్ చేయించి హైదరాబాద్ పోలీసు ద్వారా అదుపులోకి తీసుకుని అవుట్ పోస్ట్ లో ఉంచారు. ఆత్మకూరు నుంచి బయలుదేరి హైదరాబాదుకు వెళ్లి ఆ బాలికలను హైదరాబాద్ నుంచి ఆత్మకూరు పోలీస్ స్టేషన్ కు తీసుకు వచ్చి తల్లిదండ్రులకు అప్పగించారు. కేసు నమోదు చేసిన 10 గంటల వ్యవధిలో ఇద్దరు బాలికలను హైదరాబాదులో గుర్తించి ఆ బాలికలను అప్పగించినందుకు తల్లిదండ్రులు కృతజ్ఞతలు తెలిపారు.
