తిరుమలయపాలెం మండలంలో పెరుగుతున్న నేరాలు
తిరుమలయపాలెం మండలంలో పెరుగుతున్న నేరాలు
పాలేరు,ఆంధ్రప్రభ: ఖమ్మం జిల్లా తిరుమలయపాలెం మండలంలో ఇటీవల నేర సంఘటనలు విపరీతంగా పెరుగుతున్నాయి. మండలంలోని పలు గ్రామాల్లో దాడులు, దొంగతనాలు, కొన్నిచోట్ల హత్యాయత్నాలు జరుగుతున్న ఘటనలు ప్రజలను తీవ్ర ఆందోళనకు గురిచేస్తున్నాయి. రోజుకో గ్రామంలో ఏదో ఒక ఘటన చోటుచేసుకుంటుండడంతో స్థానిక ప్రజలు భయభ్రాంతులకు గురవుతున్నారు.అధికార పార్టీ నాయకుల నుండి ఫోన్ కాల్ వచ్చిందా, స్టేషన్ కి, అంతే కేసు లేదు , బాధితులు ఏమైనా చేసుకోండి.
గ్రామాల్లో రాత్రి వేళల్లో పరిస్థితి మరింత భయంకరంగా మారుతోందని గ్రామస్తులు చెబుతున్నారు. కొన్ని గ్రామాల్లో దుండగులు స్వేచ్ఛగా తిరుగుతూ దాడులకు పాల్పడుతున్నారని, దొంగతనాలు కూడా పెరుగుతున్నాయని ప్రజలు ఆవేదన వ్యక్తం చేస్తున్నారు. ముఖ్యంగా ఇళ్లలోకి చొరబడి చోరీలు చేయడం, గొడవలు సృష్టించడం వంటి ఘటనలు పెరుగుతున్నాయని గ్రామస్థులు చెబుతున్నారు.
ప్రజల అభిప్రాయం ప్రకారం ఈ పరిస్థితులకు ప్రధాన కారణం లా అండ్ ఆర్డర్ వ్యవస్థ సరిగా పనిచేయకపోవడమేనని వారు అంటున్నారు. రాత్రి వేళల్లో పోలీసుల పెట్రోలింగ్ సరైన విధంగా లేకపోవడం వల్లే దుండగులు ధైర్యంగా నేరాలకు పాల్పడుతున్నారని ఆరోపిస్తున్నారు. నైట్ పహారా సరిగా ఉంటే ఇటువంటి ఘటనలు తగ్గే అవకాశముందని స్థానికులు భావిస్తున్నారు.
మండలంలోని కొన్ని గ్రామాల్లో గంజాయి మత్తులో ఇటీవల జరిగిన గొడవలు, దాడులు ప్రజల్లో భయాన్ని మరింత పెంచాయి. చిన్న చిన్న వివాదాలు కూడా పెద్ద గొడవలకు దారితీస్తున్నాయని గ్రామ పెద్దలు చెబుతున్నారు. కొన్ని చోట్ల వ్యక్తిగత వైరం, భూవివాదాలు కూడా ఈ దాడులకు కారణమవుతున్నాయనే అభిప్రాయం వ్యక్తమవుతోంది.
ప్రజలు చెబుతున్న మరో ముఖ్య విషయం ఏమిటంటే, దొంగతనాలు కూడా విపరీతంగా పెరిగాయని. రాత్రి సమయంలో ఇళ్ల ముందు నిలిపిన వాహనాలు, వ్యవసాయ పరికరాలు, ఇతర విలువైన వస్తువులు కనిపించకుండా పోతున్నాయని గ్రామస్థులు చెబుతున్నారు. ఈ ఘటనలపై పూర్తిస్థాయి విచారణ జరిపి నిందితులను పట్టుకోవాలని వారు డిమాండ్ చేస్తున్నారు.
ఈ పరిస్థితుల నేపథ్యంలో తిరుమలయపాలెం మండలంలో పోలీసు శాఖ ప్రత్యేక చర్యలు తీసుకోవాలని ప్రజలు కోరుతున్నారు. ముఖ్యంగా రాత్రి సమయంలో కఠినమైన పెట్రోలింగ్ నిర్వహించడం, అనుమానాస్పద వ్యక్తులపై నిఘా పెంచడం, గ్రామాల్లో అవగాహన కార్యక్రమాలు నిర్వహించడం అవసరమని స్థానికులు సూచిస్తున్నారు.
ఇలాంటి ఘటనలు కొనసాగితే ప్రజల భద్రత ప్రమాదంలో పడే అవకాశం ఉందని గ్రామస్థులు ఆందోళన వ్యక్తం చేస్తున్నారు. తిరుమలయపాలెం మండలంలో శాంతి భద్రతలు కాపాడేందుకు పోలీసులు తక్షణ చర్యలు తీసుకోవాలని ప్రజలు కోరుతున్నారు.
