పుష్కరిణి పునరుద్ధరణ పనులు..
- పరిశీలించిన మంత్రి వాకిటి శ్రీహరి
మక్తల్, (ఆంధ్రప్రభ) : మక్తల్ పట్టణంలో ప్రసిద్ధి చెందిన పడమటి ఆంజనేయ స్వామి పుష్కరిణి (కోనేరు) పునరుద్ధరణ పనులను ఆదివారం సాయంత్రం రాష్ట్ర పశుసంవర్దక క్రీడల శాఖ మంత్రి డాక్టర్ వాకిటి శ్రీహరి పరిశీలించారు. రానున్న డిసెంబర్ మాసంలో జరగనున్న పడమటి ఆంజనేయ స్వామి బ్రహ్మోత్సవాల సందర్భంగా పుష్కరిణి పునరుద్ధరించి భక్తులు పుష్కరిణిలో స్నానాలు ఆచరించడం కోసం పాటుబడిన పుష్కరిని పునరుద్దరించాలన్న తలంపుతో మంత్రి ప్రత్యేక శ్రద్ధతో పనులను గత నెలలో ప్రారంభించారు.
నెల రోజులుగా పునరుద్ధరణ పనులు కొనసాగుతున్నాయి. ఈ సందర్భంగా ఆదివారం మక్తల్ వచ్చిన మంత్రి… కోనేరు వద్దకు వెళ్లి పనులను పరిశీలించారు. ఈ సందర్భంగా మంత్రి వాకిటి శ్రీహరి కోనేరు పునరుద్ధరణ పనులపై దేవాదాశాఖ సిబ్బందికి అక్కడ పనిచేస్తున్న వర్కర్లకు పలు సూచనలు చేశారు.
దాదాపుగా పునరుద్ధరణ పనులు పూర్తి దశకు చేరుకున్నాయని మిగతా పనులను కూడా త్వరితగతిన పూర్తి చేయాలని ఆయన సూచించారు. ఏదైనా సమస్య ఉంటే నేరుగా తన దృష్టికి తీసుకువస్తే సమస్య పరిష్కారానికి కృషి చేస్తానని అన్నారు.
స్వామి బ్రహ్మోత్సవాలు నాటికి కోనేరును పునరుద్ధరించి భక్తులకు అందుబాటులోకి తేవడమే లక్ష్యంగా పనులు చేపడుతున్నామని అన్నారు. పనులకు భక్తులు పట్టణ ప్రజలందరూ కూడా సహకరించవలసిందిగా ఈ సందర్భంగా మంత్రి వాకిటి శ్రీహరి విజ్ఞప్తి చేశారు. మంత్రి వెంబడి మాజీ జెడ్పిటిసి జి. లక్ష్మారెడ్డి కాంగ్రెస్ నాయకులు బోయ రవికుమార్, వాకిటి శ్యామ్, వాకిటి హనుమంతు, ఆలయ సిబ్బంది కుమ్మరి శ్రీనివాస్ తదితరులు ఉన్నారు.
