past2future | సోషల్ వెట్టింగ్ ప్రభావం.. మీ భవిష్యత్తు మీ చేతుల్లోనే!

past2future | సోషల్ వెట్టింగ్ అంటే ఏమిటి?
వీసా ప్రక్రియలో సోషల్ మీడియా ప్రాధాన్యం
ఉద్యోగాల్లో సోషల్ మీడియా ప్రభావం
పెళ్లి సంబంధాల్లో కొత్త ట్రెండ్
జాగ్రత్తగా వాడితేనే భవిష్యత్తు సురక్షితం

past2future | ఆంధ్రప్రభ వెబ్ డెస్క్: పూర్వం పెళ్లి సంబంధం నిశ్చయించుకోవాలన్నా లేదా ఒకరికి ఉద్యోగం ఇవ్వాలన్నా.. వారి ఊరు వెళ్లి, తెలిసిన వారిని అడిగి వారి గుణగణాలను విచారించేవారు. కానీ ఇప్పుడు కాలం మారింది. ఇప్పుడు ఎవరి గురించి తెలుసుకోవాలన్నా వారి సోషల్ మీడియా ఖాతాలను ఒకసారి పరిశీలిస్తే చాలు. దీన్నే టెక్నాలజీ భాషలో ‘సోషల్ వెట్టింగ్’ (Social Vetting) అంటున్నారు. మనం ఫేస్‌బుక్, ఇన్‌స్టాగ్రామ్ లేదా ఎక్స్ (ట్విట్టర్)లో పెట్టే ప్రతి లైక్, చేసే ప్రతి కామెంట్, షేర్ చేసే ప్రతి ఫోటో మన వ్యక్తిత్వానికి అద్దం పడుతున్నాయి. మనకు తెలియకుండానే మనం వదిలిపెడుతున్న ఈ డిజిటల్ అడుగుజాడలు మన భవిష్యత్తును నిర్ణయిస్తున్నాయి.

కేవలం ఉద్యోగాలకే కాదు, ఇప్పుడు విదేశీ ప్రయాణాలకు కూడా మీ సోషల్ మీడియా ప్రొఫైల్ అగ్నిపరీక్షగా మారింది. ముఖ్యంగా అమెరికా వీసాల విషయంలో అగ్రరాజ్యం నిబంధనలను మరింత కఠినతరం చేస్తోంది. గతంలో కొన్ని కేటగిరీలకే పరిమితమైన ఈ సోషల్ వెట్టింగ్‌ను, ఇప్పుడు మరికొన్ని కీలక వీసా కేటగిరీలకు కూడా వర్తింపజేయబోతోంది. అంటే, మీరు వీసా ఇంటర్వ్యూకి వెళ్ళేముందే మీ గత ఐదేళ్ల సోషల్ మీడియా హిస్టరీని అధికారులు క్షుణ్ణంగా పరిశీలిస్తారు. మీరు చేసే పోస్ట్‌లు అమెరికా భద్రతకు లేదా వారి విధానాలకు వ్యతిరేకంగా ఉన్నాయని భావిస్తే, మీ వీసా తిరస్కరణకు గురయ్యే ప్రమాదం ఉంది.

ప్రస్తుతం కార్పొరేట్ కంపెనీలు అభ్యర్థుల రెజ్యూమే కంటే వారి సోషల్ మీడియా ప్రొఫైల్స్‌కే ఎక్కువ ప్రాధాన్యత ఇస్తున్నాయి. ఒక సర్వే ప్రకారం, 70% కంటే ఎక్కువ కంపెనీలు నియామకానికి ముందే అభ్యర్థి ఆన్‌లైన్ ప్రవర్తనను తనిఖీ చేస్తున్నాయి. ఆఫీసులో ఇతరులతో కలిసి పనిచేసే గుణం ఉందా? వివాదాస్పద అంశాలపై ఎలా స్పందిస్తున్నారు? అనే అంశాలను బట్టి వారిని జడ్జ్ చేస్తున్నారు. ఆవేశంలో మీరు గతంలో చేసిన ఒక తప్పుడు పోస్ట్ మీ కెరీర్‌కు అడ్డుగోడగా మారవచ్చు. ఇది కేవలం ఉద్యోగాలకే కాదు, పెళ్లి సంబంధాల విషయంలోనూ కీలకంగా మారింది. ఫొటోలు చూసుకోవడానికి ముందే.. అబ్బాయి లేదా అమ్మాయి ఇన్‌స్టాగ్రామ్ ఐడీ అడిగి తెలుసుకుంటున్నారు.

జాతకాలు కలవకపోయినా పర్వాలేదు కానీ, సోషల్ మీడియా థాట్స్ కలవకపోతే సంబంధాలు అక్కడితోనే ముగిసిపోతున్నాయి. అయితే, సోషల్ వెట్టింగ్ వల్ల కొన్ని లాభాలు ఉన్నప్పటికీ, ప్రమాదాలు కూడా పొంచి ఉన్నాయి. ఒక వ్యక్తిని వారి సోషల్ మీడియా పోస్టుల ఆధారంగానే పూర్తిగా అంచనా వేయడం ఒక్కోసారి తప్పుడు నిర్ణయాలకు దారి తీయవచ్చు. అలాగే వ్యక్తిగత గోప్యత (Privacy) కు భంగం కలిగే అవకాశం ఉంది. అందుకే మనం డిజిటల్ ప్రపంచంలో చాలా జాగ్రత్తగా అడుగులు వేయాలి.

మీ వ్యక్తిగత ఫోటోలు, విషయాలు అందరికీ కనిపించకుండా ప్రైవేట్ మోడ్‌లో ఉంచుకోవడం, ఏదైనా పోస్ట్ చేసే ముందు అది మీ గౌరవానికి భంగం కలిగిస్తుందేమోనని ఆలోచించడం ఇప్పుడు అనివార్యమైంది. మీ పాత పోస్టుల్లో ఏవైనా అభ్యంతరకరంగా ఉంటే వాటిని వెంటనే తొలగించడం, ఇతరుల పోస్టులపై కామెంట్ చేసేటప్పుడు సంస్కారవంతమైన భాషను వాడటం ఉత్తమం. సోషల్ మీడియా అనేది కేవలం కాలక్షేపం కోసం మాత్రమే కాదు.. అది మీ డిజిటల్ ఐడెంటిటీ. మీరు ఇంటర్నెట్‌లో చేసే ప్రతి పని మీ చరిత్రగా మిగిలిపోతుంది అని గుర్తుంచుకోండి. అందుకే మీ ప్రొఫైల్‌ను ఒక ప్రొఫెషనల్ సర్టిఫికెట్‌లా తీర్చిదిద్దుకోండి.