Newborn | పొద‌ల్లో దొరికిన నవజాత శిశువు బ‌తికింది…
- 108 సిబ్బందికి కృతజ్ఞతలు తెలిపిన గ్రామ‌స్థులు
Newborn | నారాయణపేట ప్రతినిధి, ఆంధ్ర‌ప్ర‌భ : ముళ్ల పొద‌ల్లో దొరికిన నవజాత శిశు (Newborn baby) ను బ‌తికించ‌డానికి 108 సిబ్బంది శ్ర‌మ‌కు ఫ‌లితం ద‌క్కింది. నవజాత శిశువు బ‌తికింద‌ని తెలియ‌డంతో ఆ గ్రామ‌స్థులు (Villagers) ఆనందం వ్య‌క్తం చేస్తూ సిబ్బందికి కృతజ్ఞతలు తెలిపారు. నారాయణపేట మండలం అప్పక్‌పల్లి గ్రామం (Appakpally village) కాటన్ మిల్లుకు స‌మీపాన ఉన్న ముళ్లపొదల్లో నవజాత ఆడ శిశువు ఏడ్పు వినిపించ‌డంతో గ్రామ‌స్థులు అక్క‌డ‌కు చేరుకుని 108 అంబులెన్స్‌కు సమాచారం ఇచ్చారు. సమాచారం అందుకున్న వెంటనే 108 సిబ్బంది వేగంగా ఘటనాస్థలానికి చేరుకున్నారు. ముళ్లపొదల్లో చిన్న గాయాలతో, శ్వాస తీసుకోవడంలో ఇబ్బంది పడుతున్న శిశువును చూసి వారు చలించిపోయారు.
అంబులెన్స్ టెక్నీషియన్ శిరీష వెంటనే శిశువుకు ప్రథమ చికిత్స అందించారు. ఆక్సిజన్ (Oxygen) ఇవ్వడంతోపాటు నవజాత శిశువు సంరక్షణకు అవసరమైన అత్యవసర చికిత్స పద్ధతులను అంబులెన్స్ (Ambulance) లోనే చేశారు. అనంతరం శిశువును దగ్గరలోని నారాయణపేట జిల్లా ఆసుపత్రికి తరలించారు. అక్కడ విధుల్లో ఉన్న డాక్టర్ మహేందర్ శిశువును పరీక్షించి, ప్రస్తుతం ఆరోగ్యం మెరుగ్గానే ఉందని తెలిపారు. సమయానుసారంగా స్పందించి ప్రాణాన్ని కాపాడిన 108 సిబ్బందికి ఆ గ్రామ‌స్థులు కృతజ్ఞతలు తెలిపారు.
