దోమల డ్యాన్స్..డ్యాన్స్
- బయట చెత్త .. ఇంట్లో మస్కిటో మోత
- విషజ్వరాలు తాండవం
- ఆసుపత్రులకు జనం పరుగో పరుగు
- ఇదీ నెల్లూరు కథాకమామిషు
Diseases | నెల్లూరు, ఆంధ్రప్రభ ప్రతినిధి : శ్రీ పొట్టి శ్రీరాములు నెల్లూరు జిల్లాలో దోమలు ప్రజలను కంటి మీద కునుకు లేకుండా చేస్తున్నాయి. సీజనల్ వ్యాధులతోపాటు ప్రమాదకరమైన జపనీస్ ఎన్సెఫలైటిస్, పసుపు జ్వరం, జికా వైరస్లు అప్పుడప్పుడూ ప్రజలపై దాడి చేస్తున్నాయి. ఈ జబ్బులకు గురైన పలువురు చికిత్సకు స్పందించక చనిపోతున్నారు. కొద్దిరోజులుగా చిరుజల్లులు కురుస్తూనే ఉన్నాయి. వర్షపునీరు ఖాళీ ప్రదేశాల్లో నిల్వ చేరింది. నెల్లూరు నగరంలో ఖాళీ ప్లాట్లు, మురుగు కాలువలు దోమలకు ఆవాసాలుగా మారాయి. ప్రభుత్వ, ప్రైవేట్ హాస్పిటళ్లలో జ్వరపీడితుల సంఖ్య పెరిగింది.డెంగీ, మలేరియా తదితర విష జ్వరాలతో బాధితులు ఆస్పత్రులకు పరుగులు తీస్తున్నారు.
ఆస్పత్రులకు జనం పరుగులు
జిల్లాలో 52 పీహెచ్సీలు, 10 సీహెచ్సీలు, 28 పట్టణ ఆరోగ్య కేంద్రాలు, ఒక జిల్లా ఆస్పత్రి, రెండు ఏరియా ఆస్పత్రులు, నగరంలో మెడికల్ కళాశాలకు అనుబంధంగా సర్వజన ఆస్పత్రి ప్రభుత్వ ఆధ్వర్యంలో నడుస్తున్నాయి. 450 వరకు కార్పొరేట్, ప్రైవేట్ ఆస్పత్రులు, క్లినిక్లు నడుస్తున్నాయి. అన్నిచోట్లా రోగులు పెరుగుతున్నారు. రామచంద్రారెడ్డి, జయభారత్, నారాయణ,మెడికవర్ ఇలా పలు హాస్పిటళ్లలో డెంగీ కేసులు క్రమేపీ పెరుగుతున్నాయి. అయితే ప్రైవేట్లో చేసే పరీక్షలను వైద్యశాఖ అంగీకరించడం లేదు.
ప్రభుత్వాస్పత్రిలో చేసే ఎలీసా టెస్ట్లో పాజిటివ్ వస్తేనే డెంగీ లాంటి జబ్బులను అంగీకరిస్తున్నారు. దీంతో వైద్యశాఖలో డెంగీ, మలేరియా కేసులు లేనట్టు.. ఒకటో రెండో వచ్చినట్టు కాకి లెక్కలు రాస్తున్నారు. గత సంవత్సరంలో డెంగీ 130, మలేరియా 6, చికున్జున్యా 2 కేసులు నమోదయ్యాయి. ఈ ఏడాదిలో జూలై నెల వరకు డెంగీ 19, మలేరియా 3, చికున్తున్యా 2 కేసులు వచ్చినట్లు అధికారులు చెబుతున్నారు.
నివారణకు తీసుకోవాల్సిన చర్యలు
ఇంట్లో, ఆవరణలో నీరు నిల్వ ఉండకుండా చూసుకోవాలి. పాత టైర్లు, పూలకుండీలు, డ్రమ్ములు వంటి వాటిలో నీరు ఉంటే పారబోయాలి. మురికి కూపాలు, చెత్తాచెదారం లేకుండా చూసుకోవాలి. ఇంటి పరిసరాలను శుభ్రంగా ఉంచుకోవాలి. ఇంట్లోకి దోమలు రాకుండా కిటికీలకు జాలీలు ఏర్పాటు చేసుకోవాలి. దోమతెరలు వాడాలి. దోమల నియంత్రణకు స్ప్రేలు వినియోగించాలి. అలాగే తులసి, వేప లాంటి పెంచడం ద్వారా కొంతమేరకు దోమలను తగ్గించుకోవచ్చు.
చర్యలు తీసుకున్నాం.. డీఎంవో హుస్సేనమ్మ
జిల్లాలో దోమల నిర్మూలనకు పెద్ద ఎత్తున కార్యక్రమాలు చేపట్టామని జిల్లా మలేరియా నివారణ అధికారి డాక్టర్ హుస్సేనమ్మ తెలిపారు. అన్ని హాస్టళ్లలో మలాథియాన్ స్ప్రే చేశాం. నీటి గుంతల్లో దోమ లార్వాలను తినే గంబూసియా చేపలను వదిలిపెడుతున్నాం. ఫ్రైడే డ్రైడే కార్యక్రమంలో భాగంగా ఆశా కార్యకర్తలు, ఏఎన్ఎంలు, హెల్త్ అసిస్టెంట్లు ప్రజల వద్దకు అవగాహన కల్పిస్తున్నారు. ఎక్కడైనా మలేరియా, డెంగీ కేసులు నమోదైనట్టు తెలిస్నే ఆ ప్రాంతానికి చుట్టుపక్కల కిలోమీటర్ పరిధిలో పారిశుధ్య కార్యక్రమాలు చేపడుతున్నామని ఆమె తెలిపారు.
