కారణాలు తెలుసుకోండి..
తిండి తినడం ఎంత ముఖ్యమో, టైంకి తినడం కూడా అంతకన్న ముఖ్యం. అలా కాకుండా ఒక్కోపూట ఒక్కో టైం కి తినడం.. ఒకరోజు బాగా ఫుల్ గా తినడం… మరో రోజు కొద్దిగానే తిని సరిపుచ్చుకోవడం ఆరోగ్యానికి మంచిది కాదు. ఇలాంటి అలవాట్లు జీర్ణవ్యవస్థపై ప్రభావం చూపుతాయి.
ఆకలి లేదంటూ చాలామంది బ్రేక్ ఫాస్ట్ ని, లంచ్, డిన్నర్ లను స్కిప్ చెసేస్తుంటారు. కొన్నిసార్లు ఆకలి తగ్గడం సహజమే అయినప్పటికీ, ఈ సమస్య ఎక్కువ రోజులు కొనసాగితే శరీరానికి తగిన పోషకాలు అందక, బలహీనతకు దారితీస్తుంది.
స్ట్రెస్, జలుబు, గ్యాస్, మందులు, నిద్రలేమి, ఇవన్నీ ఆకలి తగ్గడానికి కారణాలు కావచ్చు. ఇలాంటి సమయంలో కొన్ని సహజమైన కొన్ని పదార్థాలు తినడం వల్ల ఆకలి మళ్లీ సహజ స్థాయికి వస్తుంది.
ఆకలి లేనప్పుడు పోషకాలు అందకపోతే, రోగనిరోధక శక్తి కూడా తగ్గుతుంది. అందుకే, ఈ సమస్యను దీర్ఘకాలంగా విస్మరించకూడదు. ఇలాంటి పరిస్థితిలో మందులపై ఆధారపడకుండా, కొన్ని సహజమైన ఆహార పదార్థాలను తీసుకోవడం ద్వారా ఆకలిని తిరిగి సాధారణ స్థాయికి తీసుకురావచ్చు.
ఆకలిని పెంచే అద్భుతమైన సహజ ఆహారాలు
ఆకలిని పెంచి, జీర్ణక్రియను మెరుగుపరిచే కొన్ని ప్రభావవంతమైన ఆహార పదార్థాల గురించి తెలుసుకుందాం:
- అల్లం:
అల్లం జీర్ణక్రియను చురుకుగా ఉంచడంలో, ఆకలిని పెంచడంలో అద్భుతంగా పనిచేస్తుంది. ఉదయం వేళ గోరువెచ్చని నీటిలో కొద్దిగా అల్లం రసం, తేనె కలిపి తీసుకుంటే జీర్ణవ్యవస్థ శుభ్రపడి, ఆకలి పుడుతుంది. - నిమ్మరసం , తేనె:
నిమ్మరసం సహజంగా జీర్ణక్రియకు సహాయపడుతుంది. దీనిని తేనెతో కలిపి తీసుకుంటే రుచిగా ఉండటమే కాక, శక్తినిచ్చే రిఫ్రెష్ డ్రింక్గా పనిచేస్తుంది. ఆకలి లేని వారికి ఇది మంచి ఉపశమనాన్ని ఇస్తుంది. - పెరుగు, మజ్జిగ:
చల్లగా, తేలికగా ఉండే పెరుగు, మజ్జిగ వంటివి కడుపు వేడిని తగ్గిస్తాయి. వీటిలోని మంచి బ్యాక్టీరియా జీర్ణక్రియను సులభతరం చేసి, త్వరగా ఆకలి వేసేలా చేస్తుంది. - పప్పులు, సూప్లు:
పప్పు సూప్లు లేదా తేలికపాటి వెజిటబుల్ సూప్లు త్వరగా జీర్ణమవుతాయి. ఇవి కడుపుకు తేలికగా ఉండి, ఆకలి భావనను రేకెత్తిస్తాయి. - పండ్లు:
బొప్పాయి, అనాస, మామిడి, ద్రాక్ష వంటి పండ్లు జీర్ణ ఎంజైములను కలిగి ఉంటాయి. ఇవి జీర్ణక్రియను వేగవంతం చేసి, సహజంగా ఆకలిని పెంచుతాయి. - జీలకర్ర, నల్ల ఉప్పు:
ఈ రెండు మసాలాలు కడుపులో జీర్ణరసాల ఉత్పత్తిని పెంచి, ఆకలిని పుట్టిస్తాయి. భోజనానికి ముందు కొద్దిగా జీలకర్ర పొడి, నల్ల ఉప్పును నీటితో కలిపి తీసుకుంటే మంచి ఫలితం ఉంటుంది. - మిరియాల పొడి:
తక్కువ మోతాదులో మిరియాల పొడిని ఆహారంలో చేర్చడం వల్ల జీర్ణక్రియ మెరుగుపడి, ఆకలి కలుగుతుంది.
అంతేకాక రోజువారీ అలవాట్లలో మార్పులు చేసుకోవాలి…అవేమిటంటే…
ఆహార మార్పులతో పాటు, రోజువారీ జీవనశైలిలో కొన్ని మార్పులు చేసుకోవడం చాలా అవసరం. ప్రతిరోజూ నిర్దిష్ట సమయాల్లో భోజనం చేయడం వల్ల జీర్ణవ్యవస్థ ఒక క్రమశిక్షణకు అలవాటుపడుతుంది. తరచుగా టైమ్ మార్చడం వల్ల జీర్ణక్రియ దెబ్బతిని ఆకలి తగ్గిపోతుంది. భోజనం తినే ముందు కొద్దిసేపు వాకింగ్ లేదా యోగా చేయడం వల్ల ఆకలి పెరుగుతుంది. శారీరక శ్రమ జీర్ణవ్యవస్థను చురుకుగా ఉంచుతుంది. టెన్షన్ లేదా అధిక ఒత్తిడి ఆకలిని తగ్గించే ప్రధాన కారకాలు. వీలైనంత వరకు మనసును శాంతంగా, ప్రశాంతంగా ఉంచుకోవడానికి ప్రయత్నించాలి. తగినంత నిద్ర లేకపోవడం, రాత్రిళ్లు ఎక్కువసేపు మేల్కోవడం వంటివి జీర్ణక్రియను దెబ్బతీస్తాయి. నిద్రలేమి సమస్యను పరిష్కరించుకుంటే ఆకలి మెరుగుపడుతుంది.
ఆకలి పెంచే ప్రత్యేక డ్రింక్ చిట్కా..
మందగించిన ఆకలిని మళ్లీ పెంచుకునేందుకు ఇంట్లోనే ఈ సహజమైన డ్రింక్ను ప్రయత్నించవచ్చు. ఒక గ్లాసు గోరువెచ్చని నీరు తీసుకుని, అందులో ఒక టీస్పూన్ నిమ్మరసం, అర టీస్పూన్ తేనె, చిటికెడు జీలకర్ర పొడి కలిపి ఉదయం ఖాళీ కడుపుతో తాగాలి. ఇది జీర్ణక్రియను చురుకుగా చేసి, ఆకలిని సహజంగా పుట్టిస్తుంది.
ముఖ్యంగా గుర్తుంచుకోవాల్సిన విషయం ఏమిటంటే, ఆకలి తగ్గినప్పుడు తక్షణ మందులకన్నా సహజమైన ఆహార పద్ధతులను అనుసరించడం ఎల్లప్పుడూ ఉత్తమం. అల్లం, నిమ్మరసం, పెరుగు, పండ్లు వంటి ఈ సహజసిద్ధమైన ఆహారాలు ఆకలిని కలిగించి, మీ శరీరాన్ని ఆరోగ్యంగా ఉంచడంలో సహాయపడతాయి.
