Indrakeeladri | సుబ్రహ్మణ్యేశ్వర స్వామి కళ్యాణం..
Indrakeeladri | విజయవాడ, ఆంధ్రప్రభ : ఇంద్రకీలాద్రి పై ప్రతినెల శుద్ధ షష్టిని పురస్కరించుకుని శ్రీ వల్లి దేవసేన సమేత సుబ్రహ్మణ్య స్వామి వారికి జరిగే కళ్యాణం, ప్రత్యేక పూజా కార్యక్రమాలు ఘనంగా జరిగాయి. ఇంద్రకీలాద్రి (Indrakeeladri) పై మహా మండపం ఏడో అంతస్తు వద్ద జరిగిన ఈ పూజా కార్యక్రమాల్లో కార్యనిర్వహణాధికారి శ్రీనా నాయక్ పాల్గొని ప్రత్యేక పూజలు నిర్వహించారు. శ్రీ వల్లి దేవసేన సమేత సుబ్రహ్మణ్య స్వామి వార్ల కల్యాణం, స్వామివారికి పంచామృత అభిషేకం, విశేష అర్చన పూజలు నిర్వహించారు.
ఈ సందర్భంగా ఈవో మాట్లాడుతూ.. ఇంద్రకీలాద్రి పై ప్రతి నెల శుద్ధ షష్టిని పురస్కరించుకుని శ్రీ వల్లి (Sri valli) దేవసేన సమేత సుబ్రహ్మణ్య స్వామికి జరిగే కళ్యాణం, ప్రత్యేక పూజలు ప్రత్యేక ప్రాధాన్యతను కలిగి ఉన్నాయన్నారు. వివాహం లేదా సంతానం కోసం ఎదురుచూస్తున్న వారికి, మంచి ఆరోగ్యం, విజయం శ్రేయస్సును ప్రసాదిస్తుందని భక్తులు స్వామి వారి ఆశీస్సులు పొందడానికి ఈ పూజలు ముఖ్యమన్నారు. ఈ పూజా కార్యక్రమం ఆలయ పాలక మండలి సభ్యులు ఆలయ కార్య నిర్వహణ అధికారి ఆలయ అర్చకులు, సిబ్బంది, సహకారంతో విశేషంగా పూజ కార్యక్రమం జరిగింది. భక్తులకు ఎలాంటి అసౌకర్యం కలగకుండా అన్ని ఏర్పాట్లు చేసినట్లు ఆలయ అధికారులు తెలిపారు. భక్తులకు తీర్థ ప్రసాదాలు అందజేశారు.
