Kurnool | అక్రమం..ఇక సక్రమం
కర్నూలులో స్పెషల్ డ్రైవ్
బీపీఎస్–ఎల్ఆర్ఎస్ పై ఫోకస్
Kurnool | కర్నూలు, ఆంధ్రప్రభ బ్యూరో : కర్నూలు నగరంలో అనధికార నిర్మాణాల క్రమబద్ధీకరణ కోసం ప్రభుత్వం (GOVT) విడుదల చేసిన బిల్డింగ్ పీనలైజేషన్ స్కీమ్, అనధికార లేఅవుట్ల క్రమబద్ధీకరణ కోసం ఎల్ఆర్ఎస్–2020 పొడిగింపు పథకాలపై ప్రజల్లో విస్తృతంగా చైతన్యం కలిగించేందుకు పట్టణ ప్రణాళిక అధికారులు, ప్లానింగ్ కార్యదర్శులు క్షేత్ర స్థాయిలో ఇంటింటికీ తిరగాలని నగరపాలక సంస్థ కమిషనర్ పి.విశ్వనాథ్ ఆదేశించారు. అనధికార నిర్మాణాలను, లేఅవుట్లను గుర్తించి నోటిసులు జారీ వేగవంతం చేయాలని సూచించారు. సోమవారం నుంచి ప్రతి సచివాలయ పరిధిలో ప్రత్యేక డ్రైవ్‌ను నిర్వహించాలి ప్రజల్లో విస్తృత అవగాహన కల్పించాలని పేర్కొన్నారు. ఆదివారం పట్టణ ప్రణాళిక అధికారులు, ప్లానింగ్ కార్యదర్శులతో కమిషనర్ టెలి కాన్ఫరెన్స్ నిర్వహించి, దిశానిర్దేశం చేశారు.
నగర అభివృద్ధి, ప్రజల భద్రత, చట్టబద్ధత కోసం ప్రజలందరూ సహకరించాలని కమిషనర్ విజ్ఞప్తి చేశారు. ఈ రెండు పథకాలు ద్వారా నగర ప్రజలు తమ గృహాలు, భూములకు పూర్తి చట్టబద్ధతను పొందే అవకాశం కలుగుతోందని, బీపీఎస్(BPS) –2025 ద్వారా అనుమతి లేకుండా కట్టిన బిల్డింగ్స్ లేదా డివియేషన్ ఉన్న నిర్మాణాలను ఒకేసారి రెగ్యులరైజ్ చేసుకునే అవకాశం కల్పించిందని తెలిపారు. 01-01-1985 నుండి 31-08-2025 మధ్య నిర్మితమైన బిల్డింగ్స్ అర్హులని, కానీ ప్రభుత్వ భూములు, ఎండోవ్మెంట్స్, నది–వాగు–సాగర్ ప్రాంతాలు, మాస్టర్ ప్లాన్‌లో రోడ్/ఓపెన్ స్పేస్‌గా ఉన్న భూములు, 31-08-2025 తర్వాత కట్టిన నిర్మాణాలు, సెట్‌బ్యాక్‌లు ఉల్లంఘించిన భవనాలు అర్హులు కాదని తెలిపారు. అప్లికేషన్ సమయంలో రూ.10 వేలుముందస్తు చెల్లింపు అవసరమని, పాత భవనాలకు 25 శాతం తగ్గింపు, స్లమ్ ప్రాంతాలకు 50 శాతం తగ్గింపు ఉంటుందని పేర్కొన్నారు.
అలాగే ఎల్ఆర్ఎస్ (LRS) పథకానికి సంబంధించి 30-06-2025 లోపు ఉన్న అనధికార లేఅవుట్లు, ప్లాట్లకు మాత్రమే క్రమబద్ధీకరణ అవకాశం ఉందని కమిషనర్ తెలిపారు. ఎల్ఆర్ఎస్ ద్వారా ప్లాట్‌కు చట్టబద్ధత, రుణ సదుపాయం, భవిష్యత్ అభివృద్ధి పనుల ప్రయోజనాలు లభిస్తాయని పేర్కొన్నారు. రెండు పథకాలకూ సంబంధించి ప్రజలు గడువు ముగియక ముందే తప్పనిసరిగా దరఖాస్తులు సమర్పించాలని, ఇది ప్రభుత్వం ఇచ్చిన తుది అవకాశం అని స్పష్టం చేశారు.
