TG | పేదల ఇళ్లు కూల్చుతామంటే అడ్డం ప‌డ‌తా.. దానం నాగేందర్
- పేదల జోలికి వ‌స్తే ఊరుకునేది లేదన్న దానం నాగేందర్
- వైఎస్ హయాంలోనే కాంప్రమైజ్ కాలేదన్న ఎమ్మెల్యే
- ఇప్పటికే తనపై 173 కేసులు ఉన్నాయి
- నా ఇంట్లో వైఎస్, కేసీఆర్ ఫొటోలు ఉన్నాయి
హైద‌రాబాద్ – ఆంధ్ర‌ప్ర‌భ : నగరంలోని పేదల ఇళ్లను కూల్చివేస్తామంటే చూస్తూ ఊరుకునేది లేదని ఖైరతాబాద్ ఎమ్మెల్యే, కాంగ్రెస్ నేత దానం నాగేందర్ అన్నారు. హైడ్రా అధికారుల విషయంలోనూ వెనక్కి తగ్గేది లేదని ఆయన స్పష్టం చేశారు. ఆయన నేడు మీడియాతో మాట్లాడుతూ…. వైఎస్ రాజశేఖర రెడ్డి హయాంలోనే తాను అధికారుల విషయంలో రాజీ పడలేదన్నారు. అవసరమైతే జైలుకు కూడా వెళ్తానని, ఇప్పటికే తనపై 173కేసులు ఉన్నాయని ఆయన తెలిపారు. ప్రభుత్వం ప్రతిష్ఠాత్మకంగా చేపట్టిన హైడ్రా ఆపరేషన్ విషయంలో దానం అసహనం వ్యక్తం చేశారు.
తన ఇంట్లో వైఎస్ రాజశేఖర రెడ్డి, కేసీఆర్ ఫొటోలు ఉన్నాయని, వారి ఫొటోలు ఉంటే తప్పేమిటని ప్రశ్నించారు. నాయకుల విషయంలో ఎవరి అభిప్రాయం వారికి ఉంటుందన్నారు. పార్టీ ఫిరాయించిన ఎమ్మెల్యేలకు అసెంబ్లీ కార్యదర్శి నోటీసులు పంపించిన విషయాన్ని మీడియా ప్రతినిధులు ప్రస్తావించగా, ఇప్పటి వరకు తనకు ఎలాంటి నోటీసులు రాలేదన్నారు. నోటీసులు వచ్చాక స్పందిస్తానని తెలిపారు.
