హైద‌రాబాద్, ఆంధ్ర‌ప్ర‌భ : న‌గ‌రంలోని ఉప్పల్ స్టేడియం (Uppal Stadium) లో హైద‌రాబాద్ క్రికెట్ అసోసియేష‌న్ (హెచ్‌సీఏ) ((HCA) స‌మావేశాన్ని శ‌నివారం ఏర్పాటు చేసింది. ఈ స‌మావేశం నేప‌థ్యంలో ఎలాంటి అవాంఛ‌నీయ సంఘ‌ట‌న‌లు జ‌ర‌గ‌కుండా భారీ పోలీసు బందోబస్తు (Heavy police deployment) ఏర్పాటు చేశారు. అయితే కొత్త క్ల‌బ్‌ల‌కు స‌మావేశంలో క‌ల్పిపించాల‌ని తెలంగాణ క్రికెట్ జాయింట్ యాక్ష‌న్ క‌మిటీ (టీసీజేఏసీ) (TCJAC) డిమాండ్ చేస్తూ స్టేడియంలోకి ప్ర‌వేశించ‌డానికి ప్ర‌య‌త్నించ‌డంతో పోలీసులు అడ్డుకున్నారు. ఈ క్ర‌మంలో ఉప్పల్ స్టేడియం వ‌ద్ద ఉద్రిక్త‌త చోటుచేసుకుంది.
173 క్లబ్ కార్య‌ద‌ర్శుల‌తో స‌మావేశం..
ఉప్పల్ స్టేడియం ప్ర‌ధాన కార్యాల‌యంలో సమావేశానికి 173 క్లబ్ కార్య‌ద‌ర్శులకు హైద‌రాబాద్ క్రికెట్ అసోసియేష‌న్ (Hyderabad Cricket Association) అనుమతి ఇచ్చింది. అయితే ఈ సమావేశానికి అనుమతి ఉన్న క్రికెట్ క్లబ్ సెక్రెటరీలను మాత్రమే లోపలికి పంపుతున్నారు. అనుమతి పొందిన 173 క్రికెట్ క్లబ్స్ సెక్రటరీలకు మాత్రమే స్టేడియంలోకి వెళ్లారు.
300 క్ల‌బ్‌ల‌కు అవ‌కాశం ఇవ్వాల‌ని టీసీజేఏసీ..
హైద‌రాబాద్ క్రికెట్ అసోసియేష‌న్ (హెచ్‌సీఏ)లో మూడు వంద‌ల క్ల‌బ్‌ల‌కు అవ‌కాశం ఇవ్వాల‌ని గత కొంత కాలంగా తెలంగాణ క్రికెట్ జాయింట్ యాక్ష‌న్ క‌మిటీ కోరుతుంది. అయినా హెచ్‌సీఏ ప‌ట్టించుకోలేదు. ఇప్ప‌టి వ‌ర‌కూ ఉన్న 173 క్ల‌బ్‌ల‌ను మాత్రమే కొన‌సాగిస్తామ‌ని చెప్పింది. దీంతో ఆగ్ర‌హించిన టీసీజేఏసీ స‌భ్యులు స‌మావేశాన్ని అడ్డుకోవ‌డానికి స్టేడియం వ‌ద్ద‌కు చేరుకున్నారు.
ఉద్రిక్త‌త ప‌రిస్థితి..
ఉప్పల్ స్టేడియంలో హెచ్‌సీఏ స‌మావేశాన్ని అడ్డుకోవ‌డానికి పెద్ద సంఖ్య‌లో టీసీజేఏసీ స‌భ్యులు చేరుకున్నారు. స‌మావేశం నిర్వ‌హిస్తున్న ఉప్పల్ స్టేడియం ప్ర‌ధాన కార్యాల‌యంలోకి దూసుకుపోవ‌డానికి ప‌లు మార్లు ప్ర‌య‌త్నం చేశారు. అప్ప‌టికే ఏర్పాటు చేసిన పోలీసు బందోబస్తు వీరి ప్ర‌య‌త్నాల‌ను అడ్డుకుంది. దీంతో ఉద్రిక‌త్త‌త చోటు చేసుకుంది. రాచకొండ కమిషనర్ సుధీర్ బాబు ఆధ్వర్యంలో స్టేడియం పరిసర ప్రాంతాల్లో భారీ బందోబస్తు ఏర్పాటు చేశారు.
