Expulsion | ఓరుగల్లు నుంచి రౌడీ షీటర్ బహిష్కరణ

Expulsion | ఓరుగల్లు నుంచి రౌడీ షీటర్ బహిష్కరణ

• ఆరు మాసాల పాటు నగర బహిష్కరణ
• రౌడీయిజంపై ఉక్కుపాదం మోపుతున్న పోలీసులు
• అరుదైన నిర్ణయం తీసుకున్న సిపి సన్ ప్రీత్ సింగ్
• శాంతిభద్రతలకు భంగం కలిగిస్తే ఇక వేటే
• పోలీస్ కమిషనరేట్ పరిధి నుండి బహిష్కరించిన సీపీ

Expulsion | వరంగల్ క్రైమ్, ఆంధ్రప్రభ : రౌడీయిజంపై వరంగల్ కమీషనరేట్ పోలీసులు ఉక్కుపాదం మోపుతున్నారు. శాంతిభద్రతలకు భంగం కలిగించే రౌడీషీటర్ల చర్యలు,చేష్టలను ఇక నుండి సహించబోమని చాటి చెప్పే ప్రయత్నాలు ప్రారంభించారు. ఇక నుండి ఎవ్వరు చట్టాన్ని ఉల్లంఘించినా కఠిన చర్యలు తప్పవని వరంగల్ పోలీస్ కమిషనర్ సన్ ప్రీత్ సింగ్ వార్నింగ్ ఇచ్చారు. వరంగల్ పోలీస్ కమిషనరేట్ పరిధిలో శాంతి భద్రతల పరిరక్షణకై ముందడుగు వేశారు.

మిల్స్ కాలనీకి చెందిన రౌడీషీటర్‌ వంచనగిరి సురేష్ అలియాస్ కోతి సురేష్ ను వరంగల్ పోలీస్ కమిషనరేట్ నుండి బహిష్కరణ చేస్తూ వరంగల్ పోలీస్ కమిషనర్ సన్ ప్రీత్ సింగ్ ఈ రోజు ఉత్తర్వులు జారీ చేశారు. తొలిసారిగా వరంగల్ పోలీస్ కమిషనరేట్ పరిధిలో ప్రజా శాంతి భద్రతలకు భంగం కలిగిస్తున్న రౌడీషీటర్ వంచనగిరి సురేష్ అలియాస్ కోతి సురేష్ (31) పై హైదరాబాద్ సిటీ పోలీస్ చట్టం, 1348 ఫస్లి (వరంగల్ మెట్రోపాలిటన్ ఏరియా పోలీస్ చట్టం, 2015) లోని సెక్షన్ 26(1) ప్రకారం ఆరు నెలలు పాటు బహిష్కరణ ఉత్తర్వులు జారీ చేశారు.

ఈ ఉత్తర్వుల జారీ అనంతరం మిల్స్ కాలని ఇన్స్ స్పెక్టర్ రమేష్,ఎసై మిథున్ నిందితుడు కోతి సురేష్ ను వరంగల్ పోలీస్ కమిషనరేట్ సరిహద్దులో ఉండకూడదని పోలీస్ కమిషనర్ సన్ ప్రీత్ సింగ్ జారీచేసిన ఉత్తర్వులను అందజేశారు. మిల్స్ కాలనీ పోలీస్ స్టేషన్‌కు చెందిన వంచనగిరి సురేష్ రౌడీషీటర్‌గా పెట్రేగి పోతున్నాడు. రౌడీషీటర్ ఆగడాలకు కళ్లెం వేసేందుకు గాను నగర బహిష్కరణ వేటు వేశారు. రౌడీషీటర్ వంచనగిరి. సురేష్ పై గతంలో పలు తీవ్రమైన నేర కేసులు నమోదై ఉన్నాయి.

ఆయా కేసులు ప్రజలలో భయాందోళనలను సృష్టిస్తూ, శాంతియుత జీవన విధానానికి ఆటంకం కలిగించినట్లు పోలీసు రికార్డులు వెల్లడిస్తున్నాయి. రౌడీషీటర్ అక్రమ కార్యకలాపాల కారణంగా ప్రజల ఫిర్యాదులు చేయడానికి కూడా భయపడుతున్న పరిస్థితి నెలకొంది. ఈ నేపథ్యంలో, అతనిని వివరణ కారణాలు చూపించాలని నోటీసు జారీ చేయగా, సంబంధిత అధికారుల ఎదుట హాజరుకాలేదు. ఎలాంటి వ్రాతపూర్వక వివరణ ఇవ్వకపోవడంతో, అతని వైఖరిని తప్పుపట్టారు.

ప్రజా శాంతికి ముప్పుగా మారిందని నిర్ధారణకు వచ్చిన పోలీసులు సదరు రౌడీ షీటర్ పై సీరియస్ యాక్షన్ కు లోకల్ పోలీసులు సిఫార్సు చేశారు. అందువల్ల, ప్రజా ప్రయోజనాన్ని దృష్టిలో ఉంచుకుని, వంచనగిరి సురేష్‌ను వరంగల్ పోలీస్ కమిషనరేట్ పరిధి నుంచి ఆరు నెలల కాలం పాటు తక్షణమే బయటకు వెళ్లాలని ఆదేశాలు జారీ చేశారు. కోర్టు హాజరు కోసం మాత్రమే ముందస్తు అనుమతి తో కమిషనరేట్ పరిధిలోకి ప్రవేశించేందుకు అనుమతిని ఇవ్వనున్నారు.

వరంగల్ పోలీస్ కమిషనరేట్ పరిధిలో శాంతి భద్రతల పరిరక్షణకు విఘాతం కలిగించే వారిపై కఠిన చర్యలు కొనసాగుతాయని వరంగల్ పోలీస్ కమిషనర్ సన్ ప్రీత్ సింగ్ హెచ్చరించారు. ప్రజలను ఎవ్వరు భయభ్రాంతులకు గురిచేసే ప్రయత్నాలు చేసే నేరాలపై పోలీసులకు సమాచారం అందించాలని వరంగల్ పోలీస్ కమిషనర్ ప్రజలకు విజ్ఞప్తి చేస్తున్నారు.