Chittoor | పదవీ విరమణ చేసిన పోలీసులకు సన్మానం
Chittoor | పదవీ విరమణ చేసిన పోలీసులకు సన్మానం
Chittoor | చిత్తూరు, ఆంధ్ర ప్రభ బ్యూరో : చిత్తూరు జిల్లాలో జనవరి నెలలో పదవీ విరమణ పొందిన ఇద్దరు పోలీసు అధికారులకు జిల్లా ఎస్పీ తుషార్ డూడి ఆధ్వర్యంలో పోలీస్ గెస్ట్ హౌస్ కాన్ఫరెన్స్ హాల్లో ఘనంగా ఆత్మీయ వీడ్కోలు కార్యక్రమం నిర్వహించారు. సుదీర్ఘకాలం క్రమశిక్షణ, నిబద్ధత, నిజాయితీతో సేవలందించిన అధికారులను సన్మానిస్తూ జ్ఞాపికలు, విలువైన బహుమతులు అందజేశారు. ఈ సందర్భంగా ఎస్పీ మాట్లాడుతూ “శేష జీవితం మంచి ఆరోగ్యంతో ఆనందంగా గడపాలి. మీ సేవలు పోలీస్ శాఖకు చిరస్మరణీయాలు” అని పేర్కొన్నారు.
దాదాపు నలభై సంవత్సరాలపాటు అంకితభావంతో పనిచేసి పదవీ విరమణ పొందడం గొప్ప విషయం అని ఎస్పీ అభినందించారు. “పోలీస్ డిపార్ట్మెంట్లో పనిచేయడం ఎప్పుడూ సవాళ్లతో కూడుకున్నది. కుటుంబానికి దూరంగా ఉండి, వ్యక్తిగత జీవితాన్ని పక్కనబెట్టి ప్రజాసేవలో నిమగ్నమవడం సాధారణ విషయం కాదు. కొన్ని సందర్భాల్లో మంచిగా చేసిన పనులకూ తప్పుగా అర్థం చేసుకునే పరిస్థితులు వస్తాయి. అయినప్పటికీ మీరు చూపిన దృఢ నిశ్చయం, విధి పట్ల నిబద్ధత మీ వ్యక్తిత్వానికి నిదర్శనం” అని కొనియాడారు.
పదవీ విరమణ అనంతరం కుటుంబ సభ్యులతో సమయం గడుపుతూ ఆరోగ్యంపై దృష్టి పెట్టాలని సూచించిన ఎస్పీ, “మీరు ఎప్పటికీ పోలీస్ కుటుంబంలో భాగమే. ఎలాంటి అవసరమైనా ఎప్పుడైనా సంప్రదించండి. శాఖ ఎల్లప్పుడూ మీ వెంటే ఉంటుంది” అని హామీ ఇచ్చారు. భవిష్యత్తులో ఆయురారోగ్యాలతో సుఖసంతోషాలతో జీవించాలని ఆకాంక్షించారు.
అడిషనల్ ఎస్పీలు కూడా మాట్లాడుతూ, ఇంత దీర్ఘకాలం నిజాయితీగా సేవలందించడం అరుదైన విషయం అని పేర్కొన్నారు. విధి నిర్వర్తనలో ఎన్నో కష్టనష్టాలను ఎదుర్కొంటూ ప్రజాసేవకు ప్రాధాన్యం ఇచ్చిన తీరు యువ పోలీసు సిబ్బందికి ఆదర్శమని తెలిపారు. పదవీ విరమణ తర్వాత కూడా వారి అనుభవం శాఖకు మార్గదర్శకంగా ఉంటుందని చెప్పారు.
సన్మానానికి స్పందించిన రిటైర్డ్ అధికారులు, “మాకు ఇంత ఆత్మీయంగా వీడ్కోలు పలకడం మా జీవితంలో మరువలేని సంఘటన” అంటూ ఎస్పీకి, పోలీసు శాఖకు కృతజ్ఞతలు తెలిపారు.
పదవీ విరమణ పొందిన అధికారుల వివరాలు:
నారాయణస్వామి (ఏఎస్ఐ, ట్రాఫిక్ పోలీస్ స్టేషన్) – 1987లో పోలీసు కానిస్టేబుల్గా సేవలో చేరి, 2010లో హెడ్ కానిస్టేబుల్గా, 2018లో అసిస్టెంట్ సబ్ఇన్స్పెక్టర్గా పదోన్నతులు పొందారు. 39 ఏళ్ల సేవలో ఖమ్మం, కరీంనగర్, చిత్తూరు, పాకాల, గుడిపాల తదితర ప్రాంతాల్లో విధులు నిర్వహించారు. సేవలో భాగంగా అనేక ప్రశంసలు అందుకున్నారు.
సుందరం (ఏఆర్ హెడ్ కానిస్టేబుల్, సాయుధ దళం) – 1990లో సాయుధ రిజర్వ్ కానిస్టేబుల్గా చేరి, 2014లో హెడ్ కానిస్టేబుల్గా పదోన్నతి పొందారు. 36 ఏళ్ల సేవలో చిత్తూరు సాయుధ దళంలో విధులు నిర్వర్తించారు. సేవాపరంగా పలు ప్రశంసలు అందుకున్నారు.
ఈ కార్యక్రమానికి ట్రైనీ ఐపీఎస్ డా. తరుణ్ పహ్వా, అడిషనల్ ఎస్పీలు, డిఎస్పీలు, ఇన్స్పెక్టర్లు, రిజర్వ్ ఇన్స్పెక్టర్లు, పోలీస్ కార్యాలయ సిబ్బంది, పోలీస్ అసోసియేషన్ ప్రతినిధులు, కుటుంబ సభ్యులు, సన్నిహితులు పాల్గొన్నారు. కార్యక్రమం హృదయానికి హత్తుకునే వాతావరణంలో సాగింది. పోలీస్ శాఖలో సేవలందించిన వారి కృషిని గుర్తుచేసుకుంటూ స్నేహపూర్వకంగా వీడ్కోలు పలికారు.
