చెన్నై | డీలిమిటేషన్ పై కాసేపట్లో చెన్నైలో అఖిలపక్ష సమావేశం ప్రారంభ‌మైంది. డీఎంకే అధినేత, సీఎం స్టాలిన్ అధ్యక్షతన చెన్నైలోని ఐటీసీ చోళ హోటల్ లో ఈ భేటీ కొనసాగతున్న‌ది. ఈ సమావేశానికి పలు రాష్ట్రాల సీఎంలు, కీలక నేతలు హాజరయ్యారు. తెలంగాణ నుంచి ముఖ్యమంత్రి రేవంత్ రెడ్డి, పీసీసీ అధ్యక్షుడు మహేశ్ కుమార్ గౌడ్, ఎంపి మ‌ల్లు ర‌వి, . బీఆర్ఎస్ నుంచి ఆ పార్టీ వర్కింగ్ ప్రెసిడెంట్ కేటీఆర్, మాజీ మంత్రి జ‌గ‌దీశ్ రెడ్డి, నిరంజన్ రెడ్డి, ఎంపి రవిచంద్ర, మాజీ ఎంపీ వినోద్ కుమార్ సమావేశంలో పాల్గొన్నారు. కాగా, ఈ సమావేశానికి రాజకీయ ప్రాధాన్యత లేదని.. కేవలం దక్షిణాది ఉనికి కోసమే నేతలందరూ రావాలని సీఎం స్టాలిన్ పిలుపునిచ్చారు. ఈ సమావేశంలో తమిళనాడు, ఏపీ, తెలంగాణ, కర్నాటక, కేరళ, పంజాబ్, ఒడిశా రాష్ట్రాలకు సంబంధించిన పలువురు నేతలు హాజరయ్యారు.. తెలంగాణ ముఖ్యమంత్రి రేవంత్ రెడ్డి, పంజాబ్ ముఖ్యమంత్రి భ‌గ‌వంత్ సింగ్ మ‌న్, కేరళ ముఖ్యమంత్రి పిన‌ర‌య్ విజ‌య‌న్, కర్నాటక ఉప ముఖ్యమంత్రి డి కె శివ‌కుమార్ త‌దిత‌రులు ఈ సమావేశంలో పాల్గొంటున్నారు..
డీలిమిటేషన్ ను వ్య‌తిరేకిస్తాం … కెటిఆర్
చెన్నైలో మీడియాతో కేటీఆర్ మాట్లాడుతూ… డీలిమిటేషన్ కు తాము పూర్తిగా వ్యతిరేకమని చెప్పారు. డీలిమిటేషన్ తో దక్షిణాది రాష్ట్రాలకు తీరని అన్యాయం జరుగుతుందని అన్నారు. ఇప్పటికే బీజేపీ అధికారంలో ఉన్న రాష్ట్రాలకే నిధులు ఇస్తామని కేంద్ర ప్రభుత్వం చెపుతోందని… డీలిమిటేషన్ జరిగితే దక్షిణాది రాష్ట్రాలకు ఏమాత్రం విలువలేకుండా పోయే ప్రమాదం ఉందని చెప్పారు. ఉత్తరాది రాష్ట్రాల్లో ఎంపీ స్థానాలు భారీగా పెరుగుతాయని… అప్పుడు దక్షిణాది రాష్ట్రాలపై కేంద్ర ప్రభుత్వం ఎక్కువగా ఆధారపడాల్సిన అవసరం లేదని అన్నారు.
దేశ జనాభాల్లో 2.8 శాతం జనాభా ఉన్న తెలంగాణ… దేశ జీడీపీలో 5.1 శాతం సమకూర్చుతోందని కేటీఆర్ చెప్పారు. ఇప్పటికే అన్ని ట్యాక్స్ ల పేరుతో తెలంగాణ నుంచి రూపాయి తీసుకుని… 25 పైసలు మాత్రమే తెలంగాణకు తిరిగి ఇస్తోందని విమర్శించారు. డీలిమిటేషన్ తో నిధుల పరంగా దక్షిణాది రాష్ట్రాలు తీవ్ర వివక్షకు గురయ్యే ప్రమాదం ఉందని ఆందోళన వ్యక్తం చేశారు.
