నల్లమల్లలో చెక్ పోస్టులు ఏర్పాటు..
- అడుగడుగునా చెకింగ్..
- ప్రతి వెహికల్ క్షుణ్ణంగా పరిశీలన..
- ప్రధాని పర్యటన సందర్భంగా భద్రతా ఏర్పాట్లను పరిశీలించిన జిల్లా ఎస్ పి….
- ప్రధానికి మూడంచెల భద్రత
- 7,230 మంది పోలీసులు పహారా
కర్నూలు / నంద్యాల బ్యూరో, ఆంధ్రప్రభ : ప్రధాని నరేంద్ర మోదీ ఈనెల 16 న కర్నూలు జిల్లాలో పర్యటించనుండటంతో రాష్ట్ర పోలీసు శాఖ భద్రతా ఏర్పాట్లలో ఎటువంటి లోపం లేకుండా జడ్ ప్లస్ స్థాయి కవచం అందిస్తోంది. ప్రధాని పర్యటన ప్రతి నిమిషం సెక్యూరిటీ ప్రోటోకాల్‌ ప్రకారం కచ్చితంగా నడిచేలా అన్ని విభాగాలు అలర్ట్‌ అయ్యాయి.
ప్రధాని మోదీ ప్రత్యేక విమానంలో ఓర్వకల్లు విమానాశ్రయానికి చేరుకోనున్నారు. అక్కడి నుంచి నేరుగా నన్నూరు రాగ మయూరి గ్రీన్‌హిల్స్ లో నిర్వహించే సభా ప్రాంగణానికి వెళ్లనున్నారు. ఈ మార్గంలో ఒక్క అడుగు దూరం కూడా నిర్లక్ష్యం లేకుండా పోలీసులు బందోబస్తు కట్టుదిట్టం చేశారు.
మొత్తం 37 మంది ఉన్నతాధికారుల పర్యవేక్షణలో సెక్యూరిటీ ఏర్పాట్లు జరుగుతున్నాయి. అందులో నలుగురు డీఐజీలు, 33 మంది ఎస్పీలు, 35 మంది అదనపు ఎస్పీలు కీలక బాధ్యతలు చేపట్టారు.
జడ్ ప్లస్ ఆధీనంలో శ్రీశైలం…
నంద్యాల జిల్లాలోని ప్రముఖ పుణ్యక్షేత్రం శ్రీశైలంలోని భ్రమరాంబిక మల్లికార్జున స్వామి దర్శనార్థం ఈనెల 16 న దేశ ప్రధానమంత్రి నరేంద్ర మోదీ రాక సందర్భంగా జిల్లా ఎస్పీ సునీల్ షేరన్ ఆదివారం భద్రత ఏర్పాట్లలో స్వయంగా పరిశీలించారు. భారత ప్రధానమంత్రి కార్యాలయం షెడ్యూల్డ్ ప్రకారం 16వ తేదీ ఉదయం 12.30 గంటలకల్లా శ్రీశైలం కు చేరుకుంటారు. ఓర్వకల్లు ఎయిర్ పోర్ట్ నుంచి సున్నిపెంట ఎలిఫెంట్ కు ఉదయం 11:30 గంటలకు చెరుకుంటారు.
అక్కడి నుంచి రోడ్డు మార్గాన శ్రీశైలం వస్తారు. శ్రీ భ్రమరాంబ మల్లికార్జున స్వామివారిని దర్శించుకో నున్న సందర్భంగా ప్రధాని పర్యటించే ప్రదేశాలలో పోలీసులు భారీబందో బస్సులు ఏర్పాటు చేసినట్లు జిల్లా ఎస్పీ సునీల్ షేర్ న్ తెలిపారు. నల్లమల అడవి మార్గాన ప్రతి వాహనాన్ని తనిఖీ లు చేపడుతున్నారు. అడుగడుగునా చెక్ పోస్ట్ లను ఏర్పాటు చేశారు.హెలిపాడ్, రోడ్డు మార్గం, భ్రమరాంబ గెస్ట్ హౌస్, గుడి పరిసర ప్రదేశాలు,
సేఫ్ హౌస్ మొదలగు ప్రాంతాలలో భద్రత ఏర్పాట్లను స్వయంగా జిల్లా ఎస్పీ పరిశీలించారు. ఎలాంటి అవాంఛనీయ సంఘటన జరగకుండా తీసుకోవలసిన చర్యలపై సంబంధిత అధికారులకు దిశా నిర్దేశం చేశారు. ఇప్పటికే జెడ్ ఫ్లస్ కమాండోలు శ్రీశైలానికి చేరుకున్నారు. ఆ పరిసర ప్రాంతాలను స్వాధీనం చేసుకున్నారు. అడుగడుగునా బాంబు స్క్వాడ్ సిబ్బందితో డాగ్ స్క్వాడ్ తో తరచూ తనిఖీ చేస్తున్నారు. జిల్లా ఎస్పీ పోలీసులకు తగు జాగ్రత్తలు సూచించారు. ఏ చిన్న పొరపాటు జరిగిన వారి బాధ్యతలు అవుతారని అధికారులను హెచ్చరించారు. ఎస్ పి వెంట డిఎస్పీలు సిఐలు సిబ్బంది ఉన్నారు
అడుగడుగునా నిఘా వలయం
ఓర్వకల్లు నుండి నన్నూరు సభా ప్రాంగణం దాకా మొత్తం మార్గంలో ప్రతి 100 మీటర్లకో పోలీసు జట్టు తలమునకలై ఉంటుంది. అంతేకాదు, డ్రోన్ కెమెరాలు, సీసీటీవీలు, వీడియో వాహనాలు, మొబైల్ కంట్రోల్ రూములు కూడా ఏర్పాటు చేశారు. వేదిక పరిసరాల్లో యాంటీ-సబోటేజ్ చెక్ టీమ్స్, బాంబ్ డిస్పోజల్ యూనిట్లు, స్నిఫర్ డాగ్స్, బాంబ్ డిటెక్షన్ స్క్వాడ్‌లు ఎప్పటికప్పుడు పర్యవేక్షణ కొనసాగిస్తున్నాయి.
7,230 మంది సిబ్బంది రెడీ
ప్రధాని పర్యటన సందర్భంగా మొత్తం 7,230 మంది పోలీసులు నియమించబడ్డారు. వీరిలో 74 మండి డీఎస్పీలు 298 మంది సీఐలు, 31 మంది ఆర్ ఐ లు, 421 మంది ఎస్సైలు , 42 మంది మహిళా ఎస్సైలు , 719 మంది హెడ్ కానిస్టేబుళ్లు, ఏఎస్సైలు , 3.297 మంది కానిస్టేబుళ్లు , 415 మంది మహిళా పోలీసులు . 1.465 మంది ఏఆర్, ఏపీ ఎస్పీ సిబ్బంది , వీరితో పాటు గ్రేహౌండ్స్, ఆక్టోపస్ కమాండోలు, ఇంటెలిజెన్స్ విభాగం, బాంబ్ డిస్పోజల్ యూనిట్లు కూడా సెక్యూరిటీ బాధ్యతల్లో ఉంటాయి.
మూడు అంచల భద్రతా వలయం
సభా ప్రాంగణం చుట్టూ మూడు వలయాల భద్రతను ఏర్పాటు చేశారు. ఇన్నర్ రింగ్‌: ప్రధాని వేదిక పరిధి – ప్రత్యేక రక్షణ బృందం, ఎస్ పి జి సిబ్బంది కవచం. సెకండ్ రింగ్‌: ప్రాంగణానికి వచ్చే అన్ని మార్గాల్లో చెక్‌పోస్టులు, మెటల్ డిటెక్టర్లు. అవుటర్ రింగ్‌: సభకు వచ్చే ప్రజా మార్గాలు, వాహనాల నిల్వ కేంద్రాల వద్ద సెక్యూరిటీ ఫిల్టరింగ్‌.
13వ తేదీ నుంచే పహారా
భద్రతా ఏర్పాట్ల కోసం వివిధ జిల్లాల నుంచి పోలీసులు 13వ తేదీ నుంచి కర్నూలుకు చేరుకోనున్నారు. వారికి ముందుగా ప్రత్యేక బ్రీఫింగ్‌ నిర్వహించనున్నట్లు అధికారులు తెలిపారు. సెక్యూరిటీ ఆపరేషన్‌లో పాల్గొనే సిబ్బందికి ఫుడ్‌, వాటర్‌, షెల్టర్‌, ఎమర్జెన్సీ మెడికల్ టీమ్స్ కూడా ఏర్పాటు చేశారు.
ప్రతీ కదలికపై ఇన్‌టెలిజెన్స్‌ దృష్టి
సభా ప్రాంగణానికి చేరే ప్రజా రవాణా, వాహనాలు, పాస్‌ సిస్టమ్‌ అన్నీ ఆధునిక క్యూఆర్‌ కోడ్‌ విధానంలో ఉంటాయి. ఎలాంటి అనుమానాస్పద వ్యక్తులు లేదా వస్తువులు కనపడితే వెంటనే ఆపరేషన్ కంట్రోల్ రూమ్‌కు సమాచారం చేరేలా రియల్‌టైమ్‌ మానిటరింగ్‌ సిస్టమ్‌ ఏర్పాటుచేశారు.
భద్రతకే తొలి ప్రాధాన్యం – డీజీపీ హరీశ్ కుమార్ గుప్తా
ప్రధాని పర్యటన భద్రత విషయంలో ఎలాంటి రాజీ ఉండదని రాష్ట్ర డీజీపీ హరీశ్ కుమార్ గుప్తా స్పష్టం చేశారు. ప్రతి సెక్యూరిటీ లేయర్‌ కచ్చితంగా పనిచేస్తోంది. స్థానిక పోలీసులతో పాటు ప్రత్యేక దళాలు సన్నద్ధంగా ఉన్నాయి. ప్రజలకు అసౌకర్యం కలగకుండా, క్రమశిక్షణతో విధులు నిర్వర్తించాలి అని ఆయన సూచించారు.
