RDO | పాలకులకు పాలాభిషేకం
మడకశిరలో చిందులే చిందులు
ఆర్డీవో కార్యాలయం జీవోతో హర్షం
RDO | శ్రీ సత్యసాయి బ్యూరో , ఆంధ్రప్రభ : మడకశిర పట్టణంలోని జ్యోతిరావు బాపూలే సర్కిల్‌లో ఆర్డీవో కార్యాలయం (Office of the RDO) ఏర్పాటు కోసం ప్రభుత్వం జారీ చేసిన జీవో సందర్భంగా శుక్రవారం ముఖ్యమంత్రి నారా చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రి నారా లోకేష్, రెవెన్యూ శాఖ మంత్రి అనగానీ సత్యప్రసాద్ చిత్రపటాలకు స్థానిక ప్రజలు పాలాభిషేకం నిర్వహించారు. ఈ కార్యక్రమానికి ముఖ్య అతిథిగా మాజీ ఎమ్మెల్సీ, టిడిపి రాష్ట్ర ఉపాధ్యక్షులు గుండుమల తిప్పేస్వామి పాల్గొన్నారు.
ఈ సందర్భంలో తిప్పేస్వామి మాట్లాడుతూ, మడకశిర ప్రాంత ప్రజల ఎన్నో దశాబ్దాల కల ఈరోజు నెరవేరిందని పేర్కొన్నారు. 2022 ఫిబ్రవరి 22 నుంచి మూడు రోజులపాటు అఖిలపక్ష నాయకులతో కలిసి మౌన దీక్ష (Silent initiation) నిరసన ర్యాలీలు, రిలే నిరాహార దీక్షలు నిర్వహించినప్పటికీ అప్పటి వైసిపి ప్రభుత్వం మడకశిర ప్రజల సమస్యలను పట్టించుకోలేదని ఆయన విమర్శించారు. పెనుకొండ దూర ప్రాంతం కావడంతో రెవెన్యూ సేవల కోసం ప్రజలు తీవ్ర ఇబ్బందులు పడుతున్నప్పటికీ, ఆ సమయంలో రెవెన్యూ శాఖ మంత్రిగా పనిచేసిన ఎన్ రఘువీరారెడ్డి ప్రాంతీయ అభివృద్ధిపై కనికరించలేదని పేర్కొన్నారు.
తెలుగుదేశం పార్టీ ప్రతిపక్షంలో ఉన్నప్పుడే మడకశిరలో ఆర్డీవో కార్యాలయం అవసరాన్ని చంద్రబాబు నాయుడు దృష్టికి అనేకసార్లు తీసుకెళ్లినట్టు తెలిపారు. కూటమి ప్రభుత్వం అధికారంలోకి వచ్చిన వెంటనే, స్థానిక ఎమ్మెల్యే (MLA) ఎమ్మెస్ రాజు చొరవతో ఈ సమస్యను సీఎం దృష్టికి తీసుకెళ్లడంతో ప్రభుత్వం వెంటనే సానుకూలంగా స్పందించిందని చెప్పారు. అనంతరం అసెంబ్లీ సమావేశాల్లోనూ మంత్రి లోకేష్ బాబుకు, సంబంధిత మంత్రులకు ఎమ్మెల్యే రాజు ఈ విషయం వివరిస్తూ కృషి చేయడంతో మడకశిర‌కు ఆర్డీవో కార్యాలయం మంజూరు జరిగిందన్నారు.
దీంతో మడకశిర, అమరాపురం, ఆగళి, గుడిబండ, రోళ్ళ వంటి మండలాల ప్రజలకు రెవెన్యూ సేవలు మరింత చేరువ కానున్నాయని, కర్ణాటక (Karnataka) సరిహద్దుకు ఆనుకుని ఉన్న ఈ ప్రాంతానికి ఇది ఎంతో అవసరమైందని చెప్పారు. మడకశిర ప్రాంత ప్రజల తరపున ముఖ్యమంత్రి చంద్రబాబుకు ధన్యవాదాలు తెలిపారు. త్వరలోనే ఆర్డీవో కార్యాలయం భవనం నిర్మించి, మంత్రుల సమక్షంలో అంగ‌రంగ వైభ‌వంగా ప్రారంభోత్సవం నిర్వహించేందుకు ఏర్పాట్లు చేస్తామని తిప్పేస్వామి వెల్లడించారు.
ఈ కార్యక్రమంలో రాష్ట్ర వక్కలిగ కార్పొరేషన్ చైర్మన్ లక్ష్మీనారాయణ, రాష్ట్ర మైనారిటీ డైరెక్టర్ (Director) భక్తర్ సాబ్, జిల్లా లీగల్ సెల్ రాధాకృష్ణ, మున్సిపల్ చైర్మన్ నరసింహారాజు, కన్వీనర్లు నాగరాజు, వైస్ చైర్మన్ వెంకటలక్ష్మమ్మ, హనుమంతు, కౌన్సిలర్లు ఉమాశంకర్, బలరాం, క్లస్టర్ ఇంచార్జ్ రవికుమార్, ప్రధాన కార్యదర్శి తిమ్మరాజు, అనుబంధ కమిటీల నాయకులు, కూటమి నాయకులు పాల్గొన్నారు.
