అక్రమ రిజిస్ట్రేషన్లపై ముమ్మర తనిఖీలు
నిషేధిత భూముల రిజిస్ట్రేషన్ పై ఆరా
తిరుపతి, న‌వంబ‌ర్ 5 : రేణిగుంట సబ్ రిజిస్ట్రార్ ఆనంద రెడ్డి పై వచ్చిన అవినీతి ఆరోపణలపై తిరుపతి జిల్లా ఏసీబీ (అవినీతి నిరోధక శాఖ) అధికారులు మెరుపు దాడులు నిర్వహించారు. సబ్ రిజిస్ట్రార్ ఆనంద రెడ్డిపై వచ్చిన అవినీతి ఆరోపణల నేపథ్యంలో, కార్యాలయంలోని క్రయ విక్రయాలు, రిజిస్ట్రేషన్ల వ్యవహారాలపై ఏసీబీ అధికారులు లోతుగా దర్యాప్తు చేస్తున్నారు.
కీలక అంశాలపై ఆరా
ఏసీబీ బృందం రిజిస్ట్రార్ కార్యాలయంలోని ప్రతి ఒక్క ఫైలును, రికార్డును క్షుణ్ణంగా పరిశీలించింది. ఈ తనిఖీల్లో ముఖ్యంగా మూడు కీలక అంశాలపై అధికారులు దృష్టి సారించారు.
అక్రమ రిజిస్ట్రేషన్లు:
కోర్టులో పెండింగ్‌లో ఉన్న భూములను సైతం రిజిస్ట్రేషన్ చేశారన్న ఆరోపణలపై ఏసీబీ అధికారులు ప్రత్యేకంగా దర్యాప్తు చేస్తున్నారు. పెండింగ్‌లో ఉంచాల్సిన రిజిస్ట్రేషన్లను కూడా పూర్తి చేశారనే ఫిర్యాదులు అందడంతో, ఆయా డాక్యుమెంట్ల వివరాలను సేకరించారు.
ప్రాంతేతర రిజిస్ట్రేషన్లు:
రేణిగుంట మండలానికి, తిరుపతి జిల్లాకు సంబంధించిన ప్రాంతాలు కాకుండా, ఇతర రాష్ట్రాల నుంచి లేదా దూర ప్రాంతాల నుంచి వచ్చి ఇక్కడ రిజిస్ట్రేషన్లు చేసుకోవడానికి గల కారణాలను అధికారులు ఆరా తీస్తున్నారు. స్థానికేతరులు ఇక్కడ భూములు లేదా ఆస్తులు రిజిస్టర్ చేసుకోవడం వెనుక ఏమైనా అక్రమాలు దాగి ఉన్నాయా అనే కోణంలో విచారణ చేస్తున్నారు.
క్రయ విక్రయాల విచారణ:
సబ్ రిజిస్ట్రార్ కార్యాలయంలో రిజిస్ట్రేషన్ ప్రక్రియ ఎలా జరుగుతోంది, ప్రజల నుంచి ఎంత మొత్తంలో రుసుము వసూలు చేస్తున్నారు, అనే విషయాలను తెలుసుకునేందుకు ఏసీబీ అధికారులు అక్కడున్న ప్రతి ఒక్కరిరీ వ్యక్తిగతంగా ప్రశ్నించి వివరాలు సేకరిస్తున్నారు.
తాళాలు వేసిన డాక్యుమెంట్ రైటర్ల కార్యాలయాలు
ఏసీబీ దాడులు ప్రారంభం కాగానే, రిజిస్ట్రార్ కార్యాలయం పరిసర ప్రాంతాల్లోని వాతావరణం ఒక్కసారిగా మారిపోయింది. సాధారణంగా రద్దీగా ఉండే డాక్యుమెంట్ రైటర్ల కార్యాలయాలు, స్టాంప్ వెండర్ల దుకాణాలు అన్నీ హడావుడిగా మూతబడ్డాయి. ముఖ్యంగా లైసెన్స్ లేని దస్తావేజు స్టాంప్ వెండర్లు మరియు డాక్యుమెంట్ రైటర్లు తమ కార్యాలయాలకు తాళాలు వేసి అక్కడి నుంచి వెళ్లిపోయారు. రిజిస్ట్రేషన్ ప్రక్రియలో దళారులు, అనధికార వ్యక్తుల పాత్ర ఎంతవరకు ఉందో ఈ సంఘటన స్పష్టం చేస్తోంది.
ఏసీబీ కబంధహస్తాల్లో కార్యాలయం
ప్రస్తుతం సబ్ రిజిస్ట్రార్ కార్యాలయం పూర్తిగా ఏసీబీ అధికారుల అదుపులో ఉంది. అవినీతి ఆరోపణలు ఎదుర్కొంటున్న సబ్ రిజిస్ట్రార్ ఆనంద రెడ్డితో పాటు కార్యాలయంలోని సిబ్బందిని అధికారులు విచారిస్తున్నారు. దాడులు ముగిసేవరకు కార్యాలయం లోపల, బయట ఎవరినీ అనుమతించడం లేదు. ఈ దాడుల ద్వారా అక్రమ ఆస్తులు లేదా లెక్కల్లో చూపని నగదు ఏమైనా లభ్యమయ్యాయా అనే దానిపై అధికారులు గోప్యత పాటిస్తున్నారు. ఏసీబీ అధికారులు తమ తనిఖీలను ముమ్మరం చేశారు. ఈ దాడుల వెనుక అవినీతిని కూకటి వేళ్లతో పెకిలించాలనే ప్రభుత్వ నిర్ణయం స్పష్టమవుతోంది. ఈ దాడులకు సంబంధించిన పూర్తి వివరాలు ఏసీబీ అధికారులు తీసుకునే చర్యలపై మరికొంత సమయం వేచి చూడాల్సి ఉంది.
