1A రికార్డు వెక్కిరింత
- తక్షణ చర్యలకు దేవాదాయ శాఖ కసరత్తు
- ఆంధ్రప్రభ వార్తకు కొన్ని గంటల్లోనే మంత్రి తక్షణ స్పందన
చిత్తూరు బ్యూరో, ఆంధ్రప్రభ : రాములోరి ఆకలి కేకలకు దేవాదాయ శాఖ(Endowment Department) మంత్రి చలించారు. దేవాదాయ శాఖ దండు కదిలింది. కబ్జా రక్కసుల చెరలోని కోదండ రామయ్య భూములను, రికార్డులను తనిఖీ చేశారు. ఆసామి రామయ్య ఆస్తి 1A రికార్డులో ఇతరుల పేర్లు వెక్కిరించాయి. ఆసామిగా కోదండరామయ్య(Kodandaramaiah) పేరు మార్చి నివేదిక తయారు చేసి కలెక్టర్కు సమర్పించాలని తాహసీల్దారును దేవాదాయ శాఖ అధికారులు కోరారు. ఔను. ఇది నిజం.
చిత్తూరు జిల్లా గంగాధర నెల్లూరు నియోజకవర్గ పెనుమూరు మండలంలోని శ్రీ కోదండ రామ స్వామి ఆలయ భూములు ఆక్రమణకు గురయ్యాయని గత నెల 26న ఆంధ్ర ప్రభ దినపత్రికలో వార్తా కథనం ప్రచురితమైంది. కానీ అధికారులకు చీమ కుట్టలేదు. ఈ స్థితిలో అక్టోబర్ 7 ఆంధ్రప్రభ(Andhraprabha) మరో బ్రహ్మాస్త్రం ప్రభన్యూస్.డామ్ లో .. ’అన్నమో సీతా.. రాములోరి ఆకలి కేక’ అనే శీర్షికన వార్తను ప్రచురించిన కొన్ని గంటల్లోనే మంత్రి ఆనం రామనారాయణ చలించిపోయారు. అసలు ఆ భూముల సంగతి తేల్చాలని దేవాదాయ శాఖాధికారులను ఆదేశించారు.
ఇంకేముంది.. దేవాదాయ శాఖ దండు కదిలింది. ఎండోమెంట్ శాఖ అసిస్టెంట్ కమిషనర్ చిట్టెమ్మ(Chittemma), ఆలయ ఈవో వెంకటరాయులు పెనుమూరు వెళ్లారు. అన్యాక్రాంత ఆలయ భూములను పరిశీలించారు. ఎమ్మార్వో కార్యాలయంలో ఆలయ భూముల రికార్డులను పరిశీలించారు. ఆ రికార్డుల నకళ్ళను సేకరించారు. ఆ రికార్డులలో రాములోరి 99 ఎకరాల భూములు ఇతరుల ఆధీనంలె ఉన్నట్లు 1Aలో నమోదు కావటాన్ని గుర్తించారు.
ఆక్రమణ స్థలంలో కొంత స్మశానం ఉండగా, మరికొందరు పక్కా ఇళ్ళను నిర్మించుకున్నారు. ఇంకొందరు బోర్లు వేసి, వ్యవసాయం చేస్తున్నారు. రెవెన్యూ రికార్డుల(Revenue Records) ప్రకారం తొలుత శ్రీ కోదండ రామస్వామి పేరు ఉండగా తరువాత ఆక్రమణదారుడి(Encroachment) పేరిట మారింది. ఈ రికార్డులను క్షుణ్ణంగా పరిశీలించి 1Aలో ఆక్రమణదారుల పేర్లను తొలగించి శ్రీ కోదండ రామస్వామి పేరును చేర్చాల్సిందిగా నివేదికను తయారుచేసి పెనుమూరు ఎమ్మార్వో ద్వారా జిల్లా కలెక్టర్ కు పంపించాలని నిర్ఱయం తీసుకున్నారు.
ఈ మేరకు ఆలయ ఈవో వెంకటరాయులు మాట్లాడుతూ.. ఆంధ్రప్రభలో వార్తకు స్పందించి ఆక్రమణదారుల నుంచి భూములను స్వాధీనం చేసుకోవడానికి గట్టి చర్యలు ప్రారంభించినట్లు తెలిపారు. జిల్లా కలెక్టర్ ఆదేశాతో ఈ భూములను స్వాధీనం చేసుకోవటానికి దేవాదాయ శాఖ అసిస్టెంట్(Assistant) కమిషనర్ చర్యలు చేపట్టనున్నట్లు వివరించారు.
