RBI BANK | మీ డబ్బు – మీ హక్కు
బ్యాంకు ఖాతాలపై అవగాహన
శ్రీ సత్యసాయి జిల్లా కలెక్టర్ ఏ శ్యాంప్రసాద్ వెల్లడి
RBI BANK | శ్రీ సత్య సాయి బ్యూరో, ఆంధ్రప్రభ : గత పదేళ్లుగా ఎలాంటి లావాదేవీలు లేని బ్యాంకు ఖాతాల్లో (Bank accounts) నిక్షేపమైన ప్రజల డబ్బును తిరిగి అందించేందుకు రిజర్వ్ బ్యాంక్ ఆఫ్ ఇండియా (ఆర్‌బిఐ) చేపట్టిన ప్రత్యేక కార్యక్రమం మీ డబ్బు – మీ హక్కు పై జిల్లా వ్యాప్తంగా అవగాహన పెంచాలని నిర్ణయించి జిల్లా కలెక్టర్ ఏ శ్యాం ప్రసాద్ అన్నారు . ఈ మేరకు బృహత్ ప్రచార కార్యక్రమాన్ని డిసెంబర్ 31 వరకు నిర్వహిస్తామని కలెక్టర్ తెలిపారు.
శుక్రవారం స్థానిక పుట్టపర్తి కలెక్టరేట్లో ప్రచార పోస్టర్లను ఆవిష్కరించిన జిల్లా కలెక్టర్ ఏ. శ్యాంప్రసాద్ (A. Shyam Prasad) మాట్లాడుతూ, ప్రజలకు తమ తమ బ్యాంకుల్లో ఉన్న నిల్వలను తిరిగి పొందేందుకు ఇది అపూర్వమైన అవకాశమని పేర్కొన్నారు. “వివిధ కారణాల వల్ల గతంలో బ్యాంక్ ఖాతాలు నిర్వీర్యం కావడం, చిరునామా మార్పులు లేదా మరెన్నో కారణాల వల్ల ప్రజలు తమ డబ్బును మర్చిపోవడం జరుగుతుంది. ఇప్పుడు రిజర్వ్ బ్యాంక్ అందిస్తున్న ఈ వేదిక ద్వారా ఆ డబ్బును తిరిగి పొందే అవకాశం ఏర్పడింది” అని కలెక్టర్ వివరించారు.
జిల్లాలో భారీ స్థాయిలో అవగాహన కార్యక్రమాలు చేపడతామని ఆయన చెప్పారు. ముఖ్యంగా గ్రామీణ ప్రాంతాల్లోని (Rural areas) ప్రజలకు సమాచారం చేరేలా పంచాయతీ కార్యాలయాలు, వాలంటీర్లు, మహిళా సంఘాలు, బ్యాంకింగ్ ప్రతినిధులు కలిసి ప్రచారం చేయనున్నట్లు వెల్లడించారు. అర్హులైన వారు తమ ఆధార్, పాన్, బ్యాంకు ఖాతా వివరాలు, పాత పాస్‌బుక్‌లు, గుర్తింపు పత్రాలతో సంబంధిత బ్యాంకు శాఖను లేదా ఆర్‌బిఐ ఆధ్వర్యంలో అందుబాటులో ఉన్న ఆన్‌లైన్ పోర్టల్‌ను సంప్రదించాలని ఆయన సూచించారు.
ఎల్డీఎం రమణకుమార్ (LDM Ramana Kumar) మాట్లాడుతూ, జిల్లాలో వందలాది ఖాతాదారులకు ఈ సమాచారాన్ని తీసుకెళ్లేందుకు ప్రత్యేక పథకం రూపొందించినట్లు తెలిపారు. బ్యాంకు శాఖలు కూడా తమ తమ పరిధిలో నిర్జీవ ఖాతాల జాబితాను సిద్ధం చేసి ఖాతాదారులకు సమాచారం అందించాలని ఆదేశాలు జారీ చేశామని ఆయన చెప్పారు. ప్రజల డబ్బు బ్యాంకుల్లో నిలిచిపోకుండా తిరిగి వారికి చేరడం వలన ప్రభుత్వ, బ్యాంకులపై విశ్వాసం మరింత పెరుగుతుందని ఎల్ డి ఎం అభిప్రాయపడ్డారు.
సిపిఓ విజయకుమార్ (CPO Vijayakumar) మాట్లాడుతూ, ప్రచార కార్యక్రమంలో విద్యా సంస్థలు, స్వచ్ఛంద సంస్థలు, యువజన సంఘాలు భాగస్వాములు కానున్నాయని తెలిపారు. ప్రజల్లో బ్యాంకింగ్ అవగాహన పెరగడం, భద్రతా చర్యలపై స్పష్టత రావడం కూడా ఈ కార్యక్రమం వలన సాధ్యమవుతుందని పేర్కొన్నారు.
జిల్లా అధికారులు వెల్లడించిన వివరాల ప్రకారం, గత పదేళ్లుగా నిర్వీర్యంగా ఉన్న ఖాతాల ద్వారా కోట్ల రూపాయలు (crores of rupees) తిరిగి ఖాతాదారులకు చేరే అవకాశమున్నదని అంచనా. అందుకే ప్రతి కుటుంబం తమ బ్యాంకు వివరాలను ఒకసారి పరిశీలించాలని, అనుమానాలు ఉంటే సమీప బ్యాంకును సంప్రదించాలని సూచించారు.
డిసెంబర్ 31తో ఈ ప్రచారం ముగియనుండగా, అంతేకాకుండా ఆర్‌బిఐ పోర్టల్ ద్వారా ఆ తేదీ తరువాత కూడా డబ్బు తిరిగి పొందవచ్చని అధికారులు (
Officers) స్పష్టం చేశారు. అయితే, ఇప్పుడున్న అవగాహన కార్యక్రమాన్ని ఉపయోగించుకోవాలని జిల్లా యంత్రాంగం సూచిస్తోంది. ఈ కార్యక్రమంలో కలెక్టర్‌తో పాటు ఎల్డీఎం రమణకుమార్, సిపిఓ విజయకుమార్ పాల్గొన్నారు.
