మహిళా బిల్లు చారిత్రాత్మక ఘట్టం: ఎంపీ ధర్మపురి అరవింద్

నిజామాబాద్ ప్రతినిధి, ఆంధ్రప్రభ : మహిళా బిల్లు దేశ చరిత్రలో ఒక చారిత్రాత్మక ఘట్టమని, దీనికంటే గొప్ప వేడుక మరొకటి ఉండదని ఎంపీ ధర్మపురి అరవింద్ పేర్కొన్నారు. మహిళలకు 33 శాతం రిజర్వేషన్లతో 2029 ఎన్నికలు జరగనున్నాయని తెలిపారు. దేశ ప్రజాస్వామ్యాన్ని మారుస్తున్న కీలక నిర్ణయం ఇదని అన్నారు.

ఆదివారం జిల్లా కేంద్రంలోని బీజేపీ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. మహిళా బిల్లుతో కేవలం మహిళలకే కాకుండా ఎస్సీ, ఎస్టీ వర్గాలకు కూడా ప్రాధాన్యం పెరుగుతుందని తెలిపారు. మహిళల సంఖ్య రాజకీయాల్లో పెరిగితే అవినీతి తగ్గుముఖం పడుతుందని అభిప్రాయపడ్డారు. మహిళా రిజర్వేషన్లతో పారదర్శకత పెరుగుతుందని చెప్పారు. తెలంగాణలో ఎంపీ స్థానాలు 17 నుంచి 26కు పెరుగుతాయని తెలిపారు.

కాంగ్రెస్‌పై విమర్శలు

కాంగ్రెస్ నాయకులు రాజకీయాలకు తప్ప మరేదానికి పనికిరారని ఎంపీ ధర్మపురి అరవింద్ విమర్శించారు. మహిళా బిల్లును కూడా రాజకీయ ప్రయోజనాల కోసం ఉపయోగించేందుకు విపక్షాలు ప్రయత్నిస్తున్నాయని అన్నారు. మహిళా రిజర్వేషన్ చట్టం రాజ్యాంగబద్ధంగా అమలు కానుందని, ఇది మహిళల హక్కు మాత్రమే కాక ప్రజాస్వామ్యంలో అవసరమని పేర్కొన్నారు. ఇది రాజకీయాల కోసం తీసుకువచ్చిన బిల్లు కాదని, మహిళా సాధికారతపై బీజేపీకి ఉన్న చిత్తశుద్ధికి నిదర్శనమని తెలిపారు.

బీఆర్‌ఎస్, కాంగ్రెస్‌పై ఆరోపణలు

కేటీఆర్, రేవంత్ రెడ్డి ఇద్దరూ ఒకటేనని, కలిసి డ్రామా ఆడుతున్నారని ఎంపీ ఆరోపించారు. బీఆర్‌ఎస్ పార్టీకి నాయకత్వం లేదని, అది అవినీతి, డ్రగ్స్‌తో ముడిపడి ఉందని విమర్శించారు. బీఆర్‌ఎస్‌తో తమకు ఎలాంటి పొత్తు లేదని స్పష్టం చేశారు.

సీఎం రేవంత్ రెడ్డి కవిత పార్టీకి ఫండింగ్ చేస్తున్నారని ఆరోపించారు. కులాల ఆధారంగా ప్రజలను విభజించే ప్రయత్నాలు జరుగుతున్నాయని అన్నారు. త్వరలో బీఆర్‌ఎస్ నుంచి బీజేపీలోకి భారీగా వలసలు వస్తాయని తెలిపారు. మాజీ మంత్రి జీవన్ రెడ్డి విషయంలో కూడా వ్యాఖ్యలు చేశారు.

ఈ సమావేశంలో జాతీయ పసుపు బోర్డు చైర్మన్ పల్లె గంగారెడ్డి, బీజేపీ రాష్ట్ర నాయకులు మేడపాటి ప్రకాశ్ రెడ్డి, స్రవంతి రెడ్డి, జిల్లా అధ్యక్షుడు దినేష్ పటేల్, కులాచారి తదితరులు, కార్పొరేటర్లు పాల్గొన్నారు.