Ambedkar| తిరుపతి, ఆంధ్రప్రభ : 76 వ భారత రాజ్యాంగ దినోత్సవం సందర్బంగా నేటి బుధవారం తిరుపతి జిల్లా కలెక్టరేట్ లోని సమావేశ మందిరంలో నిర్వహించిన కార్యక్రమంలో డిప్యూటీ కలెక్టర్లు, దేవేంద్ర రెడ్డి, రోజ్ మాండ్ లతో కలిసి డాక్టర్ బి.ఆర్. అంబేద్కర్ చిత్రపటానికి పుష్పాంజలి ఘటించి నివాళులర్పించారు. అనంతరం కలెక్టరేట్ కార్యాలయ సిబ్బందితో కలిసి రాజ్యాంగ విలువలను ఆచరణలో పెట్టడంపై నిబద్ధతను పునరుద్ఘాటిస్తూ రాజ్యాంగ ప్రతిజ్ఞ చేశారు. ఈ సందర్బంగా డిప్యూటీ కలెక్టర్ దేవేంద్ర రెడ్డి మాట్లాడుతూ.. భారత రాజ్యాంగం ప్రపంచంలో అతి సమగ్రమైన, సమానత్వం, సామాజిక న్యాయాన్ని ప్రతిబింభించే గొప్ప రాజ్యాంగమని పేర్కొన్నారు.
రాజ్యాంగ నిర్మాతల దూరదృష్టి, దేశ నిర్మాణంలో వారి కృషి ఈ దేశ ప్రజలకు శాశ్వత ప్రేరణగా నిలుస్తుందన్నారు. ఈ సందర్భంగా వారు ప్రజాసేవలో ప్రతి అధికారి పారదర్శకత, బాధ్యతాయుత ధోరణి మరియు రాజ్యాంగ బద్ధ పరిపాలనకు కట్టుబడి పనిచేయాలని పిలుపునిచ్చారు. ప్రజల సంక్షేమం, న్యాయసూత్రాల పరిరక్షణ, ప్రజాస్వామ్య బలపరచడం వంటి అంశాలకు ప్రాధాన్యం ఇస్తూ విధి నిర్వహణలో రాజ్యాంగ స్ఫూర్తి ప్రతి ఫలించాలని వ్యాఖ్యానించారు. ఈ కార్యక్రమంలో సంబందిత అధికారులు, కల్లెక్టరేట్ సిబ్బంది, తదితరులు పాల్గొన్నారు.
