Rare Surgical Success | ప‌సి బిడ్డ‌కు అరుదైన శస్త్ర చికిత్స
ప్ర‌భుత్వ వైద్యుల‌పై నమ్మకం ఉంచిన దంప‌తులు!
ఒంగోలు స‌ర్వ‌జ‌న ఆస్ప‌త్రి లో శస్త్ర చికిత్స విజ‌య‌వంతం
Rare Surgical Success | ఒంగోలు బ్యూరో, ఆంధ్ర‌ప్ర‌భ : సాధార‌ణంగా ప్ర‌భుత్వ ఆస్ప‌త్రులు.. అందులో ప‌నిచేస్తున్న వైద్యులు అంటే ఓ చిన్న‌చూపు! కానీ అదే ప్ర‌భుత్వ వైద్యులు కార్పొరేట్ ఆస్ప‌త్రులో చికిత్స‌లు చేస్తే ల‌క్ష‌ల‌కొల‌దీ డ‌బ్బులు చెల్లిస్తుంటారు. ఒంగోలులో ఒక దంప‌తులు త‌మ ప‌సిబిడ్డ‌కు వ‌చ్చిన వ్యాధి న‌యం చేయాల‌ని ఒంగోలు (Ongole) ప్ర‌భుత్వ స‌ర్వ‌జ‌న ఆస్ప‌త్రిని ఆశ్ర‌యించారు. దీనికి అరుదైన శ‌స్ర్త చికిత్స చేయాల్సి ఉంటుంద‌ని వైద్యులు తెలిపారు. దీనికి అంగీక‌రిస్తే శ‌స్త్ర‌చికిత్స చేస్తామ‌ని వైద్యులు చెప్పారు. ఇందుకు ఆ దంప‌తులు ప్ర‌భుత్వ వైద్యుల‌పై నమ్మకం ఉంచి శ‌స్ర్త చికిత్స చేయించ‌డానికి అంగీక‌రించారు. దీంతో వైద్యుల బృందం రంగంలోకి దిగి విజ‌య‌వంతంగా శ‌స్త్ర‌చికిత్స చేశారు.
పుట్టుకతో…
మార్కాపురానికి చెందిన దంపతులకు జన్మించిన బాబుకు పుట్టకతో PUJO (Pelvi-Ureteric Junction Obstruction) వ్యాధి ఉన్నట్టు వైద్యులు గుర్తించారు. దీన్ని కారణంగా కిడ్నీ నుండి మూత్రం బయటికి వచ్చే మార్గం (ureter) ప్రవేశద్వారం వద్ద ( Pelvi-Ureteric Junction) సన్నగా అవడం, బ్లాక్ అవడంతో మూత్రం కిడ్నీలోనే నిలిచిపోతుంది. కిడ్నీ వాపు వస్తుంది. దీనితో పొట్ట వాపు, మూత్రం తగ్గడం, బరువు పెరగకపోవడం, కిడ్నీ పని తీరు మందగించడం లాంటి సమస్యలు ఉత్ప‌న్న‌మ‌వుతాయి. ఈ సమస్యను గుర్తించిన తల్లిదండ్రులు పలు ఆసుపత్రులు తిరిగాక , ఖర్చు తో కూడిన వైద్యం అన్న నిర్ధారణకు వచ్చారు. దీనికి కార్పొరేట్ ఆసుపత్రుల్లో రెండు లక్షలకు పైగా ఖర్చు అవుతుంది అని నేరుగా ఒంగోలు జి జి హెచ్ లోని యూరాలజీ విభాగం వైద్యులు డాక్టర్ గొలిమి కిరణ్ కుమార్ ను సంప్రదించారు. పలు పరీక్షల అనంతరం PUJO (Pelvi-Ureteric Junction Obstruction) వ్యాధి ని గుర్తించారు. ఇందుకు శస్త్ర చికిత్స మాత్రమే మార్గమని భావించి తల్లిదండ్రుల అంగీకారంతో శస్త్ర చికిత్స చేశారు.
వైద్యుల బృందానికి అభినంద‌న‌లు…
ఒంగోలు ప్ర‌భుత్వ ఆస్ప‌త్రిలో యూరాలజీ వైద్యులు ఆర్‌.కిరణ్ గొలిమి ( r.Kiran Golimi – Associate professor), డాక్టర్ రాసోల్ (Dr.Rasool – Assistant Professor), డాక్టర్ జ‌య‌సుంద‌రం (Anaesthesia—professor) , డాక్టర్ హిమ‌బిందు ( Dr.Himabindu -Assistant Professor) లు వైద్యుల బృందం చికిత్స చేసింది. బ్లాక్ అయిన భాగాన్ని కట్ చేసి, కొత్తగా పెద్దదిగా ఓపెనింగ్ చేసి, యూరేటర్‌ను కిడ్నీతో మళ్లీ జత చేయ‌డం ద్వారా బాబు సాధారణ స్థితికి చేరుకున్నారు. శస్త్ర చికిత్స చేసిన వైద్యుల బృందాన్ని సూప‌రింటిండెంట్ డాక్టర్ మాణిక్యరావు, డిప్యూటీ సూప‌రింటిండెంట్ డాక్టర్ ప్రభాకర్, డాక్టర్ ఏడుకొండల రావు లు అభినందించారు.
