ఛత్తీస్‌గఢ్‌లో భారీ సంఖ్యంలో మావోయిస్టులు లొంగిపోయారు. దక్షిణ బస్తర్ ప్రాంతానికి చెందిన మొత్తం 37 మంది మావోయిస్టులు దంతేవాడ జిల్లా ఎస్పీ గౌరవ్ రాయ్ సమక్షంలో ప్రభుత్వ అధికారుల ముందు లొంగిపోయారు.
లొంగిపోయిన వారిలో 27 మంది యాక్టివ్ మావోయిస్టులు ఉండడం విశేషం. వీరిలో పలువురిపై మొత్తంగా రూ. 65 లక్షల వరకు రివార్డులు ఉన్నట్లు పోలీసులు తెలిపారు. క్రియాశీల మావోయిస్టులతో పాటు, మరో 10 మంది మిలీషియా సభ్యులు కూడా హింసను వీడి ప్రభుత్వ పథకాలపై నమ్మకంతో లొంగిపోయారు.
ఈ మిలీషియా సభ్యులు గతంలో గోంపడ్, జంగంపాల్, గుడ్రూమ్ ప్రాంతాల్లో భద్రతా బలగాల కదలికలను పర్యవేక్షించడం, 2019-2020 మధ్య కాలంలో పోలీసులపై దాడులు చేయడం, IEDలు అమర్చడం వంటి మావోయిస్టు కార్యకలాపాల్లో చురుకుగా పాల్గొన్నట్లు విచారణలో వెల్లడైంది.
పోలీసుల నిరంతర ఆపరేషన్ల వల్లనే ఈ లొంగుబాట్లు సాధ్యమయ్యాయని అధికారులు పేర్కొన్నారు. దక్షిణ బస్తర్‌లో శాంతిని సాధించే దిశగా ఈ భారీ లొంగుబాటు ఒక కీలక ముందడుగుగా భద్రతా బలగాలు భావిస్తున్నాయి. రాబోయే రోజుల్లో మరింత మంది మావోయిస్టులు వ‌నం వీడి జ‌నంలోకి వస్తారనే విశ్వాసాన్ని అధికారులు వ్యక్తం చేశారు.
