శ్రీశైలానికి కార్తీక శోభ

వైభ‌వంగా లక్షదీపోత్సవం, పుష్కరిణి హారతి

నంద్యాల బ్యూరో, ఆంధ్రప్రభ : నంద్యాల జిల్లాలోని ప్రముఖ పుణ్యక్షేత్రమైన శ్రీశైలంలోని భ్రమరాంబిక మల్లికార్జున స్వామి దేవస్థానంలో కార్తీక మూడవ సోమవారం సందర్భంగా పుష్కరిణి వద్ద దేవస్థానం లక్షదీపోత్సం మరియు పుష్కరిణిహారతి కార్యక్రమాలు నిర్వహిస్తున్నట్లు ఆలయ ఈవో శ్రీనివాసరావు తెలిపారు. లోకకల్యాణం కోసం ఈ కార్యక్రమాలు నిర్వహించబడుతున్నాయన్నారు.

లక్ష దీపోత్సవం..
ఈ దీపోత్సవ కార్యక్రమంలో పుష్కరిణి ప్రాంగణమంతా కూడా దీపాలను ఏర్పాటు చేయడం జరుగుతుందన్నారు.

పుష్కరిణి హారతి (దశవిధ హారతులు)…
సోమవారం సాయంత్రం శ్రీస్వామిఅమ్మవార్లకు మరియు పుష్కరిణికి దశవిధ హారతులు శాస్త్రోక్తంగా ఇవ్వబడుతాయన్నారు. కాగా ఈ కార్యక్రమానికి ముందుగా శ్రీస్వామిఅమ్మవార్ల ఉత్సవమూర్తులను పుష్కరిణి వద్దకు వేంచేబు చేయించి విశేషంగా పూజాదికాలు జరిపించబడుతాయన్నారు.అనంతరం శ్రీస్వామిఅమ్మవార్లకు, పుష్కరిణికి దశవిధ హారతులను ఇవ్వడం జరుగుతుందన్నారు. అనంతరం ఓంకారహారతి, నాగహారతి, త్రిశూలహారతి,నందిహారతి, సింహహారతి, సూర్యహారతి, చంద్రహారతి, కుంభహారతి, నక్షత్రహారతి, కర్పూరహారతి సమర్పించబడుతాయన్నారు.

దశహారతులు – దర్శనఫలం…

…ఓంకారహారతి…
పరబ్రహ్మ స్వరూపమైన బీజాక్షరమే ఓంకారం.
ఈ ఓంకారహారతిని దర్శించడం వలన కష్టాలన్నీ నివారించబడతాయన్నారు . సకల శుభాలు కలుగుతాయన్నారు.

…నాగహారతి…
…ఈ నాగహారతిని దర్శించడం వలన సర్పదోషాలు తొలగిపోతాయన్నారు. సంతానం కలుగుతుందన్నారు.

…త్రిశూలహారతి…
..ఈ త్రిశూలహారతిని దర్శించడం వలన అపమృత్యువు అంటే అకాలమరణం తొలగిపోతుందన్నారు. గ్రహదోషాలు నివారించబడతాయన్నారు.

…నందిహారతి…
…ఈ నందిహారతిని దర్శించడం వలన భయం, దుఃఖము ఉండవు. ఆనందం, ఉత్సాహం లభిస్తాయన్నారు.

…సింహహారతి…
….ఈ సింహహారతిని దర్శించడం వలన శత్రుబాధలు తొలగుతాయన్నారు. మనో ధైర్యం కలుగుతుందన్నారు .

…సూర్య హారతి…
…ఈ సూర్య హారతిని దర్శించడం వలన ఆరోగ్యం చేకూరుతుందన్నారు . దీర్ఘాయుష్షు లభిస్తుంది.

…చంద్రహారతి…
….ఈ చంద్రహారతి దర్శించడం వలన మనశ్శుద్ధి కలిగి, ఈర్ష్య, అసూయ ద్వేషాలు తొలగిపోతాయన్నారు . మానసిక ప్రశాంతత లభిస్తుందన్నారు.

…కుంభహారతి…
…ఈ కుంభహారతిని దర్శించడం వలన కోరుకున్న కోరికలు నెరవేరుతాయన్నారు. సంపదలు కలుగుతాయి.

…నక్షత్రహారతి…
…ఈ నక్షత్రహారతిని దర్శించడం వలన జాతక దోషాలు తొలగిపోతాయన్నారు. చేపట్టిన పనులలో విజయం లభిస్తుందన్నారు.

..కర్పూరహారతి…
…ఈ కర్పూరహారతిని దర్శించడం వలన పాపాలన్నీ తొలగిపోతాయన్నారు. యజ్ఞఫలంతో పాటు అష్ట ఐశ్వర్యాలు సిద్ధిస్తాయని వేద పండితులు తెలుపుతున్నారు.