హైద‌రాబాద్‌, ఆంధ్ర‌ప్ర‌భ : ఆర్టీసీ బస్సుల చార్జీలను పెంచ‌డం అన్యాయ‌మ‌ని, ఇది పేద‌ల‌పై స‌ర్కార్ మోపిన భార‌మ‌ని మాజీ మంత్రి, బీఆర్‌ఎస్ వ‌ర్కింగ్ ప్రెసిడెంట్ , సిరిసిల్ల ఎమ్మెల్యే కె.తార‌క రామారావు మండిప‌డ్డారు. ఆయ‌న ఎక్స్ వేదిక‌గా స్పందించారు. స‌ర్కార్ తీసుకున్న ఈ నిర్ణయం పేద, మధ్య తరగతి ప్రజలపై తీవ్ర ప్రభావం చూపుతుంది. సిటీ బస్సు చార్జీలను ఒకటి కాదు రెండు కాదు ఏకంగా ఒకేసారి 10 రూపాయలు పెంచ‌డం స‌రికాద‌న్నారు.
పెరిగిన నిత్యావసర వస్తువుల ధరలతో అల్లాడుతున్న తరుణంలో ప్రతి ప్రయాణికుడిపై నెలకు 500 రూపాయల అదనపు భారం మోపితే బడుగు జీవులు ఎలా బతకాలో ముఖ్యమంత్రి సమాధానం చెప్పాలని ప్రశ్నించారు. ఫ్రీ బస్సు పథకంతో దివాళా తీసిన ఆర్టీసిని గట్టెక్కించాల్సిందిపోయి, సామాన్య ప్రయాణికుల నడ్డి విరచాలని చూడటం క్షమించరాని నేరం అని కేటీఆర్ తన ట్వీట్ లో రాసుకొచ్చారు.
