ఆరోగ్యమే మహాభాగ్యం…..
- ఫిట్ ఇండియా అవగాహన కార్యక్రమం
- శ్రీచైతన్య పాఠశాలలో వైద్యుల పిలుపు
గోదావరిఖని టౌన్ (ఆంధ్రప్రభ) : భారత ప్రభుత్వం 2019లో ప్రతిష్ఠాత్మకంగా ప్రారంభించిన “ఫిట్ ఇండియా” ఉద్యమం పిల్లలు, యువతలో ఆరోగ్య చైతన్యం పెంపొందించేందుకు చేపట్టిన ప్రథమ ప్రయత్నంగా ప్రశంసలు పొందింది. ఈ నేపథ్యంలో విద్యా ప్రణాళికలో భాగంగా శ్రీచైతన్య పాఠశాలలు శనివారం ‘ఫిట్ ఇండియా అవగాహన కార్యక్రమం’ను ఘనంగా నిర్వహించాయి.
ఈ కార్యక్రమంలో రామగుండం మెడికల్ కాలేజ్కు చెందిన శిశువైద్య విభాగం అసిస్టెంట్ ప్రొఫెసర్ డాక్టర్ శిరీష, ప్రసిద్ధ యూరాలజిస్ట్ డాక్టర్ గోపికాంత్ ముఖ్య అతిథులుగా పాల్గొన్నారు. పాఠశాల యాజమాన్యం, ఉపాధ్యాయులు, విద్యార్థులు అధికంగా తరలి వచ్చి కార్యక్రమాన్ని విజయవంతం చేశారు.
పిల్లలు ఫిట్ అయితే… దేశ భవిష్యత్తు ఫిట్ అవుతుంది
ఈ సందర్భంగా విద్యార్థులను ఉద్దేశించి మాట్లాడిన డాక్టర్ శిరీష మాట్లాడుతూ, “ఆరోగ్యం అనేది మనిషి జీవితంలో అత్యంత ముఖ్యమైన సంపద. శారీరక ఆరోగ్యంతో పాటు మానసిక ఆరోగ్యాన్ని కూడా తగ్గకుండా చూసుకోవాలి. చిన్నప్పుడే ఆరోగ్యకరమైన ఆహారం, నిత్య వ్యాయామం, క్రమబద్ధమైన జీవనశైలి అలవాటు చేసుకుంటే భవిష్యత్తులో పెద్దగా ఆరోగ్య సమస్యలు ఎదురుకావు” అని అన్నారు.
జంక్ ఫుడ్ మన దేహానికే కాకుండా మెదడు పనితీరును కూడా దెబ్బతీస్తుందని ఆమె హెచ్చరించారు. విద్యార్థుల వయస్సులోనే యోగా, ప్రాణాయామాలు, ఆటలు వంటి శారీరక కార్యకలాపాలు అత్యంత అవసరమని చెప్పారు. “పిల్లలు ఫిట్గా ఉంటేనే వారి భవిష్యత్తు ఫిట్గా ఉంటుంది. అలా ఫిట్గా పెరిగిన పిల్లలు మన దేశ భవిష్యత్తులో కూడా ఆరోగ్యవంతులైన పౌరులుగా మారతారు. పిల్లలు ఫిట్, కుటుంబం ఫిట్, సమాజం ఫిట్, అలా దేశం ఫిట్ అవుతుంది” అని ఆమె హితవు పలికారు.
శరీరానికి నీరు, వ్యాయామానికి సమయం తప్పనిసరి
డాక్టర్ గోపికాంత్ మాట్లాడుతూ, చిన్న వయస్సులోనే శరీరానికి తగినంత నీరు త్రాగడం, సరైన సమయానికి నిద్రించడం, మానసిక ప్రశాంతతను పెంపొందించుకోవడం వంటి ఆరోగ్య రక్షణ చర్యలు అలవాటు చేసుకోవాలని సూచించారు. “శారీరక చురుకుదనం పెరగడం అంటే మనోబలాన్నీ, ఆత్మవిశ్వాసాన్ని కూడా పెంపొందించడం. ప్రతి ఒక్కరూ ఫిజికల్ యాక్టివిటీస్లో పాల్గొని, శరీరంలోని మలినాలను చెమట ద్వారా బయటికి పంపడం అలవాటు చేసుకోవాలి” అని తెలిపారు.
విద్యార్థుల చురుకైన స్పందన
వైద్యుల ప్రసంగానికి విద్యార్థులు ఉత్సాహంగా స్పందించారు. శరీరాన్ని బలంగా ఉంచే ఆహారం ఏంటీ? రోజుకు ఎంత గంటల వ్యాయామం అవసరం? యోగా ప్రయోజనాలు ఏమిటి? వంటి పలు ప్రశ్నలు అడిగి, నిపుణుల సూచనలు పొందారు.
కార్యక్రమం చివరలో పాఠశాల ప్రిన్సిపాల్ మాట్లాడుతూ, “ఫిట్ ఇండియా వంటి కార్యక్రమాలు మన చిన్నారులను ఆరోగ్యవంతులుగా తీర్చిదిద్దడానికి ఎంతో ఉపయుక్తం. విద్యతో పాటు ఆరోగ్యం కాపాడుకోవడం కూడా అంతే ముఖ్యం. ఈ కార్యాచరణ విద్యార్థులలో సానుకూల మార్పులకు దోహదపడుతుందని విశ్వసిస్తున్నాము” అని తెలిపారు.
