వినాయక స్వామి ఆలయం మూత..

వినాయక స్వామి ఆలయం మూత..

గ్రహణం సందర్భంగా జిల్లాలో పలు ఆలయాల మూత

ఆంధ్రప్రభ బ్యూరో, చిత్తూరు : ఈ సంవత్సరానికి చెందిన అత్యంత ముఖ్యమైన ఖగోళ సంఘటనలలో ఒకటైన సంపూర్ణ చంద్రగ్రహణం (బ్లడ్ మూన్) మంగళవారం సంభవించడంతో చిత్తూరు జిల్లాలోని పలు ప్రధాన ఆలయాలు సంప్రదాయం ప్రకారం మూతపడ్డాయి. ముఖ్యంగా ప్రసిద్ధ పుణ్యక్షేత్రమైన కాణిపాకం వరసిద్ధి వినాయక స్వామి ఆలయం గ్రహణ సమయంలో పూర్తిగా మూసివేయబడింది. ఆలయ ప్రధాన ద్వారాలకు తాళాలు వేసి, నిత్యపూజలను తాత్కాలికంగా నిలిపివేశారు. గ్రహణం ముగిసిన అనంతరం ఆలయ ప్రాంగణంలో శుద్ధి కార్యక్రమాలు నిర్వహించి, సంప్రోక్షణ అనంతరం భక్తులకు తిరిగి దర్శనాన్ని అనుమతీస్తారు.

పౌర్ణమి రోజున సంభవించిన ఈ చంద్రగ్రహణం ఖగోళ పరంగా విశేషమైన సహజ ప్రక్రియగా శాస్త్రవేత్తలు పేర్కొంటున్నారు. భూమి సూర్యుడు, చంద్రుడి మధ్యకు రావడంతో చంద్రుడిపై పడే సూర్యకాంతి ఆవరిస్తుంది. ఈ సమయంలో చంద్రుడు మసకబారినట్టుగా, కొన్నిసార్లు ఎర్రటి వర్ణంలో దర్శనమివ్వడం వల్ల దీనిని “బ్లడ్ మూన్”గా కూడా పిలుస్తారు. భారత కాలమానం (ఐఎస్టీ) ప్రకారం గ్రహణం మధ్యాహ్నం 3 గంటల 20 నిమిషాలకు ప్రారంభమై, సాయంత్రం 4 గంటల 34 నిమిషాలకు సంపూర్ణ స్థితి ప్రారంభమైంది. ఈ సంపూర్ణ స్థితి సాయంత్రం 5 గంటల 33 నిమిషాల వరకు కొనసాగి, గ్రహణం సాయంత్రం 6 గంటల 48 నిమిషాలకు పూర్తిగా ముగిసింది. పలు గంటలపాటు కొనసాగిన ఈ గ్రహణం ఆధ్యాత్మికంగా విశేషమైనదిగా పండితులు పేర్కొన్నారు.

భారతదేశంలో ఈ చంద్రగ్రహణం గ్రస్తోదయంగా కనిపించింది. అంటే చంద్రుడు ఉదయించే సమయానికి గ్రహణం కొనసాగుతుండటంతో సాయంత్రం చంద్రోదయం తర్వాత మాత్రమే ప్రజలకు దర్శనమిచ్చింది. ఢిల్లీ, ముంబై, బెంగళూరు, చెన్నై, హైదరాబాద్ వంటి ప్రధాన నగరాల్లో సుమారు సాయంత్రం 6:20 నుంచి 6:30 గంటల మధ్య చంద్రోదయం జరిగిన తరువాత కొద్ది నిమిషాలపాటు మాత్రమే గ్రహణాన్ని వీక్షించే అవకాశం లభించింది. అయితే అస్సాం, మేఘాలయ, అరుణాచల్ ప్రదేశ్ వంటి ఈశాన్య రాష్ట్రాల్లో చంద్రోదయం ముందుగానే జరుగుతుండటంతో అక్కడ కొంత ఎక్కువ సమయం గ్రహణం దర్శనమిచ్చినట్లు ఖగోళ నిపుణులు తెలిపారు.

ఖగోళ శాస్త్రపరంగా చంద్రగ్రహణం సహజ ప్రక్రియ మాత్రమేనని, దీనిని నేరుగా చూడటానికి ఎటువంటి హాని ఉండదని శాస్త్రవేత్తలు స్పష్టం చేస్తున్నారు. అయితే హిందూ సంప్రదాయంలో చంద్రగ్రహణానికి ప్రత్యేక ఆధ్యాత్మిక ప్రాముఖ్యత ఉంది. గ్రహణ కాలాన్ని పవిత్ర సమయంగా భావిస్తూ జపం, ధ్యానం, దానం చేయడం శ్రేయస్కరంగా పరిగణిస్తారు. “ఓం చంద్రాయ నమః” మంత్రజపం, శివుని ధ్యానం, గాయత్రీ మంత్ర జపం చేయడం శుభప్రదమని పండితులు సూచించారు. గ్రహణం అనంతరం పవిత్ర స్నానం చేయడం, దానం చేయడం, ఇంటిని శుభ్రపరచడం వంటి ఆచారాలు అనాదిగా కొనసాగుతున్నాయి.

చంద్రగ్రహణం సందర్భంగా జిల్లాలోని ఇతర ప్రధాన ఆలయాలైన చిత్తూరు పట్టణంలోని శ్రీ వరదరాజ స్వామి దేవాలయం, గుడిపాల గంగమ్మ దేవాలయం, పూతలపట్టు లక్ష్మీనరసింహ స్వామి దేవాలయం, పెనుమూరు కోదండరామ స్వామి దేవాలయం, బంగారుపాళ్యం చౌడేశ్వరి అమ్మవారి దేవాలయం, సోమల సోమేశ్వర స్వామి దేవాలయం, పలమనేరు శ్రీ వెంకటేశ్వర స్వామి దేవాలయం, కుప్పం ప్రసన్న వెంకటేశ్వర స్వామి దేవాలయం, రామకుప్పం రామలింగేశ్వర స్వామి దేవాలయం, వెదురుకుప్పం గంగమ్మ దేవాలయం, గంగవరం రామాలయం, పెద్దపంజాని సుబ్రహ్మణ్య స్వామి దేవాలయం తదితర ఆలయాల్లో కూడా గ్రహణ సమయంలో ద్వారాలు మూసివేశారు.

గ్రహణం ముగిసిన తరువాత ఆలయ ప్రాంగణాల్లో శుద్ధి, సంప్రోక్షణ కార్యక్రమాలు నిర్వహించి, ప్రత్యేక పూజలు చేసిన అనంతరం భక్తులకు దర్శనాన్ని పునరుద్ధరించారు. గ్రామీణ ప్రాంతాల్లోనూ గంగమ్మ, పొలేరమ్మ, మునేశ్వర స్వామి, శివాలయాలు సంప్రదాయం ప్రకారం మూత పడ్డాయి.అనంతరం శుద్ధి చేసి తిరిగి తెరవడం జరుగుతుంది. మొత్తంగా సంపూర్ణ చంద్రగ్రహణం ఖగోళ అద్భుతం అయినప్పటికీ, ఆధ్యాత్మిక విశ్వాసాలు, ఆలయ సంప్రదాయాలు, శాస్త్రీయ అవగాహన అన్నీ కలిసిన నేపథ్యంలో చిత్తూరు జిల్లాలో పలు ఆలయాలు గ్రహణ సమయంలో మూసివేయబడి, అనంతరం సంప్రోక్షణ అనంతరం భక్తులకు తిరిగి దర్శనాన్ని కల్పించడం జరిగింది.