దీపావళి పండుగను ఆనందంగా జరుపుకోండి….
దీపావళి పండుగను ఆనందంగా జరుపుకోండి….
- బాణాసంచా విక్రయాల్లో అప్రమత్తత అవసరం
- టపాసులు విక్రయాల్లో జాగ్రత్తలు పాటించండి
- ఆస్తి, ప్రాణ నష్టాలు జరుగ కుండ చర్యలు చేపట్టండి
- వరంగల్ పోలీస్ కమిషనర్ సన్ ప్రీత్ సింగ్
వరంగల్ క్రైమ్, (ఆంధ్రప్రభ) : బాణసంచా అమ్మకంలో భద్రతా ప్రమాణాలు పాటించాలని వరంగల్ పోలీస్ కమిషనర్ సన్ప్రీత్ సింగ్ విక్రేతలకు సూచించారు. బాణసంచా అమ్మకాలలో నిర్లక్ష్యం, బాధ్యతారాహిత్యాన్ని సహించేది లేదని ఆయన హెచ్చరించారు.
భద్రత, రక్షణ, సంరక్షణ విషయంలో రాజీ పడకూడదన్నారు. దీపావళి పండుగ సమీపిస్తున్న తరుణంలో, వరంగల్ పోలీస్ కమిషనర్ సన్ప్రీత్ సింగ్ కమిషనరేట్ కార్యాలయంలో కమిషనరేట్ పరిధిలోని పటాకుల విక్రేతలతో ప్రత్యేక సమావేశం నిర్వహించారు.
ఈ సమావేశంలో అగ్నిమాపక, పోలీస్ అధికారులు పాల్గోన్నారు. బాణసంచా అమ్మే వారందరూ తప్పనిసరిగా పర్మిట్లు తీసుకోవాలని వరంగల్ పోలీస్ కమిషనర్ సన్ప్రీత్ సింగ్ అన్నారు. పర్మిట్ల కోసం, వ్యాపాస్తులు ముందుగా అగ్నిమాపక శాఖ అధికారుల నుండి నాన్-డిస్క్లోజర్ సర్టిఫికెట్ పొందాలి.
అలాగే వ్యాపారస్తులు సంబంధిత స్థల యజమాని నుండి అనుమతి పత్రాన్ని తీసుకోవాలని, ప్రభుత్వ స్థలంలో దుకాణాలు ఏర్పాటు చేస్తుంటే సంబంధిత ప్రభుత్వ అధికారుల నుండి అనుమతి పొందాలని కూడా ఆయన గుర్తు చేశారు. భవనాల్లో వ్యాపారాలు నిర్వహించాలనుకునే వారు ముందుగా భవనం ఇరువైపులా ఉన్న ఇంటి యజమానుల అనుమతితో, భవన బ్లూప్రింట్, ఎనిమిది వందల రూపాయల ప్రభుత్వ బ్యాంకు డ్రాఫ్ట్తో దరఖాస్తు చేసుకోవాలని సూచించారు.
ముఖ్యంగా, విక్రేతలు అగ్ని ప్రమాదాలను నివారించడానికి.. అమ్మకాలు నిర్వహించే ప్రదేశంలో ఇసుక, నీరు, ఇతర అగ్నిమాపక పరికరాలు అందుబాటులో ఉండేలా చూసుకోవాలన్నారు. వీలైనంత వరకు, వ్యాపారవేత్తలు ఇరుకైన ప్రదేశాలలో కాకుండా విశాలమైన ప్రాంతాలలో తమ వ్యాపారాన్ని నిర్వహించుకోవాలని సూచించారు.
గత అనుభవాలను దృష్టిలో ఉంచుకోని వ్యాపారస్తులు అప్రమత్తంగా ఉండాలని… బాణసంచా వ్యాపారుల వల్ల ఎటువంటి నష్టం లేదా ప్రమాదాలు జరగకుండా చూసుకోవడమే పోలీసుల ప్రధాన లక్ష్యం అని పోలీస్ కమిషనర్ సన్ప్రీత్ సింగ్ స్పష్టం చేశారు.
ప్రధానంగా ఎటువంటి అనుమతి లేకుండా బాణసంచా వ్యాపారం చేసే వారిపై కఠిన చట్టపరమైన చర్యలు తీసుకుంటామని హెచ్చరించారు. ఈ మేరకు టాస్క్ ఫోర్స్ పోలీసులు ప్రత్యేక తనిఖీలు నిర్వహిస్తారని ఆయన అన్నారు. పర్మిట్లు లేకుండా బాణసంచా వ్యాపారాన్ని నిర్వహిస్తున్న ఎవరైనా ఉంటే సమాచారం ఇవ్వాలని పోలీస్ కమిషనర్ సన్ప్రీత్ సింగ్ పోలీసులను కోరారు.
ఇక దీపావళి పండుగ సందర్భంగా ప్రజలు అప్రమత్తంగా ఉండాలని కోరారు. ముఖ్యంగా బాణసంచా కాల్చేటప్పుడు సరైన జాగ్రత్తలు తీసుకోవాలని సూచించారు. చిన్నారులు బాణసంచా కాల్చేటప్పుడు పెద్దలు వారితోనే ఉండి, తగిన జాగ్రత్తలు తీసుకుని, ఆనందం, వేడుకల మధ్య దీపావళి జరుపుకోవాలని కోరుతున్నా అని వరంగల్ పోలీస్ కమిషనర్ సన్ప్రీత్ సింగ్ అన్నారు.
ఈసమావేశంలో డీసీపీలు అంకిత్ కుమార్, రాజమహేంద్ర నాయక్, జిల్లా అగ్నిమాపక అధికారులు సుదర్శన్ రెడ్డి, శ్రీధర్ రెడ్డి, అదనపు డీసీపీ రవి, వరంగల్ ఏ ఎస్పీ శుభంతో పాటు ఏసీపీలు డాక్టర్ జితేందర్ రెడ్డి, ప్రశాంత్ రెడ్డి, నర్సింహారావు, ఇన్స్ స్పెక్టర్లు, వ్యాపారస్తులు పాల్గొన్నారు.
