DEMAND | సీసీఐ నిబంధనలు సడలించాలి
తేమ శాతంతో నిమిత్తం లేకుండా పత్తిని కొనుగోలు చేయాలి
కపాస్ కిసాన్ ను రద్దు చేయాలి
ఏపీ రైతు సంఘం జిల్లా ప్రధాన కార్యదర్శి జీ. రామకృష్ణ డిమాండ్
DEMAND | కర్నూలు బ్యూరో, ఆంధ్రప్రభ : ఆంధ్రప్రదేశ్ రైతు సంఘం ప్రతినిధి బృందం గూడూరు మండలం పెంచికలపాడు దగ్గర ఉన్న సీసీఐ (CCI) కొనుగోలు కేంద్రాన్ని పరిశీలన చేసి.. తక్షణమే నిబంధనలు సడలించి, తేమశాతంతో నిమిత్తం లేకుండా పూర్తిగా కొనుగోలు చేయాలని, రైతులకు ఇబ్బందిగా ఉన్న కపాస్ కిసాన్‌ను రద్దు చేయాలని ఏపీ రైతు సంఘం జిల్లా ప్రధాన కార్యదర్శి రామకృష్ణ, జిల్లా సహాయ కార్యదర్శి ఏ.కృష్ణ, జిల్లా నాయకులు మార్కండేయులు, డీవైఎఫ్ఐ నాయకులు అనిల్, సీసీఐ కోడుమూరు మండల కార్యదర్శి రాజు తదితరులు ఆదివారం డిమాండ్ చేశారు.
ఈ సందర్భంగా వారు మాట్లాడుతూ ఈ సంవత్సరం కర్నూలు జిల్లాలో మొత్తం సాగు భూమిలో సగం పత్తి పంట (Cotton crop) సాగు చేశార‌ని, దురదృష్టవశాత్తు మంచి దిగుబడి వస్తుందని ఆశించిన రైతులకు వ‌ర్షాల కారణంగా నాణ్యత దెబ్బతినిందని వారు ఆందోళన వ్యక్తం చేశారు ప్రభుత్వం పత్తి రైతులను ఆదుకోవాల్సింది పోయి.. రకరకాల నిబంధనలు పెట్టి ఇబ్బందులకు గురిచేసి కొనుగోలు చేయకుండా వెనక్కు పంపుతున్నారని ఆందోళన వ్యక్తం చేశారు. ఆదోని ఎమ్మిగనూరు మంత్రాలయం పెంచికలపాడు దగ్గర సీసీఐ కొనుగోలు కేంద్రాలు ఏర్పాటు చేసి 8110 రూపాయలు మద్దతు ధర ఇస్తామని ప్రభుత్వం ప్రకటించింది. కానీ అత్యధిక రైతులకు మద్దతు ధర అందడం లేదని వారు వాపోయారు. తేమశాతం పేరుతో కొర్రీలు పెడుతున్నార‌ని వారు తెలిపారు.
కాపాస్ కిసాన్ యాప్ (Kisan App) స్లాట్ సరిగా పనిచేయకపోవడం కారణంగా రైతులు రెండు మూడు రోజులపాటు కొనుగోలు కేంద్రం వ‌ద్ద పడిగాపులు కాయాల్సిన పరిస్థితి వస్తుందని వారు తెలిపారు. నాణ్యత ఉన్న పత్తిని కూడా కొనుగోలు చేయకుండా రిజెక్ట్ చేయడం, దళారుల చేతుల్లో పెట్టడం.. ఫలితంగా సరైన ధర రాక రైతులు నష్టపోతున్నారు. అదే పత్తిని దళారులు సీసీఐ కొనుగోలు కేంద్రానికి తీసుకువస్తే మంచి రేటు తోని కొనుగోలు చేస్తున్నారని, దీనిపైన ఉన్నతాధికారులు జోక్యం చేసుకోవాలని వారన్నారు. గౌరవ కలెక్టర్ 14, 15 శాతం కూడా కొనుగోలు చేయండి అని చెప్పిన మాటకు సీసీఐ కొనుగోలు కేంద్రం దగ్గర విలువ లేకుండా పోతుందన్నారు. ఇప్పటికైనా పత్తి రైతులను ఆదుకునేందుకు నిర్దిష్టమైన చర్యలు తీసుకొని న్యాయం చేయాలని వారు డిమాండ్ చేశారు. లేదంటే పెద్ద ఎత్తున ఆందోళన చేపడుతామని తెలియజేశారు. డిసెంబర్ ఒకటో తేదీన పత్తి రైతుల సమస్య ప‌రిష్క‌రించాల‌ని, ఉల్లి రైతులకు రావలసిన డబ్బులు ఇవ్వాల‌ని, మొక్కజొన్న కొనుగోలు కేంద్రాలు ఏర్పాటు చేయాలని కలెక్టర్ కార్యాలయం ఎదుట చేప‌డుతున్న ధర్నాకు రైతులు పెద్ద ఎత్తున హాజరై విజయవంతం చేయాలని రామకృష్ణ విజ్ఞప్తి చేశారు. కార్యక్రమంలో పెద్ద కొట్టాల రామకృష్ణారెడ్డి, శీను, మహేశ్వర్ రెడ్డి పర్ల, కోడుమూరు, సుంకేసుల, బూడిదపాడు మునగాలపాడు గ్రామాల రైతులు పాల్గొన్నారు.
