5thMarchCartoon| ఆంధ్రప్రభలో నేటి కార్టూన్ ఔరా

5thMarchCartoon | రూపాయి రికార్డు పతనం
దలాల్ స్ట్రీట్‌లో భారీ కుదుపు
యుద్ధ మేఘాలు – ఆర్థిక వ్యవస్థపై తీవ్ర ఒత్తిడి

 ఆంధ్రప్రభ వెబ్ డెస్క్ : పశ్చిమాసియా దేశాల మధ్య ముదురుతున్న యుద్ధం భారత్‌ను చిక్కుల్లోకి నెట్టింది. ఇప్పటికే ఆందోళనకర పరిస్థితులు నెలకొన్న నేపథ్యంలో రూపాయి విలువ చరిత్రలో ఎప్పుడూ లేనంతగా రికార్డు స్థాయిలో పతనమైంది. ప్రస్తుతం డాలర్‌తో పోల్చితే రూపాయి విలువ ఏకంగా 92 దాటడం దేశ ఆర్థిక వర్గాల్లో తీవ్ర కలకలం రేపుతోంది.

మార్కెట్ నిపుణుల ప్రకారం ఇరాన్–ఇజ్రాయెల్–అమెరికా యుద్ధం, ముడి చమురు ధరల ఎగసిపడటం, దేశీయ ఈక్విటీ మార్కెట్లలో భారీ అమ్మకాలు, విదేశీ పెట్టుబడిదారులు నిధులను ఉపసంహరించుకోవడం వంటి కారణాలే రూపాయి ఈ భారీ పతనానికి ప్రధాన కారకాలు.

భారత్ నిర్వహించే అంతర్జాతీయ లావాదేవీలన్నీ డాలర్‌పై ఆధారపడి ఉండటం పరిస్థితిని మరింత సున్నిత దశలోకి నెడుతోంది. రూపాయి 92 దాటడం వల్ల దిగుమతుల వ్యయం పెరిగి దేశ ఆర్థిక వ్యవస్థపై అదనపు భారంగా మారే ప్రమాదం ఉందని విశ్లేషకులు హెచ్చరిస్తున్నారు.

ఈ యుద్ధం మరికొన్ని రోజులు కొనసాగితే మార్కెట్లు మరింత కుంగిపోయే ప్రమాదం ఉందని అంచనా. ఇప్పటికే మూడు రోజులుగా భారతీయ స్టాక్ మార్కెట్లు నష్టాల మబ్బుల్లో కూరుకుపోయాయి.

ప్రపంచవ్యాప్తంగా ముదురుతున్న యుద్ధ మేఘాలు దేశీయ స్టాక్ మార్కెట్లను కుదిపేస్తున్నాయి. ఇవాళ ట్రేడింగ్‌లో దలాల్ స్ట్రీట్ చరిత్రలో నిలిచిపోయేలా ఒక భారీ పతనం నమోదైంది. ఇన్వెస్టర్ల లక్షల కోట్ల సంపద ఆవిరైపోవడం మార్కెట్లో భయాందోళన వాతావరణం సృష్టించింది.

అయితే ఆర్థిక నిపుణులు ఒక ఆశాజనక సంకేతం కూడా చూపిస్తున్నారు. పరిస్థితులు సద్దుమణిగితే మార్కెట్లు తిరిగి కోలుకునే సామర్థ్యం ఉందని చెబుతున్నారు. కానీ ప్రస్తుతం మాత్రం దేశ ఆర్థిక వ్యవస్థ ఒక సంక్షోభ దశను ఎదుర్కొంటోందని స్పష్టమవుతోంది.

 మొత్తంగా చూస్తే — ఒక వైపు యుద్ధం, మరోవైపు ఆర్థిక ఒత్తిడి. రూపాయి పతనం, మార్కెట్ కుదుపులు దేశాన్ని ఒక ప్రమాదకర మలుపు వైపు నెడుతున్నాయా? అన్నది రాబోయే రోజుల్లో తేలనుంది

ఒక ప్రమాదకర సంక్షోభ దశను చూపించిన ఆంధ్రప్రభ కార్టూన్ ఇది.

గత రెండు దశాబ్ధాలుగా ఆంధ్రప్రభ పాఠకులను, కార్టూన్ ఇష్టులను అలరిస్తోన్న కార్టూన్ ఫీచర్ ఔరా..