ఇంద్రకీలాద్రిపై పుష్పార్చన వైభవం…

ఇంద్రకీలాద్రిపై పుష్పార్చన వైభవం…

8 రోజున దుర్గమ్మకు విశేష పుష్పార్చన.
సంపంగి,చామంతి పరిమళాలతో దుర్గామాత అర్చన
వేదఘోషల మధ్య ఆధ్యాత్మిక శోభ
భక్తులకు ఇబ్బందులేకుండా విస్తృత ఏర్పాట్లు

ఇంద్రకీలాద్రి, ఆంధ్రప్రభ : వసంత నవరాత్రి ఉత్సవాల సందర్భంగా శ్రీ కనకదుర్గమ్మ దేవస్థానం సన్నిధిలో 8 రోజు నిర్వహించిన పుష్పార్చన మహోత్సవం అపూర్వ ఆధ్యాత్మిక వైభవంతో భక్తులను మంత్రముగ్ధులను చేసింది. లోకపావని దుర్గామాతకు అంకితమైన ఈ విశిష్ట అర్చనలో భక్తిశ్రద్ధలు ఉప్పొంగి, ఆలయ ప్రాంగణం పవిత్రతతో నిండిపోయింది. ఈ సందర్భంగా ఆలయ చైర్మన్ బొర్రా రాధాకృష్ణ (గాంధీ), కార్యనిర్వహణాధికారి వి.కె. సీనా నాయక్‌తో పాటు ట్రస్ట్ బోర్డు సభ్యులు పాల్గొని అమ్మవారికి ప్రత్యేక పూజలు సమర్పించారు.

సంపంగి, చామంతి వంటి సుగంధ పుష్పాలతో అమ్మవారిని అలంకరించగా, ఆ రంగుల సమ్మేళనం భక్తులకు కనువిందుగా నిలిచింది. వేద మంత్రోచ్ఛారణల నడుమ జరిగిన పుష్పార్చనలో ప్రతి ఘట్టం ఆధ్యాత్మిక గంభీరతను ప్రతిబింబించింది. పుష్పాల పరిమళాలు, ఘంటానాదాలు కలిసిపోవడంతో ఆలయం అంతా దివ్యానుభూతిని ప్రసరించింది.

భక్తుల రద్దీని దృష్టిలో ఉంచుకుని ఎటువంటి అంతరాయం కలగకుండా ఆలయ అధికారులు ప్రత్యేక చర్యలు చేపట్టారు. చైర్మన్, ఈఓలు స్వయంగా ఏర్పాట్లను పర్యవేక్షిస్తూ భక్తులకు సౌకర్యవంతమైన దర్శనం కల్పించారు. ఈ పవిత్ర సందర్భంలో సమస్త ప్రజలకు అమ్మవారి కృపాకటాక్షాలు కలగాలని ఆలయ అధికారులు ఆకాంక్షించారు.