Election | అక్క‌డ 11 ఏళ్ల తర్వాత.. !
ఉట్నూర్ మేజర్ గ్రామ పంచాయతీకి ఎన్నికలు
పెరిగిన పోటీ.. బరిలో నిలిచేది ఎందరో..?
Election | ఉట్నూర్, ఆంధ్రప్రభ : ఆదిలాబాద్ జిల్లా ఉట్నూర్ మేజర్ గ్రామపంచాయతీకి ఎన్నికలు 11 ఏళ్ల తర్వాత జరుగుతున్నాయి. గత రెండు దఫాలు ఉట్నూర్ మేజర్ గ్రామపంచాయతీని మున్సిపాలిటీగా చేయడానికి ప్రతిపాదనలు పంపగా, దాని కారణంతో మేజర్ గ్రామపంచాయతీ కి ఎన్నికలు జరగలేదు. ఏజెన్సీ ప్రాంతం కావడంతో కొందరు కోర్టుకు వెళ్లగా.. ఉట్నూర్ మేజర్ గ్రామపంచాయతీ మున్సిపాలిటీ (Municipality) కాలేదు. దీంతో ప్రభుత్వం ఈసారి ఎన్నికల నిర్వహణకు నోటిఫికేషన్ విడుదల చేసింది. 11 ఏళ్ల తర్వాత ఉట్నూర్ మేజర్ గ్రామపంచాయతీకి ఎన్నికలు రావడంతో ఈసారి సర్పంచ్ తోపాటు వార్డు మెంబర్ల ఎన్నికకు ఎక్కువ పోటీ నెలకొంది. ప్రధాన పార్టీల నాయకులు సైతం ఉట్నూర్ మేజర్ గ్రామపంచాయతీ సర్పంచ్ పదవిపై దృష్టి సారించారు. ఉట్నూర్ మేజర్ పంచాయతీ సర్పంచ్ పదవికి ఈసారి 16 మంది అభ్యర్థులు పోటీ చేయడానికి నామినేషన్లు వేయగా.. 18 వార్డు మెంబర్ల పోటీకి 65 మంది నామినేషన్లు వేసినట్లు మేజర్ గ్రామ పంచాయతీ ఈవో శంకర్ తెలిపారు. నామినేషన్ల ఉపసంహరణ తర్వాత ఎంద‌రు బరిలో ఉంటారో తెలియనుంది. ఉట్నూర్ మేజర్ గ్రామపంచాయతీ సర్పంచ్ పదవి మహిళలకు రిజర్వేషన్ కావడంతో 16 మంది నామినేషన్లు వేయగా అదే జనరల్ అయితే ఎక్కువ మంది నామినేషన్ వేసే వార‌ని నాయకులు పేర్కొంటున్నారు.
సర్పంచ్ పదవి కైవసానికి ప్రధాన పార్టీల వ్యూహం
ఉట్నూర్ మేజర్ గ్రామపంచాయతీకి 11 ఏళ్ల తర్వాత ఎన్నిక రావడంతో సర్పంచ్ పదవిని కైవసం చేసుకునేందుకు ప్రధాన పార్టీలైన కాంగ్రెస్, బీఆర్ఎస్, బీజేపీ (BJP) నేతలు ప్రత్యేక కసరత్తు చేస్తూ తమ అభ్యర్థిని గెలిపించుకునేందుకు ముందస్తు ప్రయత్నాలు కొనసాగిస్తున్నారు. కాంగ్రెస్ పార్టీ అభ్యర్థి గెలిపించుకునేందుకు ఖానాపూర్ ఎమ్మెల్యే వెడ్మ బొజ్జు పటేల్‌కు సవాల్‌గా మారింది. బీఆర్ఎస్ పార్టీ నుండి ఉట్నూర్ మాజీ జెడ్పిటీసీ చారులత రాథోడ్ బరిలో దిగగా, బీజేపీ నుంచి తమ పార్టీ అభ్యర్థిని గెలిపించేందుకు మాజీ ఎంపీ రాథోడ్ రమేష్ తనయుడు బీజేపీ నిర్మల్ జిల్లా అధ్యక్షులు రితీష్ రాథోడ్ స్థానికుడు కావడంతో ఆయనకు కూడా సర్పంచ్ పదవి గెలిపించేందుకు సవాల్ గా మారింది. ఈ ప్రధాన పార్టీల అభ్యర్థుల మధ్య ఈసారి గట్టి పోటీ ఉంటుందని రాజకీయ విశ్లేషకులు నాయకులు ప్రజలు అభిప్రాయాలు వ్యక్తం చేస్తున్నారు.
