- కలెక్టర్ బాలాజీని కోరిన వేదవ్యాస్
Dotted Lands|మచిలీపట్నం, ఆంధ్రప్రభ : అపరిస్కృతంగా ఉన్న చుక్కల భూముల సమస్యను వెంటనే పరిష్కరించాలని శాసనసభ మాజీ సభాపతి టీడీపీ రాష్ట్ర ఉపాధ్యక్షుడు బూరగడ్డ వేద వ్యాస్ కోరారు. ఈ మేరకు ఆయన బుధవారం జిల్లా కలెక్టర్ డీకే బాలాజీ ని కలుసుకొని 22 ఎ భూముల సమస్య తీవ్రత గురించి వివరించారు. జిల్లాలో గత 50 సంవత్సరాలుగా ఈ సమస్యను రైతులు ఎదుర్కొంటున్నారని అన్నారు. విభజన అనంతరం ఏర్పడిన కృష్ణాజిల్లాలోనే 18 వేల మంది రైతులు ఈ సమస్యను ఎదుర్కొంటున్నారని కలెక్టర్ కు వివరించారు.
ఇందుకు సంబంధించి దాదాపు 12 వేల ఎకరాల పాసుబుక్కులను కూడా రుద్దు చేయడం జరిగింది అన్నారు. దీంతో సంబంధిత భూములకు రిజిస్ట్రేషన్లు కూడా నిలిచిపోవడంతో రైతులు తీవ్ర ఆవేదన వ్యక్తం చేస్తున్నారని వ్యాస్ తెలిపారు. వెంటనే ఈ సమస్యను రాష్ట్ర ప్రభుత్వం దృష్టికి తీసుకెళ్లి పరిష్కారానికి చొరవ చూపాలని తాను కూడా ముఖ్యమంత్రి చంద్రబాబు నాయుడుతో మరోసారి మాట్లాడ తానని అన్నారు. అలాగే జిల్లాకు సంబంధించిన మరికొన్ని సమస్యలను కూడా కలెక్టర్ దృష్టికి తీసుకువెళ్లారు. ముఖ్యంగా పెడన నియోజకవర్గం లో రెండవ పంట సాగుకు అనుమతి ఇవ్వకపోవడం వల్ల రైతుల పడుతున్న ఆవేదనను కూడా కలెక్టర్ దృష్టిలో పెట్టారు.
