హైదరాబాద్‌, పాఠశాల విద్యాశాఖ నిర్వహించే ఉపాధ్యాయ అర్హత పరీక్ష (TET)లు నేటి నుంచి ప్రారంభమయ్యాయి 30 వరకు నిర్వహించనున్న టెట్ పరీక్షకు పాఠశాల విద్యాశాఖ అన్ని ఏర్పాట్లు చేసింది. కాగా, రాష్ట్ర వ్యాప్తంగా 15 జిల్లాల్లో 66 కేంద్రాల్లో ( 66 centers) ఈ పరీక్షలు నిర్వహిస్తున్నామని, అన్ని ఏర్పాట్లు పూర్తచేశామని టీజీటెట్‌ చైైర్‌పర్సన్‌, పాఠశాల విద్యాశాఖ సంచాలకులు నవీన్‌ నికోలస్‌ తెలిపారు.
నిర్ణీత తేదీల్లో ప్రతి రోజూ ఉదయం 9 గంటల నుంచి 11.30 గంటల వరకు సెషన్‌- 1; మధ్యాహ్నం 2గంటల నుంచి సాయంత్రం 4.30గంటల వరకు రెండో సెషన్‌ పరీక్షలు జరుగుతాయి. జూన్‌ 18, 19, 24 (మొదటి షిఫ్టు), 28, 29, 30 తేదీల్లో పేపర్‌ -2 పరీక్షలు జరగనుండగా.. జూన్‌ 20, 23, 24 (రెండో షిఫ్టు), 27 తేదీల్లో పేపర్‌ -1 పరీక్షలు నిర్వహిస్తారు. ఏప్రిల్‌ 15 నుంచి 30 వరకు టెట్‌కు దరఖాస్తులు ఆహ్వానించగా 1.83లక్షల దరఖాస్తులు వచ్చాయి. పేపర్‌ 1కు 63,261మంది, పేపర్‌-2కు 1,20,392మంది దరఖాస్తు చేసుకోగా.. రెండు పేపర్లకు దరఖాస్తు చేసినవారు 15వేల మంది వరకు ఉన్నట్లు అధికారులు పేర్కొన్నారు.
