Rare Surgery |పురుషాంగం పునఃసృష్టి.. హైదరాబాద్ లో అరుదైన శస్త్రచికిత్స
హైదరాబాద్- : చిన్నతనంలో సున్తీ కారణంగా ఇన్‌ఫెక్షన్‌ సోకడం వల్ల కోల్పోయిన పురుషాంగాన్ని మెడికవర్‌ వైద్యులు అరుదైన శస్త్రచికిత్సతో పునరుద్ధరించారు.తొడ, పొట్ట ప్రాంతంలోని రక్తనాళాలు, మోచేతి నుంచి కండరాన్ని సేకరించడం ద్వారా పురుషాంగాన్ని రూపొందించి విజయవంతంగా అమర్చారు.
‘ఏడాదిన్నర క్రితం చేసిన శస్త్రచికిత్సతో యువకుడు పూర్తిగా కోలుకున్నాడు. అంగ స్తంభన కోసం తాజాగా పినైల్‌ ఇంప్లాంట్‌ ఏర్పాటుచేశాం. రెండు దశల్లో జరిగిన ఈ చికిత్స విజయవంతమైంది’ అని ఆసుపత్రికి చెందిన సీనియర్‌ కన్సల్టెంట్‌ యూరాలజిస్ట్‌ డాక్టర్‌ రవికుమార్, ప్లాస్టిక్‌ సర్జన్‌ డాక్టర్‌ దాసరి మధు వినయ్‌కుమార్‌ మీడియాకు వివరించారు.
‘సోమాలియా దేశానికి చెందిన 20 ఏళ్ల యువకుడికి నాలుగేళ్ల వయసులో సున్తీ జరిగింది. ఇన్‌ఫెక్షన్‌ సోకడంతో వైద్యులు పురుషాంగాన్ని తొలగించారు. వృషణాల కింద నుంచి మూత్రం వెళ్లేలా మార్గం ఏర్పాటుచేశారు. 18 ఏళ్లు వచ్చే నాటికి మూత్ర విసర్జనలో ఇబ్బందులు ఎదురవడంతో బాధితుడు మాదాపూర్‌లోని మెడికవర్‌ ఆసుపత్రిని సంప్రదించాడు. ఈ నేపథ్యంలో ఇక్కడి వైద్యులు తొలుత మూత్ర విసర్జన సరిగా జరిగేలా ఓ శస్త్రచికిత్స చేశారు. తర్వాత పురుషాంగాన్ని పునఃసృష్టించాలని నిర్ణయించారు.మోచేయి ప్రాంతంలోని కండరాలతో..ఇందులో భాగంగా తొలుత రోగి ముంజేయి వద్ద మైక్రోవాస్క్యులర్‌ సర్జరీ ద్వారా రేడియల్‌ ఆర్టెరీ ఫోర్‌ఆర్మ్‌ ఫ్లాప్‌ విధానంలో పురుషాంగాన్ని రూపొందించి..రక్తనాళాలతో అనుసంధానంచేశారు. తర్వాత దాన్ని శస్త్రచికిత్సతో వృషణాల పైభాగంలో అతికించారు. మూత్రవిసర్జన పురుషాంగం ద్వారా జరిగేలా గొట్టాన్ని ఏర్పాటుచేసి మూత్రాశయానికి అనుసంధానించారు. ఏడాదిన్నర తర్వాత బాధితుడు స్పర్శ పొందగా..అంగస్తంభన కోసం తాజాగా వైద్యులు పిలైన్‌ ఇంప్లాంట్‌ అమర్చారు’ అని వారు వివరించారు. ఇకపై బాధితుడు వివాహం చేసుకుని సంసార జీవితం గడపవచ్చని, గతంలో ఇన్‌ఫెక్షన్‌ కారణంగా వీర్యగ్రంథి దెబ్బతినడం వల్ల వీర్య ఉత్పత్తి మాత్రం జరగదని వెల్లడించారు. తెలంగాణలో ఇలాంటి శస్త్రచికిత్స మొదటిసారి జరిగిందన్నారు.
