- రోబోటిక్‌ రీహాబిలిటేషన్‌ కీలకం…
హైదరాబాద్‌, ఆంధ్రప్రభ : స్ట్రోక్‌ బాధితులు త్వరగా, సమర్థంగా కోలుకోవడంలో రోబోటిక్‌ రీహాబిలిటేషన్‌ కీలక పాత్ర పోషిస్తోందని వైద్య నిపుణులు పేర్కొన్నారు. హైదరాబాద్‌లో నిర్వహించిన ‘అడ్వాన్స్‌ రోబోటిక్స్‌ ఇన్‌ రిహాబ్‌ & రికవరీ’ పేరుతో జరిగిన శాస్త్రీయ సదస్సులో దేశవ్యాప్తంగా 50 మందికి పైగా ప్రముఖ న్యూరాలజిస్టులు, న్యూరోసర్జన్లు, రీహాబిలిటేషన్‌ నిపుణులు పాల్గొన్నారు.
ఈ సదస్సులో ఆరోగ్య సంరక్షణలో అత్యంత అవసరమైన అంశం అయిన పోస్ట్‌-స్ట్రోక్‌ రీహాబిలిటేషన్‌ ప్రాముఖ్యతపై చర్చించారు. రోగులు వేగంగా, తక్కువ ఖర్చుతో కోలుకునేందుకు భారతదేశం తన పోస్ట్‌-స్ట్రోక్‌ కేర్ వ్యవస్థలో అధునాతన రోబోటిక్‌ రీహాబిలిటేషన్‌ను సమగ్రంగా అమలు చేయాల్సిన అవసరం ఉందని నిపుణులు ఏకాభిప్రాయానికి వచ్చారు.
స్ట్రోక్‌ పెద్దవారిలో వైకల్యానికి ప్రధాన కారణంగా ఉన్నప్పటికీ, ఆసుపత్రి నుంచి డిశ్చార్జ్‌ అనంతరం చాలా మంది రోగులకు తగిన రీహాబిలిటేషన్‌ అందడం లేదని వైద్యులు ఆందోళన వ్యక్తం చేశారు. “భారత ఆరోగ్య వ్యవస్థ అత్యవసర చికిత్సల్లో అద్భుతంగా పనిచేస్తోంది. కానీ నిజమైన కోలుకి పునాది రీహాబిలిటేషన్‌లోనే ఉంటుంది,” అని యశోదా ఆసుపత్రి సీనియర్‌ న్యూరోసర్జన్‌ డాక్టర్‌ బీఎస్‌వీ రాజు అన్నారు.
“స్ట్రోక్‌ చికిత్సలో ప్రతి రోజు అమూల్యం. రోగి రీహాబిలిటేషన్‌ను ఎంత త్వరగా ప్రారంభిస్తే, సాధారణ స్థితికి చేరుకునే అవకాశాలు అంత ఎక్కువగా ఉంటాయి. రోబోటిక్‌ రీహాబిలిటేషన్‌ ద్వారా చికిత్స మరింత ఖచ్చితంగా, తీవ్రంగా జరుగుతుంది,” అని ఆయన పేర్కొన్నారు.
HCAH సహ వ్యవస్థాపకుడు & అధ్యక్షుడు డాక్టర్‌ గౌరవ్‌ తుక్రాల్‌ మాట్లాడుతూ, “ఇటీవల మేము తెలంగాణలో అత్యాధునిక రోబోటిక్‌ రీహాబిలిటేషన్‌ ల్యాబ్‌ను ప్రారంభించాము. ఇందులో ఏఐ ఆధారిత ఎక్సోస్కెలిటన్లు, మోషన్‌ ట్రాకింగ్‌ వ్యవస్థలు ఉన్నాయి. ప్రారంభ దశలోనే రీహాబిలిటేషన్‌ అందించడం వైద్యపరంగా మాత్రమే కాకుండా ఆర్థికపరంగానూ ప్రయోజనకరమని పరిశోధనలు నిరూపించాయి,” అన్నారు.
“శస్త్రచికిత్స ప్రాణాలను కాపాడుతుంది; రీహాబిలిటేషన్‌ జీవితాన్ని తిరిగి ఇస్తుంది. కాబట్టి పోస్ట్‌-స్ట్రోక్‌ రీహాబిలిటేషన్‌ను ప్రతి చికిత్సా విధానంలో ప్రామాణిక భాగంగా చేయాలి,” అని డాక్టర్‌ తుక్రాల్‌ జోడించారు.
