- అన్ని వర్గాలను ఆదుకుంటున్న కూటమి ప్రభుత్వం
- ప్రభుత్వ విప్ బోండా ఉమామహేశ్వరరావు
MLA| పాయకాపురం, ఆంధ్రప్రభ : రాష్ట్రవ్యాప్తంగా ఉన్న నిరుపేదలకు ఆర్థిక భరోసాను పీ ఫోర్ విధానం ద్వారా అందిస్తున్నట్లు సెంట్రల్ నియోజకవర్గం ఎమ్మెల్యే ప్రభుత్వ విప్ బోండా ఉమామహేశ్వరరావు పేర్కొన్నారు. సింగ్ నగర్ లోని ఎమ్మెల్యే క్యాంపు కార్యాలయంలో 57వ డివిజన్ న్యూ రాజరాజేశ్వరి పేటకు చెందిన శొంఠి ఈశ్వరి, అచ్చయమ్మ ఇద్దరికీ చిరు వ్యాపారం నిమిత్తం పీ ఫోర్ పథకంలో భాగంగా ఇద్దరికి టిఫిన్ బండ్లను ప్రభుత్వ విప్, సెంట్రల్ నియోజకవర్గ ఎమ్మెల్యే బొండా ఉమామహేశ్వరరావు మంగళవారం అందించారు.
ఈ సందర్బంగా బొండా ఉమ మాట్లాడుతూ.. కూటమి ప్రభుత్వం అధికారంలోకి వచ్చిన తర్వాత, సమాజంలోని పేద వర్గాలకు చిన్న వ్యాపారులకు పూర్వ వైభవం తిరిగి వచ్చిందని.. ఇది వారి ఆర్థిక స్థితిగతులను మెరుగుపరచడంలో గణనీయమైన పాత్ర పోషిస్తుందన్నారు. సీఎం చంద్రబాబు అతి ముఖ్యమైన పథకం పీ ఫోర్ సమాజంలో ఆర్థిక అసమానతలను తగ్గించి, అందరికీ సమాన అవకాశాలు కల్పించాలనే లక్ష్యంతో ముందుకు సాగుతోందని, తన సొంత నిధులతో, వ్యక్తిగత చొరవతో నియోజకవర్గంలోని 9 వ డివిజన్ లలో నివసిస్తున్న పేదలందరికీ, పెళ్లిళ్లకు, మరణాలకు, చదువులు వంటి ఏ అవసరం వచ్చినా అండగా ఉంటామని హామీ ఇచ్చారు.
నిత్యం తాము, పార్టీ కార్యకర్తలు ప్రజల కష్టసుఖాల్లో పాలుపంచుకుంటూ వారికి అవసరమైన సహాయాన్ని అందించి వారి జీవితాల్లో వెలుగు నింపడానికి కృషి చేస్తారని, పీ ఫోర్ పథకంలో భాగంగా ముఖ్యంగా చిన్న వ్యాపారులకు ఉచితంగా తోపుడు బళ్లను అందించి, వారి వ్యాపార కార్యకలాపాలకు ప్రోత్సాహం అందిస్తూ.. వారికీ బ్యాంకుల్లో ఎటువంటి గ్యారంటీ లేకుండా కేవలం ఆధార్ కార్డుపై రూ. 15,000 లోన్ ఇప్పిస్తూ.. ఆ లోన్‌ను సకాలంలో తిరిగి చెల్లించినట్లయితే, మళ్ళీ రూ. 25 వేలు ఆపై రూ. 50 వేల వరకు కూడా లోన్ పొందే విధంగా చూస్తున్నామన్నారు.
వారు అధిక వడ్డీల బారిన పడకుండా ఆర్థికంగా నిలదొక్కుకోవడానికి అండగా ఉంటున్నారని.. ఇది వారి వ్యాపార విస్తరణకు ఎంతగానో తోడ్పడుతుందని చెప్పారు. అలాగే, వారికి వ్యాపారం చేసుకోడానికి అనుకూలమైన జోన్లను కేటాయించి, అవసరమైన సదుపాయాలను కల్పిస్తారని తెలిపారు. స్ట్రీట్ వెండర్స్‌కు అధికారికంగా లైసెన్సులు కూడా ఇస్తాం, తద్వారా వారు ఎటువంటి ఆటంకాలు లేకుండా తమ వ్యాపారాన్ని నిర్వహించుకోవచ్చున్నారు. అన్ని రకాలుగా పేదలుచిన్న వ్యాపారులకు అండగా నిలబడి, వారి ఆర్థిక స్థితిగతులను మెరుగుపరచడానికి కృషి చేస్తాం అని,ఇది వారి ఆత్మగౌరవాన్ని పెంచుతుందన్నారు.
తాను 2024 లో ఎమ్మెల్యేఐన తర్వాత దాదాపు 300 బళ్లు, స్త్రీ బండ్లు, తోపుడు బళ్లను పంపిణీ చేయడం జరిగిందని, ఇది ఒక నిరంతర ప్రక్రియ, భవిష్యత్తులో కూడా ఈ కార్యక్రమాన్ని కొనసాగిస్తూ, మరింత మందికి సహాయం అందించడానికి కట్టుబడి ఉన్నామని తెలియజేసారు. ఈ కార్యక్రమంలో టీడీపీ రాష్ట్ర కార్యదర్శి నవనీతం సాంబశివరావు, రాష్ట్ర నాగవంశ సాధికారకగా చైర్మన్ ఎరుబోతు రమణ రావు, ఎమ్మెల్యే కార్యాలయ కార్యదర్శి ఘంటా కృష్ణమోహన్, తదితర నాయకులు కార్యకర్తలు పాల్గొన్నారు.
