P M | పూర్తికానున్న రైల్వే ప్రాజెక్టులు…
P M | పూర్తికానున్న రైల్వే ప్రాజెక్టులు…
- ట్రాఫిక్, డ్రైనేజీ సమస్యలకు శాశ్వత పరిష్కారం దిశగా చర్యలు..
- విజయవాడ పార్లమెంటు సభ్యుడు కేసినేని శివనాద్.
- రైల్వే డీఆర్ఎంతో ప్రత్యేక సమావేశం
P M | ఎన్టీఆర్ బ్యూరో, ఆంధ్రప్రభ : విజయవాడ రైల్వే డివిజన్ పరిధిలో ఇటీవల ప్రారంభించిన ప్రాజెక్టులన్ని అతి త్వరలో పూర్తికానున్నట్లు విజయవాడ పార్లమెంట్ సభ్యుడు కేశినేని శివనాద్ తెలిపారు. విజయవాడ నగరంలో కొనసాగుతున్న రైల్వే ప్రాజెక్టుల నిర్మాణం, అభివృద్ధి, భవిష్యత్ ప్రణాళికలపై రైల్వే డివిజన్ మేనేజర్తో సమావేశం అనంతరం విజయవాడ ఎంపీ కేశినేని శివనాథ్ విలేఖరులతో మాట్లాడారు.
విజయవాడకు సంబంధించిన రైల్వే మౌలిక సదుపాయాల సమస్యలను పూర్తిగా డీఆర్ఎం దృష్టికి తీసుకెళ్లామని తెలిపారు. రైల్వే ప్రాజెక్టులు ఆంధ్రప్రదేశ్కు ఎక్కువగా మంజూరు కావడంలో సహకరించిన కేంద్ర రైల్వే మంత్రి అశ్విని వైష్ణవ్, ప్రధాన మంత్రి నరేంద్ర మోదీలకు కృతజ్ఞతలు తెలిపారు. అలాగే ముఖ్యమంత్రి చంద్రబాబు నాయుడు ఎప్పుడూ ఢిల్లీ వెళ్లినప్పుడల్లా అమరావతి రైల్వే స్టేషన్, కొత్త రైల్వే లైన్లు, రైల్వే జోన్ అంశాలపై కేంద్రంతో చర్చించి ఈ బడ్జెట్లో నిధులు కేటాయించేలా కృషి చేశారని చెప్పారు.
విజయవాడ నగరంలో రైల్వే లైన్లు అధికంగా ఉండటంతో ట్రాఫిక్ సమస్యలు, మురుగు నీటి పారుదల సమస్యలు తీవ్రంగా ఉన్నాయని పేర్కొన్నారు. వాటి పరిష్కారానికి రాబోయే రోడ్డు పై వంతెనలు, రోడ్డు క్రింది మార్గాలు కీలకంగా మారనున్నాయని తెలిపారు. గుణదల సమీపంలోని స్థాయి క్రాసింగ్ నెంబర్ 82, 316 పూర్తిగా ఆమోదం పొందాయని, 316 ఇప్పటికే టెండర్ దశకు చేరిందని చెప్పారు. స్థాయి క్రాసింగ్ నెంబర్ 8 కూడా త్వరలో టెండర్కు వెళ్లనుందని వెల్లడించారు.
రాయనపాడు రైల్వే స్టేషన్ సమీపంలోని 147, 148 స్థాయి క్రాసింగ్లు కూడా క్లియర్ అయ్యాయని, 150 స్థాయి క్రాసింగ్ టెండర్కు వెళ్లిందని తెలిపారు. కొండపల్లి ఎస్టీ కాలనీ, రాజరాజేశ్వరి పేట ప్రాంతాల్లో కొత్త రోడ్డు క్రింది మార్గాలు మంజూరయ్యాయని, వాటి డిజైన్లు సిద్ధమయ్యాయని చెప్పారు. ఎర్రకట్ట వంతెన, కె.ఎల్. రావు వంతెనలపై సాధ్యాసాధ్యాల అధ్యయనం కోసం సమగ్ర ప్రాజెక్టు నివేదిక సిద్ధం చేయిస్తున్నామని వివరించారు. వాంబే కాలనీ వాసులు ఎన్నాళ్లుగానో కోరుతున్న రోడ్డు క్రింది మార్గం కూడా త్వరలోనే కార్యరూపం దాల్చనుందని తెలిపారు.
విజయవాడ రైల్వే స్టేషన్ ఆధునీకరణ ప్రాజెక్టు ప్రైవేట్–ప్రభుత్వ భాగస్వామ్య విధానంలో అమలు కాబోతుందని, ఇప్పటికే నీతి ఆయోగ్ ఆమోదం లభించిందని చెప్పారు. మార్చి 31 నాటికి బిడ్డింగ్ ప్రక్రియ పూర్తయ్యి, అత్యాధునిక సౌకర్యాలతో విజయవాడ స్టేషన్ను దేశంలోనే అత్యంత రద్దీగా ఉండే స్టేషన్లలో ఒకటిగా మరింత అభివృద్ధి చేస్తామని స్పష్టం చేశారు. అమృత్ భారత్ పథకంలో రాయనపాడు, గుణదల స్టేషన్లు త్వరలో ప్రారంభమవుతాయని, కొండపల్లి స్టేషన్ను అమృత్ భారత్ 2.0లో చేర్చేందుకు ప్రయత్నిస్తున్నామని తెలిపారు.
రెండు మూడు నెలల్లో విజయవాడ రైల్వేకు సంబంధించిన ప్రధాన సమస్యలన్నీ పరిష్కారం అవుతాయని, మౌలిక వసతులు అభివృద్ధి అయితే మరిన్ని రైళ్లు కూడా విజయవాడకు ఆగుతాయని ఎంపీ తెలిపారు. జర్నలిస్టుల రైల్వే పాస్ సమస్యను రైల్వే మంత్రి దృష్టికి తీసుకెళ్తామని, రైల్వే క్వార్టర్స్ ఆధునీకరణకు కూడా చర్యలు చేపడతామని ఆయన స్పష్టం చేశారు.
click here to read more : సుజనా ఫౌండేషన్ ఆధ్వర్యంలో ఆరోగ్య అవగాహన కార్యక్రమం.
