మంథని, ఆంధ్రప్రభ : మంత్రి సార్ నాకు క్రికెట్ అంటే చాలా ఇష్టం… పెద్ద క్రికెటర్ కావాలని కలగన్నా… నాకో క్రికెట్ కిట్ ఇప్పించండి సార్” క్యాన్సర్ తో పోరాడుతున్న ఓ యువకుడి మాటలివి. వింటే మనసున్న ప్రతి మనిషికీ గుండె చెమర్చక మానదు. ఈ మాటలకు మంత్రి శ్రీధర్ బాబు ఏకంగా కన్నీళ్లు పెట్టుకున్నారు. మంథని నియోజకవర్గం పలిమెల మండలం సర్వాయ్ పేట గ్రామానికి చెందిన భౌత్ నితిన్ కాన్సర్ తో బాధపడుతూ ఖాజగూడలోని స్పర్ష్ హాస్పిటల్ లో చికిత్స పొందుతున్నారు.
ఈ విషయం తెలుసుకున్న తెలంగాణ ఐటీ మంత్రి శ్రీధర్ బాబు స్వయంగా ఆసుపత్రికెళ్లి పరామర్శించారు. నేనున్నానని భరోసానిచ్చారు. ఈ సందర్భంగా నితిన్ మాటలకు కన్నీళ్లు పెట్టుకున్న శ్రీధర్ బాబు అప్పటికప్పుడు క్రికెట్ కిట్ తెప్పించి అతని కోరికను నెరవేర్చారు. సొంతన్నగా వెంట నిలుస్తానని, ఏ అవసరమున్నా నేరుగా నన్ను సంప్రదించండి అంటూ నితిన్ తల్లిదండ్రులకు మంత్రి ధైర్యం చెప్పారు.
